نئی دہلی: دہلی کی وزیراعلیٰ ریکھا گپتا نے دیوالی سے قبل دہلی کے عوام کو ایک بڑی خوشخبری دی ہے۔ حکومت دہلی نے گھریلو صارفین کے پانی کے بل پر لیٹ پیمنٹ سرچارج (تاخیر فیس) معاف کرنے کا فیصلہ کیا ہے۔ وزیراعلیٰ نے کہا کہ یہ فیصلہ تاریخی نوعیت کا ہے اور جو صارفین 31 جنوری 2026 تک اپنے بقیہ بل ادا کر دیں گے انہیں سو فیصد رعایت کا فائدہ حاصل ہوگا۔
’’غیر مجاز کنکشن ریگولرائزیشن اسکیم‘‘
ریکھا گپتا نے بتایا کہ دہلی حکومت نے دو اہم عوامی اسکیموں ’’لیٹ پیمنٹ سرچارج معافی یوجنا‘‘ اور ’’غیر مجاز کنکشن ریگولرائزیشن اسکیم‘‘ کا باضابطہ آغاز کر دیا ہے۔ ان کا کہنا تھا کہ یہ دونوں اسکیمیں دہلی کے شہریوں کے لیے بڑی راحت لے کر آئی ہیں اور دہلی کی پانی کی فراہمی اور نظم و نسق کو مزید شفاف، جدید اور عوام دوست بنائیں گی۔
غیر مجاز صارفین کے لیے جرمانہ کم
وزیراعلیٰ ریکھا گپتا نے کہا کہ حکومت نے غیر مجاز گھریلو کنکشن رکھنے والوں کے لیے جرمانہ 25,000 روپے سے گھٹا کر صرف 1,000 روپے کر دیا ہے، جب کہ تجارتی کنکشن کے لیے یہ رقم 61,000 روپے سے کم کر کے 5,000 روپے کر دی گئی ہے۔ انہوں نے کہا کہ یہ قدم لاکھوں صارفین کو پانی کے مستقل نظام سے جوڑے گا اور انہیں حکومت کی آئندہ فلاحی اسکیموں سے فائدہ اٹھانے کا موقع فراہم کرے گا۔
دہلی جل بورڈ کی جدید کاری
دہلی جل بورڈ کی تنظیم نو کے سلسلے میں حکومت نے نئی بلنگ سسٹم، شفاف ریوینیو مینجمنٹ اور 34 نئے ڈویژنوں کے قیام کا اعلان کیا ہے۔ ان اقدامات سے دہلی میں پانی کی تقسیم کا نظام مزید مؤثر، جواب دہ اور تکنیکی اعتبار سے مضبوط بنایا جا رہا ہے۔ اس موقع پر دہلی حکومت کے کابینی وزیر پرویش صاحب سنگھ بھی موجود تھے۔
جدید مسافر سہولت مرکز کا افتتاح
اس سے قبل وزیراعلیٰ ریکھا گپتا نے نئی دہلی ریلوے اسٹیشن پر جدید مسافر سہولت مرکز کے افتتاح کا اعلان بھی کیا۔ انہوں نے کہا کہ مسافروں کی سہولت، سلامتی اور آرام دہ سفر کو مدنظر رکھتے ہوئے یہ مرکز قائم کیا گیا ہے، جو بھارتی ریل کو زیادہ منظم، جدید اور عوامی خدمت پر مبنی بنانے کی سمت ایک اہم قدم ہے۔ وزیراعلیٰ نے اسٹیشن کے معائنہ کے دوران نئی سہولیات کا جائزہ لیا اور مسافروں سے براہ راست گفتگو بھی کی۔ ان کا کہنا تھا کہ وزیراعظم نریندر مودی کی قیادت میں بھارتی ریل آج عوامی خدمت اور سہولت کی پہچان بن چکی ہے۔ نئی دہلی ریلوے اسٹیشن کے اندر کھولا گیا نیا مسافر سہولت مرکز مسافروں کی محفوظ، آرام دہ اور منظم آمد و رفت کو یقینی بنائے گا۔ اس کے ساتھ ہی اسٹیشن کے احاطے کو تین علیحدہ ٹکٹنگ زون میں تقسیم کیا گیا ہے تاکہ پلیٹ فارم پر اچانک بڑھنے والی بھیڑ پر بہتر کنٹرول رکھا جا سکے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
