وزیراعظم نریندر مودی نے جمعرات کو یورپی کونسل کے صدر انٹونیو کوسٹا اور یورپی کمیشن کی صدر اُرسلا وان ڈیر لیئن سے ایک مشترکہ ٹیلیفونک گفتگو کی۔ اس اہم گفتگو میں بھارت اور یورپی یونین کے درمیان مضبوط اسٹریٹجک شراکت داری اور باہمی تعاون کے مختلف شعبوں پر گفتگو ہوئی۔ بھارت اور یورپی یونین کو دنیا کی دو بڑی جمہوری طاقتیں قرار دیتے ہوئے رہنماؤں نے کہا کہ دونوں کے درمیان اعتماد، مشترکہ اقدار اور مشترکہ وژن پر مبنی تعلقات ہیں جو عالمی استحکام اور خوش حالی میں کلیدی کردار ادا کر سکتے ہیں۔
اس گفتگو کے دوران تجارت، ٹیکنالوجی، سرمایہ کاری، اختراع، پائیداری، دفاع، سلامتی اور سپلائی چین کے تحفظ جیسے کلیدی شعبوں میں باہمی تعلقات میں پیش رفت کا خیرمقدم کیا گیا۔ تینوں رہنماؤں نے بھارت-یورپی یونین آزاد تجارتی معاہدہ (FTA) کو جلد از جلد حتمی شکل دینے کے عزم کا اعادہ کیا، ساتھ ہی انڈیا-مڈل ایسٹ-یورپ اکنامک کاریڈور (IMEEC) پر بھی عمل درآمد کو تیز کرنے پر زور دیا۔ وزیراعظم مودی نے فروری میں یورپی کمیشن کے کمشنرز کے تاریخی دورۂ بھارت کا حوالہ دیتے ہوئے آئندہ بھارت-یورپی یونین سربراہی اجلاس کے جلد انعقاد کی تجویز دی اور دونوں یورپی رہنماؤں کو بھارت آنے کی دعوت دی۔
اس دوران علاقائی و عالمی امور پر بھی تفصیلی تبادلۂ خیال ہوا، جن میں یوکرین تنازعے کے خاتمے کی کوششیں بھی شامل ہیں۔ وزیراعظم مودی نے اس موقع پر بھارت کے اس مؤقف کو دہرایا کہ تمام تنازعات کا حل پرامن ذرائع سے ہونا چاہیے اور جلد از جلد امن و استحکام بحال ہونا چاہیے۔ بات چیت کا اختتام اس عزم پر ہوا کہ تینوں رہنما باہمی رابطے میں رہیں گے اور بھارت-یورپی یونین شراکت داری کو مزید مستحکم کرنے کے لیے قریبی تعاون جاری رکھیں گے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
