مرکزی وزیر داخلہ امت شاہ نے سنٹرل انڈسٹریل سکیورٹی فورس (سی آئی ایس ایف) کے یومِ تاسیس کے موقع پر فورس کے تمام اہلکاروں کو دلی مبارکباد دی اور قوم کے تئیں ان کی وابستگی، پیشہ ورانہ مہارت اور وطن سے محبت پر مبنی خدمات کی بھرپور تعریف کی۔ وزیر داخلہ امت شاہ نے سوشل میڈیا پلیٹ فارم ‘ایکس’ پر اپنے پیغام میں لکھا کہ سی آئی ایس ایف کے اہلکاروں کو یومِ تاسیس کی دل سے مبارکباد۔ انہوں نے کہا کہ چاہے ملک کی اہم تنصیبات اور عمارتوں کی حفاظت کا معاملہ ہو یا کسی بھی بحران کے وقت ملک کو محفوظ رکھنے کی ذمہ داری، سی آئی ایس ایف کے جوان ہمیشہ پوری لگن اور فرض شناسی کے ساتھ اپنے فرائض انجام دیتے ہیں۔انہوں نے مزید کہا کہ فورس کے اہلکاروں کا یہ جذبہ سچی حب الوطنی اور پیشہ ورانہ اخلاقیات کی بہترین مثال ہے۔ امت شاہ نے اس موقع پر ملک کے لیے عظیم قربانی دینے والے شہداء کو بھی خراجِ عقیدت پیش کیا اور کہا کہ ان کی قربانیاں ہمیشہ یاد رکھی جائیں گی۔
وزیر اعظم مودی نے بھی دی مبارکباد
وزیر اعظم نریندر مودی نے بھی سی آئی ایس ایف کے تمام اہلکاروں کو یومِ تاسیس کی دل سے مبارکباد دی۔ پی ایم مودی نے سوشل میڈیا پلیٹ فارم ‘ایکس’ پر لکھا کہ سنٹرل انڈسٹریل سکیورٹی فورس (CISF) کے تمام اہلکاروں کو یومِ تاسیس کی دلی مبارکباد۔ انہوں نے کہا کہ اپنے مضبوط عزم، نظم و ضبط اور لگن کے لیے معروف سی آئی ایس ایف ملک بھر میں اہم بنیادی ڈھانچے کی حفاظت میں اہم کردار ادا کر رہا ہے۔ فرائض کے تئیں ان کی غیر متزلزل وابستگی بھارت کی سلامتی اور ترقی میں اہم تعاون فراہم کرتی ہے۔
ارجن رام میگھوال نے بہادر جوانوں کو سلام پیش کیا
مرکزی وزیر ارجن رام میگھوال نے ‘ایکس’ پر لکھا کہ سنٹرل انڈسٹریل سکیورٹی فورس کے یومِ تاسیس کے موقع پر مادرِ وطن کے تمام بہادر جوانوں کو دلی مبارکباد اور نیک تمنائیں۔ انہوں نے کہا کہ سرکاری شعبے کے اداروں اور ملک کی داخلی سلامتی کو مضبوط بنانے والے آپ جیسے بہادر سپوتوں پر پورے ملک کو ہمیشہ فخر رہے گا۔ آپ تمام جری جوانوں کو دل سے سلام۔ جے ہند!
دہلی کی وزیر اعلیٰ ریکھا گپتا کا پیغام
دہلی کی وزیر اعلیٰ ریکھا گپتا نے بھی ‘ایکس’ پر اپنے پیغام میں لکھا کہ ملک کی اسٹریٹیجک تنصیبات اور سلامتی کے چوکس محافظ، سنٹرل انڈسٹریل سکیورٹی فورس کے یومِ تاسیس پر تمام بہادر جوانوں اور ان کے اہل خانہ کو دلی مبارکباد۔ انہوں نے کہا کہ نظم و ضبط، فرض شناسی اور خدمت کے عزم کے ساتھ آپ ملک کی سالمیت اور سلامتی کی مضبوط ڈھال بن کر کھڑے ہیں۔ مادرِ وطن کی خدمت میں آپ کی بہادری اور ناقابلِ تسخیر حوصلے کو سلام۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
