کولمبو: ٹی20 ورلڈ کپ 2026 میں ایک بڑا اپ سیٹ دیکھنے کو ملا، جہاں زمبابوے نے دفاعی چیمپئن آسٹریلیا کو 23 رنز سے شکست دے کر ٹورنامنٹ میں سنسنی پھیلا دی۔ اس شاندار جیت کے ساتھ زمبابوے نے مسلسل دوسری کامیابی حاصل کی اور گروپ بی کی پوائنٹس ٹیبل میں دوسرے نمبر پر پہنچ گئی، جبکہ دو میچوں میں سے ایک میں شکست کے بعد آسٹریلیا تیسری پوزیشن پر چلا گیا ہے۔ جمعہ کو آر پریم داسا اسٹیڈیم میں کھیلے گئے اس میچ میں زمبابوے نے ٹاس ہار کر پہلے بیٹنگ کی اور مقررہ 20 اوورز میں دو وکٹوں کے نقصان پر 169 رنز بنائے۔ زمبابوے کی اننگز کا آغاز برائن بینیٹ اور تدیواناشے مارومانی کی اوپننگ جوڑی نے شاندار انداز میں کیا۔ دونوں نے صرف 7.3 اوورز میں 61 رنز جوڑ کر ٹیم کو مضبوط بنیاد فراہم کی۔ مارومانی نے 21 گیندوں پر سات چوکوں کی مدد سے 35 رنز بنائے۔
مارومانی کے آؤٹ ہونے کے بعد برائن بینیٹ نے ریان برل کے ساتھ دوسری وکٹ کے لیے 70 رنز کی اہم شراکت قائم کی۔ اس شراکت نے زمبابوے کے اسکور کو 131 تک پہنچا دیا۔ برل نے 30 گیندوں پر چار چوکوں کے ساتھ 35 رنز اسکور کیے۔ بعد ازاں بینیٹ نے کپتان سکندر رضا کے ساتھ ناقابلِ شکست 38 رنز کی شراکت قائم کرتے ہوئے ٹیم کو مضبوط مجموعی اسکور تک پہنچایا۔ برائن بینیٹ نے 56 گیندوں پر سات چوکوں کی مدد سے ناقابلِ شکست 64 رنز بنائے، جبکہ کپتان سکندر رضا نے صرف 13 گیندوں پر تیز رفتار 25 رنز کی اننگز کھیلی۔ آسٹریلیا کی جانب سے مارکس اسٹوئنس اور کیمرون گرین نے ایک ایک وکٹ حاصل کی۔
169 رنز کے ہدف کے تعاقب میں آسٹریلوی ٹیم 19.3 اوورز میں 146 رنز پر ڈھیر ہو گئی۔ آغاز میں ہی آسٹریلیا کو بڑا جھٹکا لگا اور صرف 29 کے مجموعی اسکور پر اس کی چار وکٹیں گر گئیں۔ اس مشکل صورتحال میں گلین میکسویل اور میٹ رینشا نے 77 رنز کی شراکت کے ذریعے ٹیم کو سنبھالنے کی کوشش کی، تاہم یہ جوڑی ٹوٹتے ہی وکٹوں کا سلسلہ دوبارہ شروع ہو گیا۔
آسٹریلیا کی طرف سے کپتان ٹریوس ہیڈ نے 17 رنز بنائے، گلین میکسویل نے 32 گیندوں پر 31 رنز اسکور کیے، جبکہ میٹ رینشا نے 44 گیندوں پر 65 رنز کی عمدہ اننگز کھیلی۔ زمبابوے کے لیے بلیسنگ مزربانی نے شاندار بولنگ کرتے ہوئے چار اوورز میں صرف 17 رنز دے کر چار وکٹیں حاصل کیں۔ بریڈ ایونز نے تین، جبکہ ویلنگٹن مساکادزا اور ریان برل نے ایک ایک وکٹ حاصل کی۔ یہ جیت زمبابوے کے لیے تاریخی ثابت ہوئی اور ٹیم کے حوصلے بلند ہو گئے ہیں، جبکہ آسٹریلیا کو اگلے میچوں میں بہتر کارکردگی دکھانے کی ضرورت ہوگی۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
