وزیر اعظم نریندر مودی۔
تل ابیب: بھارت کے وزیر اعظم نریندر مودی نے بدھ کے روز کہا کہ بھارت نے بھی طویل عرصے تک دہشت گردی کا درد جھیلا ہے اور عالمی دہشت گردی کے خلاف جنگ میں بھارت پوری مضبوطی اور اعتماد کے ساتھ اسرائیل کے شانہ بشانہ کھڑا ہے۔
اسرائیل کی پارلیمنٹ کنیست میں اپنے تاریخی خطاب کے دوران وزیر اعظم مودی نے 7 اکتوبر کو ہونے والے حماس کے حملے میں جان گنوانے والوں اور متاثرہ خاندانوں کے تئیں گہری تعزیت کا اظہار کیا۔ انہوں نے کہا کہ وہ بھارت کے عوام کی جانب سے تعزیت اور یکجہتی کا پیغام لے کر آئے ہیں۔
وزیر اعظم نے کہا، ’’ہم آپ کے درد کو سمجھتے ہیں اور آپ کے غم میں برابر کے شریک ہیں۔ بھارت اس مشکل وقت میں اور مستقبل میں بھی مکمل یقین کے ساتھ اسرائیل کے ساتھ کھڑا رہے گا۔ اسرائیل نے بھی طویل عرصے تک دہشت گردی کا سامنا کیا ہے۔‘‘ انہوں نے کہا کہ کسی بھارتی وزیر اعظم کا اسرائیلی پارلیمنٹ سے یہ پہلا خطاب ہے، جس کے دوران ارکانِ پارلیمنٹ نے متعدد مرتبہ تالیاں بجا کر ان کا خیر مقدم کیا۔
اپنے خطاب میں وزیر اعظم مودی نے غزہ میں امن کے قیام کی کوششوں کا ذکر کرتے ہوئے کہا کہ اقوام متحدہ کی سلامتی کونسل کی حمایت یافتہ غزہ امن پہل مسئلے کے حل کی سمت ایک اہم راستہ فراہم کرتی ہے۔ انہوں نے واضح کیا کہ بھارت اس امن اقدام کی مکمل حمایت کرتا ہے اور اس کے ذریعے فلسطین مسئلے سمیت خطے میں منصفانہ اور پائیدار امن کی امید کی جا سکتی ہے۔ وزیر اعظم نے کہا کہ امید کو زندہ رکھنا ضروری ہے اور تمام عالمی کوششیں دانشمندی، جرات اور انسانیت کے اصولوں پر مبنی ہونی چاہئیں۔
انہوں نے اسرائیل سے اپنے خصوصی تعلق کا ذکر کرتے ہوئے کہا کہ انہیں دوبارہ یہاں آکر بے حد خوشی محسوس ہو رہی ہے اور وہ 1.4 ارب بھارتی عوام کی جانب سے دوستی، احترام اور شراکت داری کا پیغام لے کر آئے ہیں۔ انہوں نے یہ بھی بتایا کہ ان کی پیدائش 17 ستمبر 1950 کو ہوئی تھی، اسی روز بھارت نے باضابطہ طور پر اسرائیل کو تسلیم کیا تھا۔
اپنے خطاب میں وزیر اعظم مودی نے ہولوکاسٹ کو انسانی تاریخ کے تاریک ترین ابواب میں شمار کرتے ہوئے کہا کہ ان مشکل حالات میں بھی انسانیت کی روشن مثالیں سامنے آئیں۔ انہوں نے گجرات کے نوانگر کے مہاراجہ، جام صاحب، کا ذکر کیا جنہوں نے دوسری جنگ عظیم کے دوران پولینڈ کے بچوں، جن میں یہودی بچے بھی شامل تھے، کو پناہ دی تھی۔
وزیر اعظم نے مزید کہا کہ بھارت میں یہودی برادری ہمیشہ امن و آزادی کے ساتھ رہی ہے اور انہیں کبھی امتیاز یا ظلم کا سامنا نہیں کرنا پڑا۔ انہوں نے کہا کہ یہودی برادری نے اپنی مذہبی شناخت برقرار رکھتے ہوئے بھارتی سماج میں مکمل طور پر حصہ لیا ہے۔
اس سے قبل پارلیمنٹ پہنچنے پر وزیر اعظم مودی کا پرتپاک استقبال کیا گیا۔ ایوان کے تمام ارکان کھڑے ہو گئے اور پورا ہال ’’مودی، مودی‘‘ کے نعروں سے گونج اٹھا۔ اس موقع پر اسپیکر عامر اوہانہ نے ہندی زبان میں وزیر اعظم کا استقبال کرتے ہوئے کہا، ’’مسٹر پرائم منسٹر، یروشلم میں آپ کا سواگت ہے، کنیسٹ میں آپ کا سواگت ہے۔‘‘
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
