نئی دہلی: کانگریس کے قومی صدر ملکارجن کھڑگے نے اتوار کو الزام عائد کیا کہ منواسمرتی، آر ایس ایس اور بھارتیہ جنتا پارٹی کی نظریاتی سوچ ملک کو تباہی کی طرف لے جا رہی ہے۔ انہوں نے کہا کہ صرف اپوزیشن، بالخصوص کانگریس کا نظریہ ہی ملک کے آئین کو بچا سکتا ہے۔ دہلی کے رام لیلا میدان میں منعقدہ ’ووٹ چور، گدی چھوڑ‘ یاترا سے خطاب کرتے ہوئے کھڑگے نے بی جے پی اور وزیراعظم نریندر مودی کے راستے کو آئین مخالف قرار دیا۔
آئین کو ختم کرنے کی سازش کا الزام
ملکارجن کھڑگے نے کہا ’’کانگریس کی نظریہ ہی ملک کو بچا سکتی ہے۔ موہن بھاگوت، گولوالکر گرو جی یا منوسمرتی کی نظریہ ملک کو نہیں بچا سکتی بلکہ اسے تباہ کر دے گی۔ بی جے پی اور وزیر اعظم مودی جس راستے پر چل رہے ہیں، آہستہ آہستہ آئین کو ختم کرنے کی کوشش کی جا رہی ہے۔‘‘
راہل گاندھی کی جدوجہد کی تعریف
کانگریس صدر نے راہل گاندھی کی تعریف کرتے ہوئے کہا کہ وہ ملک اور عوامی ووٹ کو بچانے کے لیے مسلسل جدوجہد کر رہے ہیں۔ انہوں نے کہا ’’راہل گاندھی ملک کے لیے لڑ رہے ہیں اور اس جدوجہد کو مضبوط بنانا ہم سب کی ذمہ داری ہے۔ اگر ہم نے ایسا نہیں کیا تو یہ نقصان ملک کا ہوگا۔ اگر آپ ملک، اپنا ووٹ اور آئین بچانا چاہتے ہیں تو کانگریس کی نظریہ کو مضبوط کریں۔‘‘
سنگھ پریوار پر غلامی مسلط کرنے کا الزام
کھڑگے نے سنگھ پریوار پر سخت حملہ کرتے ہوئے الزام لگایا کہ ہندوتوا کے نام پر عوام کو غلام بنانے کی کوشش کی جا رہی ہے۔ انہوں نے کہا ’’ہندو مذہب میں سب شامل ہیں، لیکن ہندو دھرم کے نام پر لوگوں کو غلام بنایا جا رہا ہے۔ اگر آپ اپنی خودداری چھوڑ دیں گے تو آپ ختم ہو جائیں گے۔ آزادی کانگریس نے دلائی تھی، مودی نے نہیں۔ اس وقت نہ مودی پیدا ہوئے تھے اور نہ امت شاہ۔‘‘
نہرو، گاندھی اور امبیڈکر کے خلاف مہم کا الزام
کانگریس صدر نے الزام لگایا کہ بی جے پی رہنما پنڈت نہرو، مہاتما گاندھی اور ڈاکٹر بھیم راؤ امبیڈکر کے خلاف نفرت پھیلا رہے ہیں اور تاریخ کو مسخ کرنے کی کوشش کر رہے ہیں۔ انہوں نے کہا کہ ایک طرف یہ لوگ نہرو اور سردار پٹیل کے اختلافات کا ڈھونگ رچاتے ہیں اور دوسری طرف ’ووٹ چوری‘ جیسے اقدامات کرتے ہیں۔
ووٹ چوری کے خلاف فیصلہ کن لڑائی
ملکارجن کھڑگے نے عوام سے اپیل کی کہ وہ اپنے حقوق کے تحفظ کے لیے بی جے پی کو اقتدار سے ہٹائیں۔ انہوں نے کہا کہ اسی مقصد کے تحت راہل گاندھی نے 800 کلومیٹر طویل پیدل یاترا کی تاکہ عوام کو بیدار کیا جا سکے۔
سیاسی سرگرمیوں میں تیزی
کانگریس کی یہ ریلی ایسے وقت میں منعقد ہوئی ہے جب پارٹی مبینہ الیکشن میں بے ضابطگیوں، ’ووٹ چوری‘ اور اسپیشل انٹینسیو ریویژن (SIR) کے خلاف اپنی مہم تیز کر چکی ہے۔ ریلی سے راہل گاندھی اور پرینکا گاندھی سمیت کئی سینئر لیڈروں نے خطاب کیا۔ پرینکا گاندھی نے بھی الزام لگایا کہ حکومت مہنگائی اور آلودگی جیسے حقیقی مسائل پر بحث سے گریز کر رہی ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
