ممبئی/نئی دہلی: جمعہ کے روز ملکی مارکیٹ میں سونا اور چاندی دونوں کی قیمتوں نے تاریخ کا نیا ریکارڈ بنا دیا۔ چاندی پہلی بار 2 لاکھ روپے فی کلو کی سطح کو عبور کر گئی، جبکہ سونا بھی 1,34,966 روپے فی 10 گرام کے نئی بلند ترین مقام پر پہنچ گیا۔ ماہرین کے مطابق سرمایہ کار محفوظ سرمایہ کاری کی جانب تیزی سے بڑھ رہے ہیں، جس کا براہِ راست اثر قیمتی دھاتوں کی قیمتوں میں تیز رفتار اضافے کی صورت میں دیکھا جا رہا ہے۔ ملٹی کمیٹی ایکسچینج (ایم سی ایکس) کے مطابق، چاندی اس وقت 2,00,510 روپے فی کلو کے آس پاس ٹریڈ کر رہی ہے۔ سونا بھی مضبوط اُچھال کے ساتھ 1,34,966 روپے فی 10 گرام پر پہنچ گیا ہے۔ آج کے سیشن میں سونے میں چاندی کے مقابلے زیادہ تیزی ریکارڈ کی گئی۔
انڈیا بلین اینڈ جیولرز ایسوسی ایشن (آئی بی جے اے) کی نائب صدر اَکشا کمبوج کا کہنا ہے کہ صنعتی پیداوار میں تیزی اور ڈالر کی کمزوری نے چاندی کی قیمتوں کو غیر معمولی رفتار سے اُوپر دھکیلا ہے۔ چاندی کی مانگ سولر انرجی، الیکٹرک گاڑیوں اور سیمی کنڈکٹر انڈسٹری میں تیزی سے بڑھ رہی ہے، جس کے باعث فیوچر مارکیٹ میں بھی مثبت ماحول بنا ہوا ہے۔ دوسری جانب سرمایہ کار عالمی غیر یقینی حالات میں محفوظ اثاثوں کی جانب تیزی سے متوجہ ہو رہے ہیں۔
عالمی تناؤ اور امریکی ٹیرف
امریکی تجارتی پالیسیوں میں سختی، عالمی جیو پولیٹیکل کشیدگی اور مرکزی بینکوں کی جانب سے بڑھتی ہوئی خریداری نے بھی سونا–چاندی کی قیمتوں میں اضافے کو مزید تقویت دی ہے۔ تاریخی رجحانات بھی اس بات کی تصدیق کرتے ہیں کہ دونوں دھاتیں طویل مدتی سرمایہ کاری کے لیے ہمیشہ منافع بخش ثابت ہوئی ہیں۔
کیا قیمتیں گر بھی سکتی ہیں؟
اگرچہ مارکیٹ نئی ریکارڈ سطح پر ہے، لیکن اچانک گراوٹ کا امکان بھی برقرار ہے۔ فزیکل ڈیمانڈ میں کمی، ای ٹی ایف سے سرمایہ نکالنے اور منافع بکنگ کی صورت میں قیمتوں میں کمی آ سکتی ہے۔
سرمایہ کاروں کے لیے مشورہ
ماہرین کا کہنا ہے کہ زیادہ قیمتوں کے باوجود سونا–چاندی ای ٹی ایف میں تھوڑا تھوڑا سرمایہ لگانا بہتر ہے۔ ایک ساتھ بڑی خریداری سے پرہیز کریں۔ طویل مدتی حکمتِ عملی کے ساتھ سرمایہ کاری کریں۔ اس طرح آپ مختصر مدت میں نقصان سے بچ سکتے ہیں اور طویل مدت میں بہتر منافع حاصل کرنے کے امکانات بڑھ جاتے ہیں۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
