نئی دہلی : اترپردیش کےضلع اعظم گڑھ میں بیوی، دو پجاریوں اور اپنے ہی بیٹے کے قتل کے ملزم اروند سنگھ کو پولیس نے انکاؤنٹر میں مار گرایا۔ تقریباً 8 گھنٹے تک جاری رہنے والے ہائی وولٹیج ریسکیو آپریشن کے بعد پولیس نے تین بچوں کو بحفاظت بازیاب کرا لیا۔
7 گھنٹے تک سمجھانے کی کوشش، لیکن بچوں کو چھوڑنے سے انکار
وارانسی زون کے ایڈیشنل ڈائریکٹر جنرل پولیس نوین اروڑہ نے بتایا کہ پولیس نے تقریباً 7 گھنٹے تک اروند سنگھ کو سمجھانے اور بچوں کو رہا کرنے کے لیے آمادہ کرنے کی کوشش کی، لیکن وہ مسلسل انکار کرتا رہا۔ ملزم صبح تک انتظار کرنے کی بات کہہ رہا تھا۔پولیس کی مسلسل کوششوں کے باوجود جب وہ نہیں مانا تو اچانک گھر کے اندر سے گولی چلنے کی آواز آئی۔ پولیس کے مطابق ملزم نے اپنے 10 سالہ بیٹے کو گولی مار دی تھی۔ گولی کی آواز سنتے ہی پولیس ٹیم نے فوری کارروائی کرتے ہوئے اسٹن گرینیڈ اور آنسو گیس کا استعمال کیا اور گھر میں داخل ہو گئی۔
پولیس کی جوابی کارروائی میں اروند سنگھ ہلاک
پولیس کے گھر میں داخل ہوتے ہی ملزم نے اپنی لائسنس یافتہ ریوالور سے فائرنگ شروع کر دی۔ پولیس کے مطابق اروند سنگھ نے 6 راؤنڈ گولیاں چلائیں، جس کے بعد پولیس نے جوابی کارروائی کی۔ فائرنگ میں اروند سنگھ شدید زخمی ہوا اور بعد میں اس کی موت ہو گئی۔
بیوی، دو پجاریوں اور بیٹے کے قتل کے بعد بچوں کو بنایا یرغمال
پولیس کے مطابق اروند سنگھ نے پہلے اپنی بیوی، اس کے بعد گھر آئے دو پجاریوں اور پھر اپنے بیٹے کو گولی مار دی۔ اس کے بعد اس نے بچوں کو یرغمال بنا لیا۔ ملزم اپنے سب سے چھوٹے بیٹے کو ہاتھ میں لیے ہوئے تھا، تاہم بچہ ہاتھ سے چھوٹ کر زخمی ہو گیا۔ بعد میں ملزم نے اپنی بیٹی کو بندوق کی نوک پر لے لیا۔اے ڈی جی نوین اروڑہ نے بتایا کہ پولیس کی حکمت عملی اور تربیت کی وجہ سے آپریشن کے دوران تینوں بچوں کی جان بچائی جا سکی۔ زخمی بچے کو فوری طور پر علاج کے لیے اسپتال بھیجا گیا، جبکہ دیگر دونوں بچے طویل وقت تک یرغمال رہنے کے باعث پانی کی کمی، بھوک اور شدید صدمے کی حالت میں تھے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
