مرکزی وزیر اور ریپبلکن پارٹی آف انڈیا (اٹھاولے) کے سربراہ رام داس اٹھاولے نے جمعہ کو پورا اعتماد ظاہر کرتے ہوئے کہا ہے کہ ممبئی کا میئر مہایوتی اتحاد سے ہی ہوگا۔ انہوں نے دعویٰ کیا کہ بی ایم سی انتخابات میں زیادہ تر نشستیں مہایوتی اتحاد کے حصے میں جا رہی ہیں اور یہی اتحاد ممبئی کی سب سے امیر میونسپل کارپوریشن پر اقتدار حاصل کرے گا۔اے این آئی سے بات کرتے ہوئے رام داس اٹھاولے نے کہا کہ آج مہاراشٹر بھر میں میونسپل انتخابات کی ووٹ گنتی جاری ہے۔ ممبئی کے حوالے سے، انہوں نے کہا کہ اُدھو ٹھاکرے تقریباً 25 سے 30 برس تک اقتدار میں رہے، مگر اس کی اصل وجہ بی جے پی کے ساتھ ان کا اتحاد تھا۔ اٹھاولے کے مطابق آج بی جے پی ملک کی نمبر ایک پارٹی بن چکی ہے اور اسی کی وجہ سے مہایوتی اتحاد مضبوط پوزیشن میں نظر آ رہا ہے۔
انہوں نے مزید کہا کہ 2012 سے ریپبلکن پارٹی آف انڈیا (اے) بھی اُدھو ٹھاکرے کے ساتھ تھی، جس کے باعث وہ اقتدار میں برقرار رہے، لیکن اب نہ بی جے پی ان کے ساتھ ہے اور نہ ہی آر پی آئی (اے)۔ اٹھاولے کے مطابق اب اُدھو ٹھاکرے نے راج ٹھاکرے کی ایم این ایس کے ساتھ اتحاد کیا ہے، جس سے کچھ مراٹھی بولنے والے علاقوں میں انہیں فائدہ ضرور مل رہا ہے، لیکن مجموعی طور پر اکثریت مہایوتی اتحاد کے حق میں جا رہی ہے۔ انہوں نے واضح الفاظ میں کہا کہ ممبئی کا میئر مہایوتی اتحاد سے ہوگا اور وہ مراٹھی بولنے والا ہوگا۔ابتدائی رجحانات کے مطابق بی جے پی اور ایکناتھ شندے کی قیادت والی شیو سینا پر مشتمل مہایوتی اتحاد نے بی ایم سی میں اپنی برتری مزید مضبوط کر لی ہے۔ ابتدائی اعداد و شمار کے مطابق اتحاد ممبئی کے 117 وارڈز میں سبقت حاصل کیے ہوئے ہے۔ ان میں سے بی جے پی 86 نشستوں پر آگے ہے، جبکہ شیو سینا (شندے گروپ) 31 نشستوں پر برتری بنائے ہوئے ہے۔
دوسری جانب شیو سینا (یو بی ٹی) اتحاد 68 کے ہندسے کو پار کرنے میں کامیاب ہوا ہے۔ اس میں مہاراشٹر نونرمان سینا 9 نشستوں پر، شیو سینا (یو بی ٹی) 58 نشستوں پر اور این سی پی (ایس پی) صرف ایک نشست پر آگے ہے۔ اسی طرح اجیت پوار کی این سی پی بھی صرف ایک نشست پر سبقت حاصل کر پائی ہے، جبکہ کانگریس کی کارکردگی انتہائی مایوس کن رہی اور وہ محض 10 نشستوں پر ہی برتری حاصل کر سکی ہے۔ابتدائی نتائج کو دیکھتے ہوئے مہایوتی اتحاد کے حوصلے بلند ہیں اور سیاسی حلقوں میں یہ مانا جا رہا ہے کہ بی ایم سی کی باگ ڈور ایک بار پھر بی جے پی۔شندے اتحاد کے ہاتھ میں جا سکتی ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
