نئی دہلی: مرکزی وزیر داخلہ اور کوآپریشن کے وزیر امت شاہ 24 جولائی کو قومی کوآپریٹو پالیسی 2025 کا اعلان کریں گے۔ یہ اعلان دہلی میں واقع اٹل اکشے اُورجا بھون میں ہونے والے ایک اہم پروگرام میں کیا جائے گا۔ نئی پالیسی کو ملک میں کوآپریٹو تحریک کے لیے آئندہ دو دہائیوں (2025 تا 2045) کے لیے ایک سنگ میل مانا جا رہا ہے۔ یہ پالیسی 2002 میں جاری کی گئی پہلی قومی کوآپریٹو پالیسی کے بعد دوسرا اہم فریم ورک ہے۔ نئی پالیسی کا مقصد دیہی ترقی، روزگار کے مواقع، اور شفاف انتظام کو فروغ دینا ہے۔ اس کا وژن ہے: سہکاری سے خوشحالی یعنی تعاون کے ذریعہ ترقی۔
پالیسی کی تیاری
اس پالیسی کو تیار کرنے کے لیے 48 رکنی قومی سطح کی کمیٹی تشکیل دی گئی تھی، جس کی سربراہی سابق مرکزی وزیر سریش پربھاکر پربھو نے کی۔ کمیٹی نے 17 اجلاس اور 4 علاقائی ورکشاپس (احمد آباد، بنگلورو، گڑگاؤں، پٹنہ) منعقد کیں۔ مختلف سطحوں کے کوآپریٹو اداروں، مرکزی و ریاستی وزارتوں، ماہرین تعلیم اور اسٹیک ہولڈرز سے کل 648 تجاویز موصول ہوئیں، جنہیں پالیسی میں شامل کیا گیا ہے۔
نئی پالیسی کے اہم اہداف
کوآپریٹو اداروں کو مزید جامع (inclusive) اور پیشہ ورانہ بنانا۔ مستقبل کے لیے تیار کرنا اور روزگار کے نئے مواقع پیدا کرنا، خصوصاً دیہی علاقوں میں۔ ٹیکنالوجی اور گلوبلائزیشن کے تقاضوں کو مدِنظر رکھتے ہوئے اداروں کی جدید کاری۔ وکست بھارت 2047 کے ہدف کو حاصل کرنے میں کوآپریٹو سیکٹر کا کلیدی رول۔
تقریب میں شامل اہم شخصیات
پالیسی ڈرافٹنگ کمیٹی کے اراکین، قومی کوآپریٹو یونینز کے سربراہان، وزارت کوآپریشن کے سینئر افسران نیشنل کوآپریٹو ڈیولپمنٹ کارپوریشن (NCDC)، نیشنل کونسل آف کوآپریٹو ٹریننگ (NCCT) اور بیکنٹھ میہتا انسٹی ٹیوٹ آف کوآپریٹو مینجمنٹ (VAMNICOM) کے نمائندگان اس تقریب میں شامل ہوں گے۔ امت شاہ کے اعلان کے بعد یہ پالیسی ملک بھر میں کوآپریٹیو اداروں کو ایک نئی سمت دینے کا کام کرے گی اور سب کا ساتھ، سب کا وکاس کے وژن کو زمینی حقیقت میں بدلنے کی کوشش کا حصہ بنے گی۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
