Goa club fire incident: گواکلب آتشزدگی حادثہ: ’دہلی حکومت کھڑی ہے متاثرہ خاندان کے ساتھ‘ ،منوج تیواری کا اظہارِ تعزیت

گوا کے ایک کلب میں پیش آنے والے افسوسناک آتش زدگی کے واقعے نے پورے ملک کو غمزدہ کر دیا ہے۔ اس دل خراش حادثے میں جان گنوانے والے سیاحوں میں شمال مشرقی دہلی لوک سبھا حلقے سے تعلق رکھنے والے ایک ہی خاندان کے چار افراد شامل تھے، جو اصل طور پر اتراکھنڈ کے رہنے والے تھے۔ اس سانحے نے نہ صرف متاثرہ خاندان بلکہ پورے علاقے کو سوگ میں مبتلا کر دیا ہے۔ حادثے کے بعد سیاسی و سماجی حلقوں کی جانب سے مسلسل تعزیت اور ہمدردی کا اظہار کیا جا رہا ہے۔ آتشزدگی  میں جاں بحق ہونے والوں کی تیرہویں کے موقع پر رکن پارلیمنٹ منوج تیواری اور دہلی حکومت کے وزیر کپل مشرا متاثرہ خاندان کے گھر پہنچے اور اہلِ خانہ سے ملاقات کی۔ دونوں لیڈروں نے غمزدہ افراد سے بات چیت کی، ان کے دکھ میں شریک ہوئے اور انہیں حوصلہ دینے کی کوشش کی۔

حادثہ انتہائی ہولناک اور دل دہلا دینے والا

منوج تیواری نے اس موقع پر کہا کہ یہ حادثہ انتہائی ہولناک اور دل دہلا دینے والا تھا، جس کا دکھ الفاظ میں بیان کرنا ممکن نہیں۔ انہوں نے کہا کہ اس مشکل گھڑی میں وہ اور دہلی حکومت پوری طرح متاثرہ خاندان کے ساتھ کھڑے ہیں۔ انہوں نے اس بات پر زور دیا کہ حکومت کی جانب سے ہر ممکن مدد فراہم کی جائے گی تاکہ خاندان کو کسی بھی طرح کی دشواری کا سامنا نہ کرنا پڑے۔

کپل مشرا نے بھی کیا تعزیت کا اظہار

دہلی حکومت کے وزیر کپل مشرا نے بھی تعزیت کا اظہار کرتے ہوئے کہا کہ ایک ہی خاندان کے چار افراد کا اس طرح اچانک دنیا سے چلے جانا ناقابلِ تلافی نقصان ہے۔ انہوں نے یقین دلایا کہ دہلی حکومت نہ صرف مالی بلکہ انتظامی اور قانونی سطح پر بھی ہر ممکن تعاون کرے گی۔متاثرہ خاندان کے افراد نے لیڈروں کی آمد اور ہمدردی پر شکریہ ادا کیا اور کہا کہ اس غم کی گھڑی میں حکومت اور عوام کی جانب سے ملنے والا تعاون ان کے لیے بڑا سہارا ہے۔ علاقے کے مقامی لوگوں نے بھی اس سانحے پر گہرے رنج و غم کا اظہار کیا ۔  واضح رہے کہ گوا کلب میں پیش آنے والے اس حادثے کی تحقیقات جاری ہیں۔

بھارت ایکسپریس اردو۔