ویسٹ انڈیز نے دھماکہ خیز کارکردگی کا مظاہرہ کرتے ہوئے دوسرے ٹی 20 مقابلے میں ہندوستان کو 6 وکٹوں سے شکست دے دی۔ کیریبین ٹیم نے ہندوستان کی جانب سے دیے گئے 250 رنز کے ہدف کا کامیابی سے تعاقب کرتے ہوئے تاریخ رقم کی۔ ویسٹ انڈیز کی اس جیت کے ہیرو کپتان شائی ہوپ رہے۔ جے ایس سی اے انٹرنیشنل کرکٹ اسٹیڈیم میں کھیلے گئے اس مقابلے میں کئی بڑے ریکارڈ قائم ہوئے۔
ٹی 20 انٹرنیشنل میں دوسرا سب سے بڑا رن چیس
ویسٹ انڈیز نے ٹی 20 انٹرنیشنل کرکٹ میں دوسرے سب سے بڑے ہدف کا کامیابی سے تعاقب کیا۔ اس فارمیٹ میں سب سے بڑے ہدف کا تعاقب جنوبی افریقہ نے ویسٹ انڈیز کے خلاف کیا تھا، جب اس نے 259 رنز بناکر کامیابی حاصل کی تھی۔ٹی 20 کرکٹ کی تاریخ میں یہ محض ساتواں موقع ہے، جب کسی مقابلے میں 250 یا اس سے زیادہ رنز کے ہدف کا کامیابی سے تعاقب کیا گیا ہے۔
ہندوستان اور ویسٹ انڈیز کے میچ میں 501 رنز بنے
ہندوستان نے پہلے بلے بازی کرتے ہوئے 20 اوور میں 5 وکٹوں کے نقصان پر 249 رنز بنائے۔ اس مقابلے میں دونوں اننگز کو ملا کر مجموعی طور پر 501 رنز بنے، جو ٹی 20 انٹرنیشنل کے کسی ایک میچ میں بننے والے دوسرے سب سے زیادہ رنز ہیں۔ اس سے زیادہ رنز 2009 میں ویسٹ انڈیز اور جنوبی افریقہ کے درمیان کھیلے گئے ٹی 20 مقابلے میں بنے تھے۔ اس میچ میں دونوں ٹیموں نے مجموعی طور پر 517 رنز بنائے تھے۔ ہندوستان اور ویسٹ انڈیز کے درمیان دوسرے ٹی 20 انٹرنیشنل میں دونوں اننگز کو ملا کر کل 79 چھکے لگے۔ ایک ٹی 20 میچ میں اس سے زیادہ چوکے اور چھکے 2023 میں جنوبی افریقہ اور ویسٹ انڈیز کے درمیان کھیلے گئے مقابلے میں لگے تھے، جہاں دونوں ٹیموں نے مجموعی طور پر 81 باؤنڈریز حاصل کی تھیں۔
شائی ہوپ کی 45 گیندوں پر ناٹ آؤٹ سنچری
ویسٹ انڈیز کے کپتان شائی ہوپ نے شاندار اننگز کھیلتے ہوئے محض 45 گیندوں پر ناٹ آؤٹ 102 رنز بنائے۔ اس کے ساتھ ہی وہ ویسٹ انڈیز کی جانب سے ٹی 20 انٹرنیشنل میں دوسری تیز ترین سنچری بنانے والے بلے باز بن گئے۔ اس معاملے میں کیریبین کپتان سے آگے صرف جانسن چارلس ہیں، جنہوں نے 2023 میں 39 گیندوں پر سنچری بنائی تھی۔ ہوپ ہندوستان کے خلاف ٹی 20 فارمیٹ میں مشترکہ طور پر دوسری تیز ترین سنچری بنانے والے بلے باز بھی بن گئے ہیں۔ ان سے پہلے جیکب بیتھل نے 2026 کے ٹی 20 ورلڈ کپ میں ہندوستان کے خلاف 45 گیندوں پر سنچری بنائی تھی۔شائی ہوپ نے اس کارنامے کے ساتھ ویسٹ انڈیز کی جانب سے ٹی 20 کرکٹ میں دو سنچریاں بنانے والے تیسرے بلے باز ہونے کا اعزاز بھی حاصل کیا۔ ان سے پہلے کرس گیل اور ایون لیوس یہ کارنامہ انجام دے چکے ہیں۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
