بھارت کا REIT اور InvIT مارکیٹ پانچ سال میں ساڑھے تین گنا بڑھ سکتا ہے: نائٹ فرینک

بھارت کا ریئل اسٹیٹ انویسٹمنٹ ٹرسٹ (REITs) اور انفراسٹرکچر انویسٹمنٹ ٹرسٹ (InvITs) کا بازار، جو جائیداد اور بنیادی ڈھانچے کے اثاثوں میں سرمایہ کاری کے لیے فنڈز اکٹھا کرتا ہے، 2030 تک ساڑھے تین گنا تک بڑھ سکتا ہے۔ نائٹ فرینک انڈیا کے مطابق اس کی بڑی وجوہات میں دفتری جگہ کی بڑھتی فراہمی اور طلب، 12 سے 16 فیصد کی مستحکم پیداوار، اور ادارہ جاتی و غیر ملکی سرمایہ کاروں کی بڑھتی دلچسپی شامل ہیں۔

نائٹ فرینک انڈیا کے ایگزیکٹو ڈائریکٹر (گورنمنٹ اینڈ انفراسٹرکچر ایڈوائزری) راجیو وجے نے منی کنٹرول کو بتایا کہ انفراسٹرکچر انویسٹمنٹ ٹرسٹس سرمایہ کاروں کے لیے ایک زیادہ منافع بخش اثاثہ بنتے جا رہے ہیں۔
انہوں نے کہا،’’ REITs اور InvITs دراصل ایک پیداوار (yield) پر مبنی ڈھانچے کی طرح کام کرتے ہیں جہاں سرمایہ کاروں کو باقاعدہ 6 سے 8 فیصد آمدنی ملتی ہے۔ اس کے علاوہ 4 سے 8 فیصد تک اضافی ترقی بھی ہو سکتی ہے۔ اس طرح کل ملا کر سرمایہ کار 12 سے 16 فیصد منافع کما سکتے ہیں۔ یہ کسی بھی سرمایہ کار کے لیے پرکشش ہے، اور یہی ایک بڑی وجہ ہے کہ غیر ملکی سرمایہ InvITs میں آیا ہے۔‘‘

انہوں نے کہا کہ یہ شعبہ اس وقت اسی مرحلے پر ہے جس پر بھارت کی میوچل فنڈ انڈسٹری پانچ سے سات سال پہلے تھی، جہاں سرمایہ کاروں کی تعلیم اور آگاہی ترقی کے لیے اہم ہے۔
انہوں نے کہا، ’’ہم InvITs کے لیے بھی اسی طرح کا ڈھانچہ تجویز کر رہے ہیں۔ دو صنعتی ادارے قائم ہو چکے ہیں، ایک InvITs کے لیے اور ایک REITs کے لیے، اور یہ سرمایہ کاروں کی تعلیم کے لیے مختلف اسٹیک ہولڈرز کے ساتھ کام کر رہے ہیں۔‘‘

اس اثاثہ کلاس کی ایک اہم خصوصیت اس کی پائیداری ہے کیونکہ یہ فعال منصوبوں کی پشت پناہی پر مبنی ہے۔ نائٹ فرینک انڈیا نے وضاحت کی، ’’InvITs میں اثاثے پہلے سے فعال ہوتے ہیں۔ یہ آمدنی پیدا کرنے والے اثاثوں کو یکجا کر کے بنایا جاتا ہے۔ یہ ایک کیش فلو بزنس ہے جہاں اتار چڑھاؤ کم ہوتا ہے، اسی لیے اسے yield play کہا جاتا ہے۔‘‘

راجیو وجے نے یہ بھی کہا کہ اگر REITs اور InvITs کے لیے ٹیکسیشن آسان بنا دی جائے تو ریٹیل سرمایہ کاروں کی شمولیت میں اضافہ ہو سکتا ہے۔ انہوں نے کہا، ’’اگر ٹیکس کے معاملے کو سادہ بنایا جائے تو زیادہ سے زیادہ لوگ آئیں گے۔ چاہے غیر ملکی پورٹ فولیو سرمایہ کار اسٹاک مارکیٹ سے نکل جائیں، مارکیٹ زیادہ نہیں گرتی کیونکہ ریٹیل پیسہ آ رہا ہے۔ یہی پیسہ InvITs میں آ سکتا ہے جو اسٹاک مارکیٹ کے خطرے کے بغیر باقاعدہ آمدنی فراہم کرتے ہیں۔‘‘

ادارہ جاتی سرمایہ کاری بھی مستقبل میں اس اثاثہ کلاس کی مقبولیت بڑھانے میں بڑا کردار ادا کرے گی۔ انہوں نے کہا کہ ہم چاہتے ہیں کہ گھریلو ادارہ جاتی سرمایہ کار — میوچل فنڈز، انشورنس کمپنیاں اور پنشن فنڈز — زیادہ سرمایہ لگائیں۔ بدقسمتی سے بھارتی فنڈز زیادہ حصہ نہیں لے پائے، جبکہ کینیڈا، مشرق وسطیٰ اور امریکہ کے غیر ملکی پنشن فنڈز نے سرمایہ لگا کر اچھا منافع کمایا ہے۔ انہوں نے مزید کہا کہ بھارتی میوچل فنڈز اور انشورنس کمپنیوں کی سرمایہ کاری کی حد بڑھانے سے زیادہ طلب پیدا ہو سکتی ہے۔

سپلائی کے لحاظ سے، اب تک InvITs نے زیادہ تر ٹول روڈز، پاور ٹرانسمیشن اور قابلِ تجدید توانائی کے منصوبوں سے فائدہ اٹھایا ہے، اور راجیو وجے کے مطابق نئے شعبے بھی اس میں گہرائی لا سکتے ہیں۔

بھارت ایکسپریس۔