مرکزی حکومت نے تمام ریاستی حکومتوں اور مرکز کے زیر انتظام علاقوں کو ہدایت دی ہے کہ وہ 25 جون 1975 کو نافذ کی گئی ایمرجنسی کے 50 برس مکمل ہونے پر یہ دن ’’یوم قتلِ آئین‘‘ (Samvidhan Hatya Diwas) کے طور پر منائیں اور سال بھر تقریبات منعقد کریں۔
دی نیو انڈین ایکسپریس کی خبر کے مطابق وزارتِ ثقافت کی جانب سے ریاستوں کے چیف سیکریٹریز کو جاری ایک خط میں ان تقریبات کا باضابطہ اعلان کیا گیا ہے، جن کا آغاز 25 جون 2025 سے ہوگا اور 25 جون 2026 تک جاری رہیں گی۔ وزارتِ ثقافت نے کہا ہے کہ یہ موقع ’’جمہوری اقدار اور آئینی اخلاقیات کے لیے نئے عزم‘‘ کو اجاگر کرنے کا موقع ہے۔
مشعل یاترا اور خصوصی پروگرام
ان تقریبات کا مرکز مشعل یا ای-مشعل یاترا ہو گی، جس کا آغاز 25 جون 2025 کو دہلی سے چھ مشعلوں کے ساتھ کیا جائے گا۔ بیان کے مطابق یہ مشعلیں ’جمہوریت کی روح‘ کی علامت ہوں گی۔ یہ یاترا 21 مارچ 2026 کو کرتویہ پاتھ، نئی دہلی پر اختتام پذیر ہو گی، جہاں وزیر اعظم نریندر مودی کی شرکت متوقع ہے۔ وزارت نے مزید ہدایت دی ہے کہ ریاستیں ایک نوڈل افسر بھی مقرر کریں جو وزارتِ ثقافت سے رابطہ رکھے اور ان تقریبات کا مربوط انداز میں انعقاد کرے۔
فلمیں، نمائشیں، اسکولوں سے روابط
وزارت نے ہدایت دی ہے کہ مختلف ریاستوں میں شارٹ فلموں کی نمائش، تعلیمی اداروں میں آؤٹ ریچ پروگرامز، سیمینارز، نمائشیں، عوامی اجلاس، اور گلی محلوں میں تھیٹر ڈرامے منعقد کیے جائیں۔ تمام تقریبات میں شرکت کرنے والے افراد قومی پرچم اور ’’جمہوریت زندہ باد‘‘، ’’بھارت: جمہوریت کی جنم بھومی‘‘، ’’جمہوریت کو مزید تقویت‘‘ جیسے پیشگی منظور شدہ نعرے لگا سکتے ہیں۔ اس کے علاوہ سینگل (Sengol) کی نقل کو اسٹیج کے قریب رکھا جائے گا، جو ’’عدل و انصاف کی حکمرانی‘‘ کی علامت سمجھی جاتی ہے۔
ایمرجنسی کا پس منظر اور علامتی پیغام
وزارت کے مطابق 25 جون 1975 کو لگائی گئی ایمرجنسی بھارت کی جمہوری تاریخ کا ایک تاریک باب تھی، جس میں شہری آزادیوں کو سلب کر لیا گیا، بنیادی حقوق معطل کیے گئے، میڈیا پر سخت سنسرشپ نافذ کی گئی اور ہزاروں سیاسی رہنماؤں، صحافیوں اور سماجی کارکنوں کو قید کر دیا گیا۔ وزارتِ داخلہ نے 11 جولائی 2024 کو ایک نوٹیفکیشن کے ذریعے اس دن کو ’’یوم قتلِ آئین‘‘ قرار دیا ہے۔ وزارتِ اطلاعات و نشریات اس حوالے سے ایک شارٹ فلم بھی تیار کرے گی، جو 22 جون کے بعد عوامی طور پر دستیاب ہو گی۔
نمائشیں اور عوامی رابطہ
وزارت نے ہدایت دی ہے کہ ملک بھر میں 50 اہم مقامات – جیسے کہ مالز، ریلوے اسٹیشنز، پوسٹ آفسز، پیٹرول پمپس، اسکولز اور سرکاری دفاتر – پر خصوصی نمائشوں کا اہتمام کیا جائے، جن میں شہریوں کو اپنی زبان میں جمہوریت سے متعلق پیغامات لکھنے کا موقع بھی فراہم کیا جائے گا۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
