افغانستان میں سیلاب کے باعث 13 افراد ہلاک
کابل: افغانستان میں حالیہ شدید بارشوں اور سیلاب کے نتیجے میں کم از کم 13 افراد ہلاک اور 16 زخمی ہو گئے ہیں۔ ژنہوا خبر رساں ایجنسی کے مطابق نیشنل ڈیزاسٹر اتھارٹی کے ترجمان ملا جانان سائک نے بتایا کہ گزشتہ 10 دنوں میں ہونے والی شدید بارشوں کی وجہ سے غزنی، لغمان، ننگرہار، فراہ، پکتیا، بادغیس، ہرات اور دائی کنڈی صوبوں میں اچانک سیلاب آیا۔
ملا جانان سائک کے مطابق بارشوں اور سیلاب سے صوبوں میں املاک کو بہت نقصان پہنچا ہے۔ 109 رہائشی مکانات مکمل یا جزوی طور پر تباہ ہوئے اور تقریباً 650 ایکڑ فصلی اراضی سیلابی پانی میں بہہ گئی۔ آپ کو بتاتے چلیں کہ رواں سال اگست میں افغانستان میں اچانک سیلاب سے دس افراد ہلاک ہو گئے تھے۔
نیشنل ڈیزاسٹر اتھارٹی کے ترجمان ملا جانان سائک نے کہا تھا کہ حالیہ دنوں میں ملک کے کچھ حصوں میں سیلاب کی وجہ سے 10 افراد ہلاک اور 8 زخمی ہوئے ہیں۔ سائک نے کہا تھا کہ قدرتی آفات کے واقعات میں 100 رہائشی مکانات مکمل یا جزوی طور پر تباہ ہوئے اور زرعی زمین کو شدید نقصان پہنچا۔
اطلاعات کے مطابق مئی سے اب تک بارشوں سے متعلقہ حادثات میں 400 سے زائد افراد ہلاک اور سینکڑوں زخمی ہو چکے ہیں۔ اس کے علاوہ جنگ زدہ ملک کے مختلف حصوں میں بھاری جانی اور مالی نقصان ہوا ہے۔
بھارت ایکسپریس۔
