سیوان لوک سبھا سیٹ پر آر جے ڈی مشکل میں پھنسی ہوئی ہے۔ پارٹی نے جمعرات کو دن بھر سابق ایم پی محمد شہاب الدین کی اہلیہ حنا شہاب کا انتظارکیا۔ لیکن حنا شہاب آر جے ڈی صدر لالو پرساد سے ملنے کے بجائے سیوان کے پرتاپ پور میں واقع اپنی رہائش گاہ پر عید کے موقع پر لوگوں سے ملتی رہیں۔ حنا نے واضح الفاظ میں کہہ دیاکہ وہ بار بار کہہ رہی ہیں کہ وہ سیوان لوک سبھا سیٹ سے آزاد امیدوار کے طور پر الیکشن لڑیں گی۔ تمام قیاس آرائیوں کو ختم کرتے ہوئے حنا شہاب نے ایک بار پھر کہا کہ یہ یقینی ہے کہ وہ آزاد امیدوار کے طور پر الیکشن لڑیں گی۔ میں اب بھی اپنے بیان پر قائم ہوں۔
لیڈروں کی زبان بدلتی رہتی ہے عوام کی نہیں
حنا شہاب کے اس بیان کے بعد اب امید کی جا رہی ہے کہ آر جے ڈی ایک دو دن میں سیوان کی امیدواری پر حتمی فیصلہ لے گی۔ حنا شہاب کے بارے میں آر جے ڈی کا ایک حصہ اعلیٰ قیادت کو مشورہ دے رہا ہے کہ وہ انہیں ساتھ لے کر چلیں۔ جمعرات کو حنا شہاب اپنے گاؤں پرتاپ پور میں دن بھر عید کی مبارکباد دینے میں مصروف رہیں۔ اس دوران جب مختلف قیاس آرائیوں کے حوالے سے ان سے سوال کیا گیا تو حنا شہاب نے کہا کہ میں سیاست دان نہیں ہوں۔ میں ایک عام آدمی ہوں۔ لیڈروں کی زبان بدلتی رہتی ہے عوام کی نہیں۔ ہم نے ایک بار نہیں بلکہ بار بار کہا ہے کہ اس بار میں آزاد حیثیت سے الیکشن لڑوں گی۔
آر جے ڈی ابھی تک انتظار کر رہی ہے
پارٹی ذرائع کے مطابق، پارٹی سیوان کے لیے حنا شہاب کے مثبت جواب کا مزید انتظار کرنے کے موڈ میں ہے۔ اس لوک سبھا الیکشن میں آر جے ڈی 23 سیٹوں پر الیکشن لڑ رہی ہے، لیکن آر جے ڈی ہیڈ کوارٹر نے دو دن پہلے سیوان کو چھوڑ کر تمام سیٹوں پر امیدواروں کے ناموں کا اعلان کردیا جس کے بعد سے یہ قیاس لگایا جانے لگا کہ سیوان سیٹ حنا کے نام ہوگی۔پارٹی قیادت کو حنا کی رضامندی کا انتظار ہے۔ دوسری طرف سیوان صدر کے ایم ایل اے اور اسمبلی کے سابق اسپیکر اودھ بہاری چودھری آر جے ڈی سے اپنا ٹکٹ طے سمجھتے ہوئے اپنی انتخابی مہم میں مصروف ہیں۔ دلچسپ بات یہ ہے کہ آر جے ڈی لیڈر اودھ بہاری چودھری نے میڈیا سے بات چیت کے دوران بتایا کہ انہیں امیدوار بنایا جائے گا۔
عید کے موقع پر آر جے ڈی کے کئی سینئر مسلم لیڈر آر جے ڈی سپریمو لالو پرساد اور تیجسوی یادو سے ملنے 10 سرکلر روڈ پہنچے۔ توقع تھی کہ عید کے بہانے حنا شہاب بھی آر جے ڈی سپریمو سے ملنے پٹنہ آئیں گی۔ حالانکہ اس کے لیے اس نے کوئی وقت نہیں لیاتھا۔لیکن نہ حنا شہاب آئیں اور ناہی ان کا پیغام آیا۔
بھارت ایکسپریس۔
