بریلی: ملک میں یونیورسٹی گرانٹس کمیشن (یو جی سی) کے امتیاز مخالف قواعد 2026 کو لے کر جاری تنازعہ کے درمیان اتر پردیش کے بریلی سے ایک بڑی خبر سامنے آئی ہے۔ بریلی کے سٹی مجسٹریٹ النکار اگنی ہوتری نے اپنے عہدے سے استعفیٰ دے دیا ہے۔ انہوں نے اپنے استعفے کی وجہ یو جی سی کے متنازعہ قواعد اور پریاگ راج میں شَنکراچاریہ کی مبینہ توہین کو قرار دیا ہے۔ اس اچانک فیصلے نے انتظامی اور سیاسی حلقوں میں ہلچل مچا دی ہے۔ ملک بھر میں یو جی سی کے امتیاز مخالف قواعد 2026 کو لے کر شدید مخالفت دیکھنے کو مل رہی ہے۔ کئی تعلیمی اداروں، سماجی تنظیموں اور مختلف طبقوں کی جانب سے ان قواعد پر سوال اٹھائے جا رہے ہیں۔ حیرت کی بات یہ ہے کہ بعض مقامات پر حکمران جماعت بی جے پی کے لیڈر بھی ان قواعد کے خلاف آواز بلند کرتے نظر آ رہے ہیں۔ اسی ماحول کے درمیان ایک پی سی ایس افسر کا استعفیٰ اس معاملے کو مزید سنگین بنا رہا ہے۔
بریلی کے سٹی مجسٹریٹ النکار اگنی ہوتری نے استعفیٰ دے کر واضح کیا ہے کہ وہ موجودہ حالات سے دلبرداشتہ ہیں۔ انہوں نے کہا کہ پریاگ راج میں جیوتش پیٹھادھیشور سوامی اویمکتیشورانند کے شاگردوں کے ساتھ پیش آئے واقعے، جس میں مبینہ طور پر ان کی چوٹی کھینچی گئی، نے انہیں گہرا صدمہ پہنچایا ہے۔ اس واقعے کے بعد سنت سماج میں شدید ناراضگی پائی جا رہی ہے اور اسے مذہبی جذبات کی توہین کے طور پر دیکھا جا رہا ہے۔
سنہ 2019 بیچ کے پی سی ایس افسر النکار اگنی ہوتری نے اپنے طویل استعفیٰ نامے میں یو جی سی کے نئے قواعد کی سخت مخالفت کی ہے۔ انہوں نے الزام لگایا کہ یہ قواعد سماج کو تقسیم کرنے کا سبب بن سکتے ہیں۔ ان کا کہنا تھا کہ آج منتخب نمائندے، خواہ وہ رکن پارلیمنٹ ہوں یا رکن اسمبلی، کارپوریٹ ملازموں کی طرح کام کر رہے ہیں اور ان میں عوامی مسائل پر بولنے کی ہمت نہیں بچی ہے۔
انہوں نے مزید کہا کہ اگر عوامی نمائندوں میں ذرا سی بھی جرات ہے تو انہیں یو جی سی کے ان قواعد کے خلاف کھل کر سامنے آنا چاہیے۔ النکار اگنی ہوتری کے مطابق اس وقت برہمن سماج خود کو بے یار و مددگار محسوس کر رہا ہے اور اس کی مسلسل توہین کی جا رہی ہے۔ انہوں نے خبردار کیا کہ ایسے فیصلے ملک میں اندرونی خلفشار کو جنم دے سکتے ہیں اور عام طبقے کے ساتھ ناانصافی کو بڑھا سکتے ہیں۔ قابلِ ذکر ہے کہ استعفیٰ دینے والے النکار اگنی ہوتری کا تعلق اصل طور پر کانپور سے ہے۔ انہوں نے سال 2019 میں یو پی پی سی ایس کا امتحان پاس کیا تھا اور محض چھ سال کی سروس کے بعد ان کا یہ قدم کئی نئی بحثوں اور سوالات کو جنم دے رہا ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
