The Adani Green Energy Gallery at London: لندن کے سائنس میوزیم میں ’’اڈانی گرین انرجی گیلری‘‘ کے ایک ملین وزیٹرمکمل

لندن: سائنس میوزیم لندن میں قائم ’’انرجی ریولیوشن: اڈانی گرین انرجی گیلری‘‘ نے مارچ 2024 میں افتتاح کے بعد سے اب تک دس لاکھ (ایک ملین) سے زائد وزیٹرز کا خیرمقدم کیا ہے۔ یہ گیلری مفت عوامی رسائی کے لیے کھلی ہے اور دنیا بھر میں توانائی کے پائیدار ذرائع، ماحولیاتی استحکام اور کم کاربن مستقبل کی جدتوں کو اجاگر کرتی ہے۔

ایوارڈ یافتہ ڈیزائن اور ماحول دوست تعمیر

ستمبر 2025 میں اس گیلری کو آرکیٹیکٹس جرنل ریٹروفٹ اینڈ ری یوز ایوارڈ سے نوازا گیا۔ گیلری کے ڈیزائن میں پائیداری کو اولین ترجیح دی گئی ہے، جہاں میوزیم کے پرانے اسٹور سے 200 سے زائد ری سائیکل شدہ دھاتی شیلف استعمال کیے گئے، ایلومینیم اور توانائی بچانے والے ایل ای ڈی لائٹس نصب کی گئیں، تاکہ کاربن اخراج کو کم سے کم رکھا جا سکے۔

’’ایک ملین ذہنوں کو تحریک دینے والا لمحہ‘‘ 

اڈانی گرین انرجی کے ایگزیکٹیو ڈائریکٹر ساگر اڈانی نے اس موقع پر کہا: ’’ہمیں فخر ہے کہ ادانی گرین انرجی گیلری نے ایک ملین ذہنوں کو متاثر کیا اور پائیداری و جدت پر عالمی گفتگو کو تقویت دی۔ یہ سنگ میل ہمارے مشترکہ عزم کی علامت ہے کہ ہم مل کر ایک زیادہ سرسبز اور مستحکم دنیا تشکیل دیں۔‘‘

’’سائنس میوزیم کی بڑی کامیابی‘‘

سائنس میوزیم گروپ کے چیف ایگزیکٹیو سرایان بلچ فورڈ نے کہا: ’’ہم خوش ہیں کہ ایک ملین وزیٹرز نے اس شاندار گیلری کا مشاہدہ کیا۔ یہ کارنامہ اس بات کا ثبوت ہے کہ گیلری کے ڈیزائن، کہانیوں اور نمائشوں نے عوام میں توانائی کے پائیدار استعمال کے بارے میں تجسس پیدا کیا ہے۔‘‘

تعلیم، تحقیق اور ٹیکنالوجی کا امتزاج

گیلری تین حصوں پر مشتمل ہے فیوچر پلینیٹ، فیوچر انرجی اور آور فیوچر۔ ان میں ماحولیاتی تبدیلی، کم کاربن ٹیکنالوجی، ہائیڈروجن پاور، شمسی توانائی، ہوا سے چلنے والے ٹربائنز اور نیوکلیائی فیوژن جیسے موضوعات کو تخلیقی انداز میں پیش کیا گیا ہے۔ نمایاں نمائشوں میں 1897 کی لندن کی پہلی برقی ٹیکسی، 1882 کے ابتدائی بجلی کے کیبلز، شمسی توانائی کے بڑے آئینے اور رولز رائس کے نیوکلئیر ری ایکٹر کا ماڈل شامل ہیں۔ مرکزی حصے میں ’’اونلی بریتھ‘‘ کے نام سے ایک حرکی (Kinetic) مجسمہ نصب ہے جو قدرت اور ٹیکنالوجی کے امتزاج کی علامت ہے۔

اڈانی گرین انرجی: پائیدار مستقبل کی ضامن

اڈانی گرین انرجی لمیٹڈ (AGEL) بھارت کی سب سے بڑی اور دنیا کی ممتاز قابل تجدید توانائی کمپنیوں میں سے ایک ہے جو شمسی، ہوائی، ہائبرڈ اور توانائی ذخیرہ کرنے کے منصوبوں پر کام کر رہی ہے۔ کمپنی کا ہدف 2030 تک 50 گیگاواٹ قابل تجدید توانائی پیدا کرنے کا ہے۔ گجرات کے خاؤڈا (Khavda) علاقے میں کمپنی دنیا کا سب سے بڑا 30 گیگاواٹ رینیوایبل انرجی پلانٹ تعمیر کر رہی ہے جو پیرس سے پانچ گنا بڑا ہے۔

سائنس میوزیم لندن: علم و اختراع کا مرکز

سائنس میوزیم جو سائنس میوزیم گروپ کا حصہ ہے، دنیا بھر کی سائنسی، تکنیکی اور طبی ایجادات کا نادر مجموعہ رکھتا ہے۔ یہ میوزیم 2020 میں آرٹ فنڈ میوزیم آف دی ایئر ایوارڈ جیت چکا ہے اور ہر سال لاکھوں زائرین کو روبوٹس، کوڈ بریکنگ، اسپیس ٹیکنالوجی اور ماحولیاتی سائنس جیسے موضوعات سے روشناس کراتا ہے۔

بھارت ایکسپریس اردو۔