نئی دہلی : اتراکھنڈ میں 2027 کے اسمبلی انتخابات کے لیے سیاسی سرگرمیاں تیز ہونے لگی ہیں۔ اقتدار برقرار رکھنے کی کوششوں میں مصروف بھارتیہ جنتا پارٹی (بی جے پی) نے دیو بھومی میں اپنی انتخابی حکمت عملی کو مزید مضبوط بنانے کے لیے ایک جارحانہ منصوبہ تیار کیا ہے۔ پارٹی کے اہم حکمت عملی ساز اور مرکزی وزیر داخلہ امت شاہ کے کندھوں پر اس انتخاب کی بڑی ذمہ داری ہوگی۔ ان کی قیادت میں بی جے پی پہاڑی سے لے کر میدانی علاقوں تک انتخابی حکمت عملی کے تحت سیاسی گھیرابندی کرنے کی تیاری کر رہی ہے۔کانگریس کی جانب سے 9 بڑی عوامی ریلیوں کے منصوبے کے جواب میں بی جے پی نے اتراکھنڈ کی تمام 70 اسمبلی نشستوں تک پہنچنے کا جامع منصوبہ تیار کیا ہے۔
امت شاہ اور وزیر اعظم مودی کی ریلیوں سے گونجیں گے پہاڑی علاقے
بی جے پی کی اعلیٰ سطحی حکمت عملی کے مطابق، نومبر اور دسمبر کے مہینوں میں پارٹی کی مرکزی قیادت کے دوروں کا سلسلہ تیز ہونے والا ہے۔ پارٹی کی منصوبہ بندی ہے کہ وزیر اعظم نریندر مودی کی میدانی اور پہاڑی علاقوں میں ایک یا دو بڑی ریلیاں منعقد کی جائیں۔ اس کے لیے منصوبہ بندی کی جا رہی ہے۔وہیں، مرکزی وزیر داخلہ امت شاہ، قومی صدر نتن نین ، اتر پردیش کے وزیر اعلیٰ یوگی آدتیہ ناتھ، اسمرتی ایرانی اور انوراگ ٹھاکر سمیت تقریباً ایک درجن بڑے رہنماؤں کے پروگراموں کے لیے مرکزی قیادت سے وقت مانگا گیا ہے۔ امت شاہ کی براہ راست انتخابی مہم میں شمولیت کو مخالف جماعتوں کے حلقوں میں سیاسی ہلچل تیز کرنے والا قدم سمجھا جا رہا ہے۔
ہریدوار کی ریاستی مجلس عاملہ کی میٹنگ سے بجے گا انتخابی بگل
انتخابی تیاریوں کا آغاز 21 اور 22 نومبر کو ہریدوار میں ہونے والی بی جے پی کی ریاستی مجلس عاملہ کی میٹنگ سے ہوگا۔ دو روزہ اس اہم اجلاس کے پہلے دن پارٹی کے مختلف محاذوں اور شعبوں کی میٹنگیں ہوں گی، جب کہ 22 نومبر کو توسیعی ریاستی مجلس عاملہ کے اجلاس میں پارٹی کے قومی صدر نتن نوین، ریاستی انچارج رام مادھو، معاون انچارج بانسری سوراج اور اروند مینن شرکت کریں گے۔ اس کے علاوہ قومی صدر نتن نوین خصوصی طور پر ریاست کی پانچوں لوک سبھا نشستوں کا دورہ کریں گے۔ اس کے ذریعے وہ اتراکھنڈ کی تمام 70 اسمبلی نشستوں کے کارکنوں سے براہ راست رابطہ قائم کریں گے۔
کانگریس کی انتخابی گھیرابندی کا جواب دینے کے لیے امت شاہ کا ماسٹر اسٹروک
اتراکھنڈ میں اہم اپوزیشن جماعت کانگریس نے بھی انتخابی مہم کے لیے بڑے پیمانے پر تیاری کی ہے۔ پارٹی نے راہل گاندھی کی رودرپور، پوڑی اور دہرادون دیہی علاقوں میں، پرینکا گاندھی واڈرا کی گوپیشور، پتھورا گڑھ اور چنیالی سوڑ میں، جبکہ پارٹی صدر ملکارجن کھڑگے کی روڑکی، دہرادون شہر اور ادھم سنگھ نگر میں مجموعی طور پر 9 بڑی عوامی ریلیاں منعقد کرنے کا منصوبہ تیار کیا ہے۔کانگریس کی اس جارحانہ انتخابی مہم کا مقابلہ کرنے اور تنظیمی سستی کو دور کرنے کے لیے امت شاہ کی حکمت عملی کو بی جے پی کا بڑا ہتھیار قرار دیا جا رہا ہے۔ شاہ کی قیادت میں پارٹی بوتھ سطح کے کارکنوں میں جوش و جذبہ پیدا کرنے کے ساتھ حکومت کی کامیابیوں اور ترقیاتی منصوبوں کو عوام تک پہنچانے کی مہم چلائے گی۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
