Ram Mandir Offering Controversy: ’’رام مندر کا سیاسی کریڈٹ لیا…اب جواب بھی دیں…‘‘، کانگریس کا مودی حکومت پر بڑا حملہ، شری رام جنم بھومی تیرتھ کشیتر ٹرسٹ کے خلاف کھولا محاذ

لکھنؤ: ایودھیا کے رام مندر میں چندے سے متعلق مبینہ بے ضابطگیوں کے معاملے پر کانگریس نے مرکزی حکومت اور شری رام جنم بھومی تیرتھ کشیتر ٹرسٹ کے خلاف محاذ کھول دیا ہے۔ پارٹی نے وزیر اعظم نریندر مودی سے اس معاملے پر خاموشی توڑنے کا مطالبہ کرتے ہوئے کہا ہے کہ جب مندر کی تعمیر اور پران پرتشٹھا کا سیاسی کریڈٹ لیا گیا تھا تو اب مبینہ بے ضابطگیوں پر جوابدہی سے بھی گریز نہیں کیا جا سکتا۔

سپریم کورٹ کی نگرانی میں عدالتی تحقیقات کا مطالبہ

کانگریس نے مطالبہ کیا ہے کہ اس پورے معاملے کی سپریم کورٹ کی نگرانی میں عدالتی تحقیقات کرائی جائیں، موجودہ ٹرسٹ کو تحلیل کیا جائے اور مندر میں آنے والے تمام چندے اور چھڑھاوے کا آزادانہ آڈٹ کرایا جائے۔ آل انڈیا کانگریس کمیٹی کے جنرل سکریٹری اور رکن پارلیمنٹ دیپیندر ہڈا اور اتر پردیش کانگریس کے صدر اجے رائے نے لکھنؤ میں مشترکہ پریس کانفرنس کرتے ہوئے مرکزی حکومت پر شدید تنقید کی۔

وزیر اعظم جواب دیں: دیپیندر ہڈا

دیپیندر ہڈا نے کہا کہ بھگوان شری رام کروڑوں لوگوں کے آستھا کا مرکز ہیں، اس لیے رام مندر سے متعلق مالی بے ضابطگیوں کے الزامات نے ملک بھر کے عقیدت مندوں کے ذہنوں میں کئی سوالات پیدا کر دیے ہیں۔ انہوں نے کہا کہ وزیر اعظم کو اس معاملے پر عوام کے سامنے اپنی پوزیشن واضح کرنی چاہیے۔ انہوں نے کہا کہ شری رام جنم بھومی تیرتھ کشیتر ٹرسٹ مرکزی حکومت کی نگرانی میں تشکیل دیا گیا، پران پرتشٹھا تقریب کی قیادت وزیر اعظم نے کی اور مندر کی تعمیر کا سیاسی کریڈٹ بھی بھارتیہ جنتا پارٹی نے لیا، لہٰذا اب حکومت اپنی ذمہ داری سے پیچھے نہیں ہٹ سکتی۔

ٹرسٹ کے عہدیداروں کے کردار پر سوال

دیپیندر ہڈا نے سوال اٹھایا کہ اگر ٹرسٹ کے سابق عہدیدار چمپت رائے اور انل مشرا پر کوئی الزام نہیں تھا تو پھر انہیں اپنے عہدے کیوں چھوڑنے پڑے؟ انہوں نے مطالبہ کیا کہ ٹرسٹ کے دیگر ذمہ دار عہدیداروں کے کردار کی بھی غیر جانبدارانہ تحقیقات کی جائیں۔ ان کا کہنا تھا کہ اب تک کی کارروائی صرف نچلے درجے کے ملازمین تک محدود رکھی گئی ہے، جبکہ اعلیٰ سطح پر جوابدہی طے نہیں کی جا رہی، جس سے معاملے پر پردہ ڈالنے کا شبہ پیدا ہوتا ہے۔

حکومت اصل ذمہ داروں کو بچا رہی ہے: اجے رائے

اتر پردیش کانگریس کے صدر اجے رائے نے الزام لگایا کہ حکومت غیر جانبدارانہ تحقیقات کرانے کے بجائے اس معاملے کو دبانے کی کوشش کر رہی ہے۔ ان کے مطابق اتنی بڑی مالی بے ضابطگی سرپرستی کے بغیر ممکن نہیں ہو سکتی۔ انہوں نے کہا کہ حکومت صرف چھوٹے ملازمین کے خلاف کارروائی کر رہی ہے، جبکہ اصل ذمہ دار افراد کو بچانے کی کوشش کی جا رہی ہے۔

کانگریس کے اہم مطالبات

کانگریس نے مطالبہ کیا ہے کہ پورے معاملے کی سپریم کورٹ کی نگرانی میں آزادانہ عدالتی تحقیقات کرائی جائیں، رام مندر میں موصول ہونے والے چندے اور چڑھاوے کا خصوصی آڈٹ کیا جائے، قصورواروں کے خلاف ایف آئی آر درج کر کے سخت کارروائی کی جائے اور موجودہ شری رام جنم بھومی تیرتھ کشیتر ٹرسٹ کو تحلیل کر کے اس کی جگہ مذہبی رہنماؤں، شنکراچاریوں، ایودھیا کے سنتوں، معزز شہریوں اور آزاد ماہرین پر مشتمل ایک نیا، شفاف اور جوابدہ ٹرسٹ تشکیل دیا جائے۔

کانگریس تمام مذاہب کا احترام کرتی ہے

ایک سوال کے جواب میں دیپیندر ہڈا نے کہا کہ کانگریس ایک سیکولر جماعت ہے اور تمام مذاہب کا یکساں احترام کرتی ہے۔ انہوں نے کہا کہ سابق وزیر اعظم راجیو گاندھی کے دورِ حکومت میں ہی ایودھیا میں رام مندر کا تالا کھولا گیا تھا۔ انہوں نے واضح کیا کہ کانگریس اس معاملے کو سڑک سے لے کر پارلیمنٹ تک اٹھائے گی اور عقیدے سے متعلق معاملات میں شفافیت اور جوابدہی کو یقینی بنانے کی جدوجہد جاری رکھے گی۔

بھارت ایکسپریس۔