نئی دہلی: حکومت ہند نے پاسپورٹ بنانے اور اس کی تجدید (رینیو) کی فیس میں اضافہ کر دیا ہے۔ وزارت خارجہ کی جانب سے جاری نوٹیفکیشن کے مطابق نئی فیس یکم جولائی 2026 سے نافذ العمل ہوگی۔ حکومت نے پاسپورٹ قواعد، 1980 میں ترمیم کرتے ہوئے نئی فیس مقرر کی ہے۔ اس کے تحت 36 صفحات والے عام پاسپورٹ کی فیس 1,500 روپے سے بڑھا کر 2,500 روپے کر دی گئی ہے، جبکہ تتکال (فوری) سروس کے تحت یہی فیس 3,500 روپے سے بڑھا کر 5,000 روپے کر دی گئی ہے۔ حکومت کا کہنا ہے کہ ان تبدیلیوں کا مقصد پاسپورٹ خدمات کو مزید مؤثر اور منظم بنانا ہے۔
14 برس بعد پاسپورٹ فیس میں اضافہ
حکومت نے واضح کیا ہے کہ پاسپورٹ فیس میں آخری بار 2012 میں ترمیم کی گئی تھی، جبکہ اب 14 برس بعد دوبارہ فیس میں اضافہ کیا گیا ہے۔ نئے قواعد کے تحت یکم جولائی 2026 سے پاسپورٹ کی نئی فیس نافذ ہوگی، جس کے بعد بعض زمروں میں پاسپورٹ بنوانے پر درخواست گزاروں کو 2,000 روپے تک اضافی رقم ادا کرنی پڑ سکتی ہے۔ اس سلسلے میں حکومت نے باضابطہ نوٹیفکیشن جاری کر دیا ہے۔ نئی شرحیں نافذ ہونے کے بعد نیا پاسپورٹ جاری کرانے، پاسپورٹ کی تجدید (رینیول) اور دیگر متعلقہ خدمات کے لیے نظرثانی شدہ فیس ادا کرنا ہوگی۔ وزارتِ خارجہ کے مطابق پاسپورٹ قواعد، 1980 کے تحت موجود پرانی فیس کی فہرست (شیڈول-IV) کو ختم کرکے نئی فیس کی فہرست نافذ کر دی جائے گی۔ وزارت نے کہا ہے کہ یکم جولائی 2026 سے تمام پاسپورٹ خدمات پر نئی فیس کا اطلاق ہوگا۔
مختلف زمروں کے لیے نئی فیس
نئی شرحوں کے مطابق:
36 صفحات والا عام پاسپورٹ: 1,500 روپے سے بڑھا کر 2,500 روپے
36 صفحات والا تتکال پاسپورٹ: 3,500 روپے سے بڑھا کر 5,000 روپے
60 صفحات والا عام پاسپورٹ: 2,000 روپے سے بڑھا کر 3,500 روپے
60 صفحات والا تتکال پاسپورٹ: 4,000 روپے سے بڑھا کر 6,000 روپے
اسی طرح اگر پاسپورٹ گم ہو جائے یا خراب ہو جائے اور نیا جاری کرانا پڑے تو اس کی فیس میں بھی اضافہ کیا گیا ہے۔ اس کے علاوہ پولیس کلیئرنس سرٹیفکیٹ (PCC)، سرنڈر سرٹیفکیٹ اور گلوبل انٹری پروگرام جیسی خدمات کی فیس 500 روپے سے بڑھا کر 750 روپے کر دی گئی ہے۔
بچوں اور بزرگ شہریوں کے لیے رعایت
حکومت نے 8 سال تک کے بچوں اور 60 سال یا اس سے زائد عمر کے بزرگ شہریوں کو نئے پاسپورٹ کے اجرا پر فیس میں 10 فیصد رعایت دینے کا اعلان کیا ہے۔ تاہم یہ رعایت صرف نئے پاسپورٹ پر دستیاب ہوگی، دوبارہ اجرا (ری ایشو) کی صورت میں اس کا اطلاق نہیں ہوگا۔ نئے قواعد کے مطابق 15 سے 18 سال کے وہ نابالغ درخواست گزار جو بالغوں کے زمرے میں درخواست دیتے ہیں، ان پر بھی بالغوں والی ہی فیس لاگو ہوگی۔ پاسپورٹ کی مدتِ اعتبار میں کوئی تبدیلی نہیں کی گئی ہے۔ بالغ افراد کا پاسپورٹ بدستور 10 سال کے لیے کارآمد رہے گا جبکہ بچوں کا پاسپورٹ پانچ سال یا ان کے 18 برس کی عمر مکمل ہونے تک، جو بھی پہلے ہو، مؤثر رہے گا۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
