پاکستان کے پشاور میں پیر کی صبح اس وقت خوف و ہراس پھیل گیا ،جب نیم فوجی ادارے فرنٹیئر کور (ایف سی) کے ہیڈکوارٹر کے قریب اچانک دھماکوں اور فائرنگ کی آوازیں گونج اٹھیں۔ بین الاقوامی خبر رساں ادارے رائٹرز کے مطابق مسلح حملہ آوروں نے صبح تقریباً 8 بج کر 10 منٹ پر ایف سی کے مرکز کو نشانہ بنایا۔ فائرنگ کی آوازیں سنتے ہی پولیس اور دیگر سیکورٹی فورسز فوری طور پر جائے وقوعہ پر پہنچ گئیں اور پورے علاقے کو گھیرے میں لے لیا۔ عینی شاہدین سمیت سوشل میڈیا پلیٹ فارم ایکس پر متعدد یوزر نے لکھا کہ انہوں نے ایف سی ہیڈکوارٹر کی سمت سے ’’بم دھماکے‘‘ جیسی زوردار آوازیں سنیں، جن کے بعد علاقے میں بھگدڑ مچ گئی۔ حملے کے فوراً بعد شہر کے اہم مقامات پر سیکورٹی بڑھا دی گئی ،جب کہ تمام داخلی و خارجی راستوں کو بند کر دیا گیا۔
پاکستانی ٹی وی چینل جیو نیوز کے مطابق حملہ آوروں نے پہلے ایف سی ہیڈکوارٹر کے گیٹ پر حملہ کیا ،جہاں ایک خودکش بمبار نے خود کو دھماکے سے اڑا لیا۔ دھماکے کے فوراً بعد دیگر حملہ آوروں نے اندھا دھند فائرنگ شروع کر دی، جس سے حالات مزید سنگین ہو گئے۔ سیکورٹی ذرائع کا کہنا ہے کہ جوابی کارروائی میں تین حملہ آوروں کو موقع پر ہی ہلاک کر دیا گیا۔
سیکورٹی فورسز کے مطابق اس واقعے میں دو بڑے دھماکے کئے گئے، جن کے بعد وقفے وقفے سے فائرنگ کی آوازیں بھی سنی گئیں۔ حملے کے فوری بعد سنہری مسجد روڈ کو مکمل طور پر بند کر دیا گیا، جب کہ شہریوں کو گھروں میں رہنے کی ہدایت کی گئی۔ سوشل میڈیا پر گردش کرنے والی ویڈیوز میں لگاتار فائرنگ کی آوازیں صاف طور پر سنی جا سکتی ہیں، جب کہ دھماکے کے بعد اٹھنے والا دھواں بھی دیکھا گیا۔
سرکاری سطح پر تاحال کسی جانی نقصان کی تصدیق نہیں ہوئی، قابل ذکر بات یہ ہے کہ مختلف ذرائع کا کہنا ہے کہ جائے وقوعہ کے ارد گرد موجود افراد میں شدید خوف پایا جاتا ہے اور عمارت کے اندر موجود اہلکاروں کو محفوظ مقامات پر منتقل کر دیا گیا ہے۔ حکومتی ترجمان نے کہا ہے کہ حملے کی تحقیقات جاری ہیں اور جلد ہی اس کے پس منظر اور ذمہ داران کے حوالے سے تفصیلات سامنے لائی جائیں گی۔ دوسری جانب شہریوں نے حکومت سے مطالبہ کیا ہے کہ پشاور اور میں بڑھتی دہشت گرد کارروائیوں پر قابو پایا جائے، تاکہ عوام کو امن کی فضا دوبارہ نصیب ہو سکے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
