مہاراشٹر کے دارالحکومت ممبئی سے ایک نہایت دردناک اور حیران کن خبر سامنے آئی ہے۔ شہر کے پائیدھونی علاقے (جے جے روڈ کے قریب) میں مبینہ طور پر فوڈ پوائزننگ کے باعث ایک ہی خاندان کے چار افراد تڑپ تڑپ کر جاں بحق ہو گئے۔ مرنے والوں میں میاں بیوی اور ان کی دو معصوم بیٹیاں شامل ہیں۔ دعویٰ کیا جا رہا ہے کہ خاندان نے رات کے کھانے میں چکن پلاؤ (بریانی) کھایا تھا اور اس کے کچھ دیر بعد تربوز کھایا، جس کے بعد ان کی طبیعت بگڑنے لگی۔
رات کا پورا واقعہ
پولیس کے مطابق، متوفین کی شناخت 40 سالہ عبداللہ ڈوکاڈیا، ان کی 35 سالہ اہلیہ نسرین ڈوکاڈیا اور دو بیٹیوں عائشہ (16 سال) اور زینب (13 سال) کے طور پر ہوئی ہے۔ بتایا جا رہا ہے کہ 25 اپریل کی رات عبداللہ کے گھر 5 قریبی رشتہ دار آئے تھے۔رات تقریباً 10:30 بجے سب نے مل کر باہر سے منگوایا گیا چکن پلاؤ کھایا۔ کھانا کھانے کے بعد رشتہ دار اپنے اپنے گھروں کو واپس چلے گئے۔ پولیس کو دیے گئے بیان کے مطابق، مہمانوں کے جانے کے بعد رات 1:00 سے 1:30 بجے کے درمیان عبداللہ کے خاندان (چاروں افراد) نے تربوز کھایا۔ دعویٰ ہے کہ یہ تربوز انہی رشتہ داروں نے لایا تھا۔
ایک ایک کر کے دم توڑا
تربوز کھانے کے چند گھنٹوں بعد، اتوار کی صبح 5:30 سے 6:00 بجے کے درمیان چاروں افراد کو قے، دست اور چکر آنے لگے۔ خاندان نے پہلے اپنے فیملی ڈاکٹر سے مشورہ لیا اور جب حالت زیادہ بگڑنے لگی تو انہیں جے جے اسپتال (ممبئی) میں داخل کرایا گیا۔علاج کے دوران صبح 10:15 بجے 13 سالہ چھوٹی بیٹی زینب کا انتقال ہو گیا۔ اس کے بعد ایک ایک کر کے بیوی اور بڑی بیٹی نے بھی دم توڑ دیا۔ سب سے آخر میں اتوار کی رات تقریباً 10:30 بجے خاندان کے سربراہ عبداللہ ڈوکاڈیا بھی انتقال کر گئے۔
کیا تربوز تھا موت کی وجہ؟
یہ معاملہ اس لیے بھی سنگین ہو گیا ہے کیونکہ وہ 5 رشتہ دار جنہوں نے رات میں صرف چکن پلاؤ کھایا تھا، انہیں کوئی مسئلہ نہیں ہوا۔ طبیعت صرف ان 4 افراد کی بگڑی جنہوں نے بعد میں تربوز کھایا تھا۔ ممبئی پولیس کے ایک سینئر افسر کے مطابق، معاملہ نہایت سنجیدہ ہے۔ پائیدھونی پولیس نے فی الحال حادثاتی موت (ADR) کا مقدمہ درج کر کے تفتیش شروع کر دی ہے۔کیا کھانے میں کوئی زہریلا مادہ موجود تھا، تربوز خراب تھا، یا یہ دو مختلف غذاؤں کو ایک ساتھ کھانے کا مہلک نتیجہ تھا؟ اس کا انکشاف اب پوسٹ مارٹم اور ہسٹوپیتھولوجی رپورٹ آنے کے بعد ہی ہو سکے گا۔ ماہرینِ صحت کے مطابق، گرمی کے موسم میں فوڈ پوائزننگ کا خطرہ کافی بڑھ جاتا ہے، اس لیے کھانے پینے میں خاص احتیاط ضروری ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
