نئی دہلی:نیپال کے دارالحکومت کھٹمنڈو کے تری بھوون انٹرنیشنل ایئرپورٹ پر پیر کی صبح ایک بڑا فضائی حادثہ اُس وقت ٹل گیا، جب ترکیہ ایئرلائنز کے ایک طیارے کے لینڈنگ گیئر میں اچانک آگ لگ گئی۔ واقعے کے بعد ایئرپورٹ پر ہنگامی صورتحال پیدا ہوگئی اور تقریباً 98 منٹ تک تمام پروازوں کی آمد و رفت معطل رہی۔نیپال کی میڈیا رپورٹس کے مطابق یہ واقعہ اُس وقت پیش آیا جب ترکیہ ایئرلائنز کا وائیڈ باڈی طیارہ لینڈنگ کے بعد ٹیکسی وے براوو کی طرف بڑھ رہا تھا۔ اسی دوران طیارے کے دائیں جانب والے مین لینڈنگ گیئر کے ایک ٹائر میں آگ بھڑک اٹھی۔ واقعے کے فوراً بعد ایئرپورٹ حکام نے احتیاطی اقدام کے طور پر صبح 6 بج کر 34 منٹ پر فلائٹ آپریشن معطل کر دیا، جس کے بعد صبح 8 بج کر 12 منٹ پر خدمات بحال کی گئیں۔
ターキッシュエアラインズのA330-300がカトマンズ着陸時にメインギアから白煙が確認され緊急脱出 pic.twitter.com/juCNbqkAJT
— sky-budgetスカイバジェット (@skybudget) May 11, 2026
دی کھٹمنڈو پوسٹ کے مطابق نیپال سول ایوی ایشن اتھارٹی کے اسسٹنٹ ترجمان گیانیندر بھول نے بتایا کہ طیارہ ٹیکسی وے پر رک گیا تھا، جس کے باعث رن وے اور ٹیکسی وے دونوں متاثر ہوئے۔ حکام کے مطابق تقریباً 30 فیصد طیارے رن وے پر جب کہ 70 فیصد ٹیکسی وے پر کھڑے رہے، جس کی وجہ سے تمام ملکی اور بین الاقوامی پروازیں عارضی طور پر روک دی گئیں۔رپورٹس کے مطابق طیارے میں مجموعی طور پر 288 افراد سوار تھے، جن میں 11 عملے کے ارکان شامل تھے۔ خوش قسمتی سے تمام مسافروں کو محفوظ طریقے سے ایمرجنسی سلائیڈز کے ذریعے باہر نکال لیا گیا۔ ایئرلائن کی جانب سے فراہم کردہ معلومات کے مطابق دو مسافروں کی انگلیوں میں معمولی چوٹیں آئیں، تاہم کوئی جانی نقصان نہیں ہوا۔ابتدائی تحقیقات میں بتایا گیا ہے کہ آگ ممکنہ طور پر ہارڈ لینڈنگ، ٹائر پریشر میں خرابی یا کسی تکنیکی مسئلے کی وجہ سے لگی ہو سکتی ہے، تاہم اصل سبب جاننے کے لیے تفصیلی تحقیقات جاری ہیں۔ حکام نے طیارے کو فی الحال گراؤنڈ کر دیا ہے تاکہ مکمل تکنیکی معائنہ کیا جا سکے۔
ایئرپورٹ انتظامیہ نے متاثرہ مسافروں کے لیے ہوٹل میں قیام کا انتظام کیا ہے جبکہ جن مسافروں کو دیگر مقامات پر روانہ ہونا تھا، ان کے لیے متبادل پروازوں کا بندوبست بھی کیا جا رہا ہے۔نیپال سول ایوی ایشن اتھارٹی کے مطابق ایک مینٹیننس، ریپیئر اینڈ اوورہال (ایم آر او)ٹیم واقعے کی جانچ کرے گی، جبکہ فلائٹ سیفٹی اسٹینڈرڈ ڈپارٹمنٹ بھی تکنیکی پہلوؤں کا تفصیلی جائزہ لے گا۔ ترجمان گیانیندر بھول نے کہا کہ حادثے کے تمام پہلوؤں کی گہرائی سے تفتیش شروع کر دی گئی ہے تاکہ مستقبل میں ایسے واقعات سے بچا جا سکے۔واضح رہے کہ ترکیش ایئرلائنز استنبول سے نیپال کے لیے ہر ہفتے پانچ پروازیں چلاتی ہے اور یہ روٹ جنوبی ایشیا اور یورپ کے درمیان اہم فضائی رابطوں میں شمار کیا جاتا ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
