Pariksha Pe Charcha 2026 saw 4. 5 crore registered participants: پریکشا پہ چرچا 2026 میں ریکارڈ شرکت، ساڑھے چار کروڑ سے زائد افراد نے کرائی رجسٹریشن

نئی دہلی: طلبہ، اساتذہ اور والدین کے درمیان امتحانات اور زندگی سے جڑے مسائل پر مکالمے کے لیے شروع کیا گیا پروگرام ’’پریکشا پہ چرچا‘‘ سال 2026 میں ایک تاریخی سنگِ میل ثابت ہوا ہے۔ اس سال اس پروگرام میں ساڑھے چار کروڑ سے زیادہ افراد نے رجسٹریشن کرائی، جب کہ اس سے جڑی مختلف سرگرمیوں میں مزید 2.26 کروڑ افراد نے سرگرم شرکت کی۔ اس طرح مجموعی طور پر پریکشا پہ چرچا 2026 میں 6.76 کروڑ سے زائد افراد کی شمولیت ریکارڈ کی گئی، جو اب تک کی سب سے بڑی شرکت مانی جا رہی ہے۔

پریکشا پہ چرچا 2026 کو خاص اس لیے بھی قرار دیا جا رہا ہے کہ یہ مکالمہ حقیقی معنوں میں پورے ملک تک پھیل گیا۔ نئی دہلی کے ساتھ ساتھ وزیر اعظم نریندر مودی نے تمل ناڈو کے کوئمبٹور، چھتیس گڑھ کے رائے پور، گجرات کے دیو موگرا اور آسام کے گوہاٹی میں طلبہ سے براہِ راست بات چیت کی۔ اس طرح مشرق، مغرب، شمال، جنوب اور ملک کے وسط سے آنے والی آوازیں ایک ہی پلیٹ فارم پر جمع ہوئیں۔

یہ پریکشا پہ چرچا کا آٹھواں ایڈیشن تھا، جسے فروری 2025 میں نئی دہلی کے سندر نرسری میں ایک نئے اور منفرد انداز میں منعقد کیا گیا تھا۔ اس پروگرام میں ملک کی تمام ریاستوں اور مرکز کے زیر انتظام علاقوں سے 36 طلبہ نے شرکت کی، جو سرکاری اسکولوں، کیندریہ ودیالیوں، سینک اسکولوں، ایکلویہ ماڈل رہائشی اسکولوں، سی بی ایس ای اسکولوں اور نوودیہ ودیالیوں کی نمائندگی کر رہے تھے۔ اس کے علاوہ پریرنا کے سابق طلبہ، کلا اتسو اور ویر گاتھا کے فاتحین بھی اس مکالمے کا حصہ بنے۔

اس ایڈیشن میں کھیل اور نظم و ضبط، ذہنی صحت، غذائیت، ٹیکنالوجی اور مالیاتی آگاہی، تخلیقی صلاحیت اور مثبت سوچ جیسے موضوعات پر سات خصوصی اقساط بھی پیش کی گئیں، جن میں مختلف نامور شخصیات نے طلبہ کی رہنمائی کی۔

قابلِ ذکر ہے کہ پریکشا پہ چرچا نے 2025 میں گنیز ورلڈ ریکارڈ بھی قائم کیا تھا، جب اس میں 245 سے زائد ممالک کے طلبہ، 153 ممالک کے اساتذہ اور 149 ممالک کے والدین نے حصہ لیا۔ وزارتِ تعلیم کے مطابق یہ پروگرام اب محض ایک تقریب نہیں رہا بلکہ ایک جن آندولن بن چکا ہے، جو طلبہ کو امتحانات کو اعتماد، مثبت سوچ اور تعمیری انداز میں لینے کی ترغیب دیتا ہے۔

بھارت ایکسپریس اردو