پی ایم مودی نے صفائی کے میدان میں بے مثال تعاون کے لیے بندیشور پاٹھک کی ستائش کی
نئی دہلی: وزیر اعظم نریندر مودی نے صفائی کے متعلق مہاتما گاندھی کے نظریات کا ادارہ جاتی حل تلاش کرنے میں “بڑے تعاون” کے لیے سلبھ انٹرنیشنل کے بانی بندیشور پاٹھک کی اتوار کے روز ستائش کی۔ بتا دیں کہ سماجی کارکن پاٹھک کا گزشتہ منگل کے روز دہلی ایمس میں دل کا دورہ پڑنے سے انتقال ہو گیا تھا۔ ان کی عمر 80 سال تھی۔ انہوں نے ملک میں پبلک ٹوائلٹ بنانے کے لیے کافی کام کیا تھا۔ ایک ہندی روزنامے میں پاٹھک پر لکھے گئے ایک مضمون میں مودی نے کہا کہ جب سے وہ گجرات میں تھے تب سے پاٹھک کے صفائی کے جذبے کو دیکھ رہے ہیں۔
وزیر اعظم نے کہا، “15 اگست کو یوم آزادی کی تقریبات کے درمیان، میرے لیے اس خبر پر یقین کر پانا بہت مشکل تھا کہ بندیشور جی اب ہمارے درمیان نہیں ہیں۔ آسان، سادہ، شائستہ شخصیت سے مالا مال، سولبھ انٹرنیشنل کے بانی بندیشور جی کا چلے جانا ایک ناقابل تلافی نقصان ہے۔ انہوں نے کہا کہ آج کی نسل کو پاٹھک کی زندگی سے لا زوال محنت کی اہمیت کو سیکھنا چاہیے۔
‘امر اُجالا’ میں لکھے گئے ایک مضمون میں، وزیر اعظم نے کہا، “ان کے لیے کوئی کام چھوٹا نہیں تھا اور کوئی بھی شخص ان کے لیے چھوٹا نہیں تھا۔ صفائی کے کام میں مصروف ہمارے بھائیوں اور بہنوں کو باوقار زندگی فراہم کرنے کی ان کی کوششوں کو دنیا بھر میں سراہا گیا ہے۔ مجھے یاد ہے کہ جب میں نے صفائی کرنے والے بھائی بہنوں کے پاؤں دھوئے تو بندیشور جی اتنے جذباتی ہو گئے کہ انہوں نے کافی دیر تک مجھ سے اس واقعہ پر بات کی۔
مودی نے کہا، ’’میں مطمئن ہوں کہ سوچھ بھارت ابھیان آج غریبوں کے لیے باوقار زندگی کی علامت بن گیا ہے۔ ایسی اطلاعات بھی ہیں جن سے یہ ثابت ہوا ہے کہ سوچھ بھارت ابھیان کی وجہ سے عام لوگوں کو گندگی سے ہونے والی بیماریوں سے نجات مل رہی ہے اور صحت مند زندگی کی راہیں کھل رہی ہیں۔
وزیر اعظم نے اس بات پر زور دیا کہ عالمی ادارہ صحت نے بھی کہا ہے کہ سوچھ بھارت مشن کی وجہ سے تین لاکھ اموات کو روکا گیا ہے۔ انہوں نے کہا، “صرف یہی نہیں، یونیسیف نے یہاں تک کہا ہے کہ سوچھ بھارت مشن کی وجہ سے غریب ہر سال 50,000 روپے تک کی بچت کر رہے ہیں۔ اگر سوچھ بھارت مشن نہ ہوتا تو غریبوں کو گندگی سے ہونے والی بیماریوں کے علاج کے لیے اتنی ہی رقم خرچ کرنی پڑتی۔ سوچھ بھارت مشن کو اس بلندی تک لے جانے میں بندیشور جی کی رہنمائی بہت مفید رہی۔
پی ایم مودی نے کہا، ” سوچھ بھارت سے صحت مند بھارت، صحت مند بھارت سے ہم آہنگ ہندوستان، ہم آہنگ بھارت سے مضبوط بھارت، مضبوط بھارت سے خوشحال بھارت تک کا سفر، امرتکال کا سب سے متحرک سفر ہوگا۔ ہاں، میں اس سفر میں بندیشور جی کو یاد کروں گا۔ ان کو ایک بار پھر عاجزانہ خراج عقیدت۔
سوشل میڈیا پلیٹ فارم) ‘X’ سابقہ ٹویٹر( پر اپنا مضمون شیئر کرتے ہوئے مودی نے کہا، “ڈاکٹر بندیشور پاٹھک کی زندگی اور مشن کو بہت قریب سے جاننا میرے لیے اعزاز کی بات ہے، جنہوں نے صفائی کے میدان میں انمول شراکت کی۔” سلبھ انٹرنیشنل ایک سماجی خدمت کی تنظیم ہے جو تعلیم کے ذریعے انسانی حقوق، ماحولیاتی صفائی، فضلہ کے انتظام اور اصلاحات کو فروغ دینے کے لیے کام کرتی ہے۔
بھارت ایکسپریس۔
