سنجو سیمسن کی شاندار سنچری
حیدرآباد: اوپنر سنجو سیمسن (111) کی شاندار سنچری اور بلے بازوں کے 22 جارحانہ چھکوں کی بدولت ٹیم انڈیا نے بنگلہ دیش کے خلاف تیسرے T-20 میچ میں ہفتہ کے روز 20 اووروں میں چھ وکٹ پر 297 رن کا بڑا اسکور بنا لیا۔
بھارت نے ٹاس جیت کر پہلے بیٹنگ کا فیصلہ کیا۔ بنگلہ دیش نے ابھیشیک شرما کو چار رنز پر آؤٹ کر کے ابتدائی کامیابی حاصل کی لیکن اس کے بعد سیمسن، سوریہ کمار یادو، ریان پراگ اور ہاردک پانڈیا نے چھکے اور چوکے لگا کر اسٹیڈیم میں موجود شائقین کو مسحور کردیا۔ سیمسن نے خاص طور پر بہت خاص انداز میں بیٹنگ کی اور اپنے کپتان سوریہ کے ساتھ مل کر پاور پلے میں ہی بنگلہ دیشی گیند بازوں کے چھکے چھڑا دیئے۔
اننگز کے 10ویں اوور میں سیمسن نے رشاد حسین کی گیندوں پر پانچ چھکے لگائے اور ہندوستان کو 10 اوورز میں 150 سے آگے لے گئے۔ سیمسن نے صرف 47 گیندوں میں 11 چوکوں اور 8 چھکوں کی مدد سے 111 رنز بنائے اور سوریہ کے ساتھ دوسری وکٹ کے لیے 173 رنز کی زبردست شراکت داری کی۔ سوریہ نے صرف 35 گیندوں میں 75 رنز میں آٹھ چوکے اور پانچ چھکے لگائے۔ ریان پراگ نے بھی رنز کی بہتی گنگا میں ہاتھ دھوئے اور 13 گیندوں پر ایک چوکا اور چار چھکے لگا کر 34 رنز بنائے۔
ہاردک پانڈیا نے 18 گیندوں پر 47 رنز میں 4 چوکے اور اتنے ہی چھکے لگائے۔ رنکو سنگھ نے چار گیندوں میں ناقابل شکست 8 رنز بنائے اور اننگز کی آخری گیند پر چھکا لگا کر ہندوستان کو 297 تک پہنچا دیا۔
بھارت ایکسپریس۔
