T20 World Cup 2026: سیمی فائنل میں رسائی کے لیے انگلینڈ اور نیوزی لینڈ آمنے سامنے، پاکستان کی نظریں بھی مقابلے پر مرکوز

نئی دہلی :ٹی20 ورلڈ کپ 2026 میں جمعہ کے روز سپر ایٹ مرحلے کا ایک اہم مقابلہ کھیلا جائے گا، جس میں انگلینڈ اور نیوزی لینڈ کی ٹیمیں مدمقابل ہوں گی۔ گروپ ٹو کا یہ میچ کولمبو کے آر پریماداسا کرکٹ اسٹیڈیم میں شام سات بجے شروع ہوگا۔ اس میچ کی اہمیت صرف دونوں ٹیموں تک محدود نہیں بلکہ پاکستان کی ٹیم بھی اس مقابلے کے نتیجے پر گہری نظر رکھے ہوئے ہے۔انگلینڈ کی ٹیم سپر ایٹ مرحلے میں شاندار کارکردگی کا مظاہرہ کرتے ہوئے سری لنکا اور پاکستان کے خلاف اپنے ابتدائی دونوں میچ جیت چکی ہے اور سیمی فائنل کے لیے پہلے ہی کوالیفائی کر چکی ہے۔ اب انگلش ٹیم نیوزی لینڈ کے خلاف بھی اپنی جیت کا تسلسل برقرار رکھنے کی کوشش کرے گی تاکہ ٹورنامنٹ میں اپنی برتری قائم رکھ سکے۔

دوسری جانب نیوزی لینڈ کے لیے یہ مقابلہ انتہائی فیصلہ کن حیثیت رکھتا ہے۔ اگر نیوزی لینڈ انگلینڈ کو شکست دینے میں کامیاب ہو جاتی ہے تو وہ براہ راست سیمی فائنل میں جگہ بنا لے گی۔ اس صورت میں نیوزی لینڈ کے پانچ پوائنٹس ہو جائیں گے اور ٹیم گروپ میں سرفہرست رہتے ہوئے اگلے مرحلے میں پہنچ جائے گی۔تاہم اگر نیوزی لینڈ کو انگلینڈ کے ہاتھوں بڑی شکست کا سامنا کرنا پڑتا ہے تو پاکستان کے لیے سیمی فائنل میں رسائی کی امید برقرار رہے گی۔ نیوزی لینڈ کو پاکستان کے خلاف بارش سے متاثرہ میچ کے باعث ایک پوائنٹ ملا تھا جبکہ سری لنکا کے خلاف فتح سے اسے دو پوائنٹس حاصل ہوئے تھے۔ شکست کی صورت میں نیوزی لینڈ کے مجموعی پوائنٹس تین رہ جائیں گے، جس سے گروپ کی صورتحال دلچسپ ہو جائے گی۔

پاکستان کے اس وقت ایک پوائنٹ ہے۔ اگر پاکستان ہفتہ کے روز سری لنکا کے خلاف اپنے میچ میں بڑی کامیابی حاصل کر لیتا ہے تو اس کے بھی تین پوائنٹس ہو جائیں گے۔ ایسی صورت میں بہتر رن ریٹ کی بنیاد پر پاکستان سیمی فائنل تک رسائی حاصل کر سکتا ہے۔ یہی وجہ ہے کہ انگلینڈ اور نیوزی لینڈ کے درمیان ہونے والے اس مقابلے کو پاکستان کے لیے نہایت اہم تصور کیا جا رہا ہے۔موسمی پیش گوئی کے مطابق جمعہ کے روز کولمبو میں بارش کے امکانات بہت کم ہیں۔ تاہم اگر بارش کے باعث میچ متاثر ہوتا ہے اور دونوں ٹیموں کو ایک ایک پوائنٹ ملتا ہے تو نیوزی لینڈ آسانی سے سیمی فائنل میں پہنچ جائے گی، جو پاکستان کے لیے نقصان دہ ثابت ہوگا۔ اس لیے پاکستانی شائقین بھی بغیر رکاوٹ مکمل میچ کی امید کر رہے ہیں۔

کولمبو کے آر پریماداسا اسٹیڈیم کی پچ روایتی طور پر اسپن گیند بازوں کے لیے مددگار سمجھی جاتی ہے۔ یہاں گیند بلے پر قدرے رک کر آتی ہے جس کے باعث بلے بازوں کو مشکلات پیش آتی ہیں۔ اگرچہ تیز گیند بازوں کو بھی کچھ مدد ملتی ہے، تاہم مجموعی طور پر بلے بازوں کو ہر رن کے لیے جدوجہد کرنا پڑ سکتی ہے اور اب تک اس میدان پر کم اسکور والے مقابلے دیکھنے میں آئے ہیں۔دونوں ٹیموں کے درمیان اب تک تیس ٹی20 میچ کھیلے جا چکے ہیں، جن میں انگلینڈ نے سترہ جبکہ نیوزی لینڈ نے دس میچوں میں کامیابی حاصل کی ہے، جبکہ تین مقابلے بغیر نتیجہ ختم ہوئے۔ یہ اعداد و شمار بھی ایک سنسنی خیز مقابلے کی نشاندہی کر رہے ہیں۔

بھارت ایکسپریس اردو