نئی دہلی: مرکزی وزیرداخلہ اور وزیر تعاون امت شاہ نے معروف صحافی اور دی اسام ٹریبیون گروپ کے ایڈیٹر و منیجنگ ڈائریکٹر پی جی بروآ کے انتقال پر گہرے رنج و غم کا اظہار کیا ہے۔ امت شاہ نے سوشل میڈیا پلیٹ فارم ’ایکس‘ پر جاری اپنے تعزیتی پیغام میں کہا کہ پی جی بروآ کے انتقال کی خبر سے انہیں شدید دکھ پہنچا ہے۔ انہوں نے کہا کہ صحافت کے ذریعے عوامی مسائل کو عام لوگوں تک پہنچانے اور آسام کی تہذیب و ثقافت کو فروغ دینے کے لیے پی جی بروآ کی خدمات ہمیشہ لوگوں کو متاثر کرتی رہیں گی اور آئندہ نسلوں کے لیے باعث تحریک بنی رہیں گی۔
Pained by the demise of PG Baruah Ji, the editor and managing director of The Assam Tribune group. His efforts to ensure that issues reach the common people and promote Assam’s culture through journalism will continue to inspire people. Sincerest condolences to his family…
— Amit Shah (@AmitShah) December 15, 2025
مرکزی وزیر نے اپنے پیغام میں کہا: ’’دی اسام ٹریبیون گروپ کے ایڈیٹر اور منیجنگ ڈائریکٹر پی جی بروآ جی کے انتقال سے دلی صدمہ پہنچا ہے۔ صحافت کے ذریعے عوامی مسائل کو اجاگر کرنے اور آسام کی ثقافت کو فروغ دینے کے لیے ان کی کوششیں ہمیشہ لوگوں کو ترغیب دیتی رہیں گی۔‘‘ امت شاہ نے مرحوم کے اہل خانہ، دی اسام ٹریبیون گروپ اور ان کے چاہنے والوں کے ساتھ دلی ہمدردی اور تعزیت کا اظہار کیا۔ واضح رہے کہ پی جی بروآ کا شمار آسام کی صحافت کی نمایاں شخصیات میں ہوتا تھا، جنہوں نے طویل عرصے تک غیر جانبدار اور عوام دوست صحافت کے فروغ میں اہم کردار ادا کیا۔
2018 میں پدم شری سے نوازے گئے تھے بروآ
پی جی بروآ 1932 میں ڈبروگڑھ میں پیدا ہوئے تھے۔ وہ معروف اخبار ”دی آسام ٹریبیون“ کے بانی رادھا گووند بروآ کے فرزند تھے۔ انہوں نے 1966 میں اخبار کے ایڈیٹر کی حیثیت سے ذمہ داریاں سنبھالیں اور کئی دہائیوں تک ادارے کی قیادت کی۔ بعد ازاں وہ آسام ٹریبیون گروپ کے چیئرمین بنے اور ادارے کو قومی سطح پر ایک معتبر شناخت دلائی۔ پی جی بروآ کو ادب اور تعلیم کے میدان میں نمایاں خدمات کے اعتراف میں 2018 میں پدم شری سے نوازا گیا تھا۔ وہ مختلف سماجی و ثقافتی تنظیموں سے وابستہ رہے اور شوقیہ تھیٹر میں بھی سرگرم کردار ادا کیا۔ آسام ساہتیہ سبھا اور ڈاکٹر بی بوروا کینسر انسٹی ٹیوٹ سمیت کئی اداروں نے انہیں اعزازات سے نوازا۔ ان کے انتقال سے ایک عہد کا خاتمہ ہو گیا ہے، مگر ان کی خدمات آنے والی نسلوں کے لیے مشعلِ راہ بنی رہیں گی۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
