Major accident in Mumbai: ممبئی کے کرلا میں بڑا حادثہ، کام کے دوران ریلوے کی بجلی کی لائن پر گری کرین،6افراد زخمی،ریسکیو آپریشن جاری

ممبئی کے کرلا علاقے میں جمعہ کی صبح ایک بڑا حادثہ پیش آیا، جہاں ایک کرین گرنے سے 6 افراد زخمی ہوگئے۔ حادثہ کرلا کے قریشی نگر میں پیش آیا۔ بتایا گیا ہے کہ یہ کرین ممبئی میٹروپولیٹن ریجن ڈیولپمنٹ اتھارٹی (MMRDA) کی تھی، جو کرلا اور ٹرومبے کے درمیان ریلوے کی اوور ہیڈ بجلی کی لائن پر جا گری۔ کرین کے حجم کی وجہ سے ریلوے لائن کے کنارے موجود کئی جھونپڑیاں اور مکانات بھی اس کی زد میں آگئے۔ حادثے کے بعد علاقے میں افراتفری مچ گئی اور بڑی تعداد میں مقامی لوگ موقع پر جمع ہوگئے۔ زخمیوں کو فوری طور پر اسپتال منتقل کیا گیا، جبکہ جائے حادثہ پر ریسکیو آپریشن جاری ہے۔

ریلوے کی اوور ہیڈ بجلی کی لائن پر گری کرین

یہ حادثہ کرلا کے قریشی نگر میں اس وقت پیش آیا جب وہاں ایک مکان پر کرین گرانے کا واقعہ ہوا۔ علاقے میں ایم ایم آر ڈی اے کا کام جاری تھا۔ سینٹرل ریلوے کے مطابق، قریب ہی جاری کام کے دوران استعمال کی جانے والی ایک کرین کرلا اور ٹرومبے کے درمیان موجود اوور ہیڈ الیکٹرک لائن پر گر گئی۔ تاہم اس حادثے سے ریلوے ٹریفک پر کوئی خاص اثر نہیں پڑا، کیونکہ یہ سنگل ریلوے لائن ہے اور اس کا استعمال صرف مال گاڑیوں کے لیے کیا جاتا ہے۔ حادثے کے بعد ریسکیو ٹیمیں موقع پر پہنچ گئیں اور امدادی کارروائیاں شروع کردی گئیں۔

مشین کو عمارت پر پہنچانے کے دوران بگڑا کرین کا توازن

عینی شاہدین کے مطابق علاقے میں ایک پرانی عمارت کو منہدم کرنے کا کام جاری تھا۔ اسی سلسلے میں عمارت کے اوپر پوکلیِن مشین پہنچانے کی تیاری کی جارہی تھی اور اس کے لیے ایک بڑی کرین استعمال کی گئی تھی۔ عینی شاہدین کا کہنا ہے کہ مشین کو اوپر اٹھانے کے دوران اچانک کرین کا توازن بگڑ گیا اور وہ پلٹ گئی۔ لوگوں کو سنبھلنے کا موقع بھی نہیں ملا اور دیکھتے ہی دیکھتے کرین کا ایک بڑا حصہ آس پاس کے مکانات پر جاگرا۔

6 زخمی سائن اسپتال، 2 افراد کرلا بھابھا اسپتال منتقل

برہن ممبئی میونسپل کارپوریشن (BMC) نے حادثے کے حوالے سے سرکاری بیان جاری کیا ہے۔ بی ایم سی کے مطابق، موقع پر موجود ایل وارڈ کے جونیئر انجینئر سے حاصل معلومات کے مطابق، مہاڈا (MHADA) اس مقام پر انہدام یا ہٹانے کا کام شروع کرنے والا تھا۔ بیان کے مطابق، اسی کام کے لیے پوکلیِن مشین کا استعمال کرتے ہوئے کرین لگائی جارہی تھی، جس کے دوران یہ حادثہ پیش آیا۔ حادثے میں زخمی ہونے والے 6 افراد کو سائن اسپتال جبکہ 2 زخمیوں کو کرلا بھابھا اسپتال میں داخل کرایا گیا ہے۔ زخمیوں کے ناموں کی فی الحال تصدیق نہیں ہوسکی ہے۔ حکام کی جانب سے یہ بھی معلوم کیا جارہا ہے کہ حادثے کے مقام پر کوئی اور شخص ملبے کے نیچے تو نہیں پھنسا ہوا۔ ریسکیو ٹیمیں علاقے میں تلاش اور امدادی کارروائیوں میں مصروف ہیں۔ حادثے کے بعد مقامی لوگوں میں خوف و ہراس پایا جارہا ہے، جبکہ پولیس اور متعلقہ انتظامیہ کی ٹیمیں بھی موقع پر موجود ہیں۔

جولائی میں میرا روڈ میں بھی گِری تھی کرین

اس سے قبل جولائی میں ممبئی کے میرا روڈ واقع جے پی نارتھ سوسائٹی میں بھی تعمیراتی کام کے دوران ایک بڑی کرین گرنے سے حادثہ پیش آیا تھا۔ کرین اچانک رہائشی کمپلیکس کے اندر جاگری تھی، جس کے نتیجے میں ایک شخص کی موت ہوگئی تھی جبکہ وہاں کھڑی کئی گاڑیوں کو بھی نقصان پہنچا تھا۔

بھارت ایکسپریس اردو۔