نئی دہلی: بھارت نے عالمی سطح پر ماحولیاتی تحفظ کے میدان میں ایک اہم سنگ میل عبور کیا ہے۔ فوڈ اینڈ ایگریکلچر آرگنائزیشن (ایف اے او) کی جانب سے بالی میں جاری کی گئی رپورٹ ’گلوبل فاریسٹ ریسورسز اسیسمنٹ (جی ایف آر اے) 2025‘ کے مطابق بھارت اب کل جنگلاتی رقبے کے لحاظ سے دنیا میں نویں مقام پر پہنچ گیا ہے۔ مرکزی وزیر برائے ماحولیات، جنگلات و ماحولیاتی تبدیلی بھوپندر یادو نے اس کامیابی کو پورے ملک کے لیے فخر کا لمحہ قرار دیا oy۔
بھارت نے دسویں سے نواں مقام حاصل کیا
مرکزی وزیر بھوپندر یادو نے سماجی رابطے کے پلیٹ فارم ’ایکس‘ پر لکھا: ’’پچھلے تخمینے میں بھارت دسویں نمبر پر تھا، لیکن اب ہم عالمی سطح پر جنگلاتی رقبے کے لحاظ سے نویں مقام پر پہنچ گئے ہیں۔ سالانہ جنگلاتی رقبے میں اضافے کے لحاظ سے بھی بھارت نے دنیا میں اپنا تیسرا مقام برقرار رکھا ہے۔ ایف اے او کی جانب سے بالی میں عالمی جنگلاتی وسائل کے جائزے (جی ایف آر اے 2025) کا آغاز کیا گیا ہے۔‘‘
مرکزی و ریاستی حکومتوں کی پالیسیوں کا اثر
وزیر بھوپندر یادو نے اس کامیابی کا سہرا مودی حکومت کی جنگلاتی پالیسیوں اور ریاستی سطح پر کیے گئے شجر کاری کے وسیع اقدامات کو دیا۔ انہوں نے کہا کہ یہ کامیابی جنگلات کے تحفظ، افزائش اور مقامی کمیونٹی کی شمولیت کے ذریعے ماحولیاتی توازن برقرار رکھنے کے مقصد سے حکومت کی جاری اسکیموں کا نتیجہ ہے۔
وزیراعظم کی مہم ’ایک پیڑ ماں کے نام‘ نے بڑھایا عوامی شعور
مرکزی وزیر نے مزید کہا کہ وزیراعظم نریندر مودی کے ماحولیاتی مشن ’ایک پیڑ ماں کے نام‘ نے پورے ملک میں عوامی شمولیت کو فروغ دیا ہے۔ ’’وزیر اعظم کے اس پیغام اور ان کی ماحولیات کے تئیں وابستگی نے عوام کو شجر کاری اور ماحول کے تحفظ کی مہم سے جوڑا ہے۔ یہ بڑھتی ہوئی شمولیت ایک سرسبز، پائیدار اور ماحول دوست مستقبل کے لیے اجتماعی ذمہ داری کے جذبے کو مستحکم کر رہی ہے۔‘‘
بھارت کی کامیابی ماحولیاتی قیادت کی علامت
ایف اے او کی رپورٹ میں کہا گیا ہے کہ گزشتہ چند برسوں میں بھارت نے جنگلات کے رقبے میں نمایاں اضافہ کیا ہے۔ یہ پیش رفت نہ صرف ماحولیاتی توازن کی بحالی کے لیے اہم ہے بلکہ یہ بھارت کی عالمی سطح پر بڑھتی ہوئی ماحولیاتی قیادت کو بھی ظاہر کرتی ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
