ایئر انڈیا نے 12 جون کو احمد آباد میں پیش آئے افسوسناک AI-171 طیارہ حادثے کے بعد اپنے بیان میں کہا ہے کہ حادثے میں شامل بوئنگ 787-8 ڈریم لائنر دنیا کے محفوظ ترین طیاروں میں شمار ہوتا ہے۔ کمپنی نے پارلیمنٹ کی پبلک اکاؤنٹس کمیٹی (PAC) کو دیے گئے اپنے جواب میں کہا کہ دنیا بھر میں اس وقت 1,000 سے زائد ڈریم لائنر طیارے کامیابی سے اپنی سروس دے رہے ہیں۔
احمد آباد کا اندوہناک حادثہ،260 ہلاکتیں
یہ بیان اس وقت سامنے آیا ہے جب 12 جون کو ایئر انڈیا کی لندن جانے والی پرواز AI-171، سردار ولبھ بھائی پٹیل انٹرنیشنل ایئرپورٹ سے پرواز بھرنے کے چند لمحوں بعد ہی احمد آباد کے میگھانی نگر میں واقع بی جے میڈیکل کالج کے ہاسٹل پر جا گری۔ اس حادثے میں 241 مسافر اور عملے کے ارکان سمیت 260 افراد جاں بحق ہوئے، جن میں میڈیکل کالج کے 19 طلباء بھی شامل تھے۔
آفیشل انکوائری رپورٹ کا انتظار
یہ اجلاس دراصل ہوائی اڈوں پر عائد فیسوں کے بارے میں گفتگو کے لیے طے پایا تھا، مگر حادثے کی سنگینی کے باعث نشست کا ماحول سنجیدہ اور تناؤ سے بھر گیا۔ ایئر انڈیا نے کہا: کمپنی اس حادثے سے گہرے صدمے میں ہے اور آفیشل انکوائری رپورٹ کا انتظار کررہی ہے۔
PAC اجلاس میں شرکت کرنے والے اعلیٰ حکام
پبلک اکاؤنٹس کمیٹی کی اس اہم میٹنگ میں ایئر انڈیا کے سی ای او ولسن کیمبل نے شرکت کی۔ ان کے ساتھ وزارت شہری ہوابازی (MoCA)، ڈائریکٹوریٹ جنرل آف سول ایوی ایشن (DGCA)، ایئرپورٹ اکنامک ریگولیٹری اتھارٹی (AERA)، ایئرپورٹس اتھارٹی آف انڈیا (AAI)، اور بیورو آف سول ایوی ایشن سیکیورٹی (BCAS) کے اعلیٰ حکام بھی موجود تھے۔ اس کے علاوہ، انڈیگو، آکاسا ایئر اور دیگر ایئرلائنز کے سینئر نمائندوں نے بھی شرکت کی۔
ڈی جی سی اے کی کارکردگی پر شک و شبہ
اجلاس میں شامل کئی ارکانِ پارلیمنٹ نے ایئرلائن کمپنیوں سے حفاظتی طریقہ کار پر وضاحت طلب کی اور BCAS سے فوری آڈٹ کا مطالبہ کیا۔ اراکین نے DGCA کی نگرانی اور کارکردگی پر سوالات اٹھائے، اور حالیہ حفاظتی کوتاہیوں پر تشویش ظاہر کی۔ اس کے علاوہ، پہلگام حملے کے بعد کرایوں میں بے تحاشہ اضافے کو بھی ریگولیٹری اداروں کی ناکامی قرار دیا گیا۔
تحقیقاتی ٹیم میں ماہرین کی شمولیت پر سوال
پی اے سی میں اراکین نے یہ بھی سوال اٹھایا کہ طیارہ حادثے کی تحقیقاتی ٹیم میں کن ماہرین کو شامل کیا گیا ہے؟ اور کیا کسی بین الاقوامی ماہرِ ہوابازی سے مشورہ یا شراکت کی گئی ہے؟
AAIB نے ابتدائی رپورٹ وزارت کو سونپی
ایئرکرافٹ ایکسیڈنٹ انویسٹیگیشن بیورو (AAIB) نے حادثے کی ابتدائی رپورٹ وزارت شہری ہوابازی کو منگل کے روز سونپ دی ہے۔ ذرائع کے مطابق، AAIB امریکی ادارہ “نیشنل ٹرانسپورٹیشن سیفٹی بورڈ” (NTSB) کے ساتھ مل کر کام کر رہا ہے۔ طیارے کے ملبے سے دونوں بلیک باکس (CVR اور FDR) برآمد ہونے کے بعد تفتیش میں پیش رفت ہوئی ہے۔ 13 جون کو کاک پٹ وائس ریکارڈر (CVR) جبکہ 16 جون کو فلائٹ ڈیٹا ریکارڈر (FDR) برآمد ہوا۔ 24 جون کو دونوں بلیک باکسز کو فضائیہ کے ذریعے دہلی پہنچایا گیا۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
