بھارتی خواتین کرکٹ ٹیم نے 47 سال کے طویل انتظار کے بعد آخرکار تاریخ رقم کر دی۔ ہرمن پریت کور کی قیادت میں ٹیم انڈیا نے اتوار کی رات نوی ممبئی کے ڈی وائی پاٹل اسٹیڈیم میں جنوبی افریقہ کو 52 رنز سے شکست دے کر اپنا پہلا آئی سی سی ویمنز ورلڈ کپ جیت لیا۔ یہ بھارت کی کسی بھی فارمیٹ میں خواتین کی پہلی عالمی کامیابی ہے۔ اس جیت کے ساتھ ہی ملک بھر میں خوشی کی لہر دوڑ گئی اور ٹیم انڈیا کی بیٹیوں نے کروڑوں دل جیت لیے۔
آزادی کے بعد پہلا ویمنز ورلڈ کپ ٹائٹل
1973 میں ویمنز ون ڈے ورلڈ کپ کے آغاز کے بعد بھارت نے 1978 میں پہلی بار ڈیانا ایڈلجی کی قیادت میں اس ٹورنامنٹ میں حصہ لیا تھا، مگر اب 47 سال بعد ٹیم انڈیا نے اپنی محنت، استقامت اور عزم کے بل پر وہ کارنامہ انجام دیا جس کا انتظار کئی دہائیوں سے تھا۔
دیپتی شرما اور شیفالی کی شاندار کارکردگی
ٹاس ہارنے کے بعد بھارت نے پہلے بیٹنگ کرتے ہوئے 50 اوور میں 7 وکٹ کے نقصان پر 298 رنز بنائے۔ شیفالی ورما نے 78 گیندوں پر 87 رنز کی برق رفتار اننگ کھیلی جس میں 7 چوکے اور 2 چھکے شامل تھے۔ اس کے علاوہ اسمرتی مندھانا نے 45، دیپتی شرما نے 58 گیندوں پر 58، رچا گھوش نے 24 گیندوں پر 34، جمائمہ روڈریگز نے 24 اور کپتان ہرمن پریت کور نے 20 رنز بنائے۔
جنوبی افریقہ کے کام نہیں آسکی والوارٹ کی سنچری
299 رنز کے ہدف کا تعاقب کرتے ہوئے جنوبی افریقہ کی کپتان لورا والوارٹ نے 98 گیندوں پر 101 رنز کی شاندار اننگ کھیلی، لیکن باقی بلے باز خاطر خواہ کارکردگی نہ دکھا سکے۔ ان کے علاوہ اینری ڈرکسن نے 35، سنی لوس نے 25 اور تنظیم برٹس نے 23 رنز جوڑے۔ پوری ٹیم 45.3 اوور میں 246 رنز پر آؤٹ ہو گئی اور بھارت نے 52 رنز سے تاریخی جیت حاصل کی۔
دیپتی شرما کی تباہ کن بولنگ — پانچ وکٹوں کا کارنامہ
بھارت کی دیپتی شرما نے شاندار گیندبازی کرتے ہوئے 9.3 اوور میں صرف 39 رنز دے کر 5 وکٹ حاصل کیے۔ شیفالی ورما نے 2 اور شری چارنی نے 1 وکٹ لیا۔ دیپتی کی یہ کارکردگی بھارت کی جیت کی بنیاد بنی اور انہیں میچ کا بہترین کھلاڑی قرار دیا گیا۔
نئی تاریخ رقم — بھارتی بیٹیوں کا شاندار عزم
یہ جیت نہ صرف بھارتی کرکٹ بلکہ ملک کی ہر بیٹی کے لیے ایک ترغیب ہے۔ دن میں جہاں مردوں نے آسٹریلیا کا قلعہ ڈھایا، وہیں رات میں خواتین نے ورلڈ کپ جیت کر بھارت کا سر فخر سے بلند کر دیا۔ یہ کامیابی بھارتی خواتین کرکٹ کے لیے نئے دور کا آغاز ثابت ہوگی۔
ٹیم انڈیا کی یادگار کامیابی — نئی نسل کے لیے ترغیب
یہ جیت بھارتی خواتین کرکٹ کے لیے ایک نیا سنگ میل ہے۔ کپتان ہرمن پریت کور کی قیادت میں ٹیم انڈیا نے نہ صرف آسٹریلیا جیسے چمپئن کو سیمی فائنل میں شکست دی بلکہ فائنل میں بھی بھرپور اعتماد کے ساتھ تاریخ رقم کی۔ یہ کامیابی آنے والے برسوں میں خواتین کرکٹ کے لیے ایک نئی سمت طے کرے گی اور نوجوان کھلاڑیوں کے لیے حوصلے کا باعث بنے گی۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
