ممبئی(مہاراشٹر): مہاراشٹر کی نو منتخب نائب وزیراعلیٰ سنیترا پوار نے ہفتہ کے روز حلف لینے کے بعد اپنے شوہر اور سینئر سیاسی رہنما اجیت پوار کو خراج عقیدت پیش کرتے ہوئے کہا کہ وہ ’دادا کے نظریات کو زندہ رکھتے ہوئے‘ ریاست کی خدمت انجام دیں گی۔ انہوں نے کہا کہ اجیت پوار کی پوری زندگی کسانوں، مزدوروں، خواتین، نوجوانوں اور محروم طبقات کے لیے مشعل راہ رہی ہے اور وہ انہی اصولوں کی روشنی میں اپنی نئی ذمہ داری نبھائیں گی۔ سنیترا پوار نے سوشل میڈیا پلیٹ فارم ایکس پر ایک جذباتی پیغام میں لکھا کہ نائب وزیر اعلیٰ کے عہدے کا حلف لینا ان کے لیے فرض، جذبے اور مہاراشٹر کے سماجی نظریات سے وابستگی کا لمحہ ہے۔ انہوں نے کہا کہ وہ شیو–شاہو–پھولے–امبیڈکر کے نظریات پر قائم رہتے ہوئے اجیت پوار کی فکری وراثت کو آگے بڑھائیں گی۔
“आदरणीय अजितदादांनी आयुष्यभर शेतकरी, कष्टकरी, महिला, युवक आणि वंचित घटकांसाठी जगण्याचा मंत्र दिला. आज त्यांच्या विचारांचा वारसा पुढे नेत ‘शिव-शाहू-फुले-आंबेडकर’ यांच्या विचारांवर निष्ठा ठेवून कर्तव्य भावनेने उपमुख्यमंत्री पदाची जबाबदारी स्वीकारताना मन अक्षरशः भरून येत आहे.… pic.twitter.com/Z4vHP0BzkF
— Sunetra Ajit Pawar (@SunetraA_Pawar) January 31, 2026
’دادا کی جدائی غم کا مگر ان کی تعلیم میری طاقت‘
سنیترا پوار نے اپنے بیان میں اجیت پوار کی ناگہانی موت پر گہرے دکھ کا اظہار کرتے ہوئے کہا کہ ان کی جدائی نے ان کے دل پر غم کا پہاڑ ڈال دیا ہے، تاہم انہوں نے جو فرض شناسی، جدوجہد کی قوت اور عوام سے وابستگی سکھائی، وہی ان کی اصل طاقت ہے۔ انہوں نے لکھا: ’’اگرچہ دادا کی اچانک جدائی نے میرے ذہن پر غم کا پہاڑ ڈال دیا ہے، مگر انہوں نے جو ذمہ داری کا احساس، جدوجہد کی قوت اور عوام سے وابستگی مجھے سکھائی ہے، وہی میری اصل سہارا ہے۔ میں پوری دیانت داری کے ساتھ ایک انصاف پسند، مساوی اور ترقی یافتہ مہاراشٹر کی تعمیر کے لیے کام کرتی رہوں گی۔‘‘ انہوں نے مہاراشٹر کے عوام کا بھی شکریہ ادا کیا اور کہا کہ اس مشکل گھڑی میں عوام کی محبت اور حمایت ہی ان کی سب سے بڑی طاقت ہے۔
اہم محکموں کی ذمہ داری سونپی گئی
ادھر مہاراشٹر کے گورنر آچاریہ دیوورت نے وزیراعلیٰ دیویندر فڑنویس کی سفارش پر سنیترا پوار کو اہم وزارتی محکموں کی ذمہ داری سونپنے کی منظوری دے دی ہے۔ اس کے تحت انہیں اسٹیٹ ایکسائز (شراب محصولات)، کھیل اور نوجوانوں کی بہبود، اقلیتی بہبود اور اوقاف جیسے کلیدی محکمے دیے گئے ہیں۔ ان محکموں کو ریاست کی سماجی و اقتصادی ترقی کے لیے نہایت اہم تصور کیا جاتا ہے۔
حلف برداری کی تقریب، سیاسی قیادت کی موجودگی
سنیترا پوار نے ممبئی کے لوک بھون میں منعقدہ ایک باوقار تقریب میں نائب وزیراعلیٰ کے عہدے کا حلف لیا۔ انہیں یہ حلف مہاراشٹر کے گورنر آچاریہ دیوورت نے دلایا۔ اس موقع پر وزیراعلیٰ دیویندر فڑنویس اور نائب وزیراعلیٰ ایکناتھ شندے بھی موجود تھے۔ حلف برداری کے دوران ہال میں ’اجیت دادا امر رہیں‘ کے نعرے گونجتے رہے، جس سے فضا جذباتی ہو گئی۔ اس تقریب میں این سی پی اور دیگر اتحادی جماعتوں کے کئی سرکردہ رہنما شریک ہوئے۔
این سی پی کی قیادت اور سیاسی ذمہ داریاں
سنیترا پوار کو اپنے شوہر اجیت پوار کی المناک موت کے بعد نیشنلسٹ کانگریس پارٹی (این سی پی) کی قیادت سونپی گئی۔ انہوں نے حلف برداری سے قبل این سی پی لیجسلیٹو پارٹی کی لیڈر کے طور پر بھی انتخاب جیتا، جس کے بعد پارٹی قیادت نے وزیراعلیٰ دیویندر فڑنویس سے ملاقات کر کے ان کی تقرری کو حتمی شکل دی۔ سیاسی مبصرین کے مطابق سنیترا پوار کی قیادت میں این سی پی نہ صرف اپنے وجود کو مستحکم کرے گی بلکہ مہاراشٹر کی سیاست میں ایک نیا باب بھی رقم ہوگا۔
سنیترا پوار کی نائب وزیراعلیٰ کے طور پر تقرری کو مہاراشٹر کی سیاست میں ایک اہم موڑ کے طور پر دیکھا جا رہا ہے۔ جہاں ایک طرف یہ تقرری اجیت پاوار کی سیاسی وراثت کا تسلسل ہے، وہیں دوسری طرف ریاست میں نئی قیادت اور نئی سمت کی امید بھی پیدا ہوئی ہے۔ عوام اور سیاسی حلقوں کی نظریں اب اس بات پر مرکوز ہیں کہ سنیترہ پوار کس طرح اپنے وعدوں کو عملی شکل دیتی ہیں اور مہاراشٹر کو ترقی کی نئی راہوں پر گامزن کرتی ہیں۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
