Meena Kumari’s biography: ڈاکو نے چاقو سے اپنے ہاتھ پر لیا مینا کماری کا آٹوگراف، مدھیہ پردیش کے بیہڑ میں پیش آیا حیران کن واقعہ

نئی دہلی :ہندی سنیما کی دنیا میں کئی ایسے ستارے گزرے ہیں جو اپنی اداکاری کے ساتھ ساتھ دلچسپ اور حیران کن واقعات کے باعث بھی ہمیشہ یاد رکھے جاتے ہیں۔ ان ہی میں سے ایک نام مینا کماری کا بھی ہے، جو نہ صرف اپنی شاندار اداکاری بلکہ اپنی ذاتی زندگی کے انوکھے قصوں کے باعث بھی شہرت رکھتی تھیں۔31 مارچ کو ان کی برسی کے موقع پر ان کی زندگی سے جڑا ایک ایسا واقعہ سامنے آتا ہے، جو آج بھی سننے والوں کو حیران کر دیتا ہے۔ یہ واقعہ مدھیہ پردیش کے بیہڑ علاقے سے جڑا ہے، جہاں ایک رات اداکارہ کے ساتھ ایسا واقعہ پیش آیا جس نے خوف کو حیرت میں بدل دیا۔

مینا کماری کی سوانح عمری “میـنا کماری – اے کلاسک بایوگرافی” کے مطابق یہ واقعہ اس وقت کا ہے جب وہ اپنے شوہر اور فلم ساز کمال امروہی کے ساتھ شوٹنگ کے سلسلے میں سفر کر رہی تھیں۔ بتایا جاتا ہے کہ مدھیہ پردیش کے شیوپوری علاقے سے گزرتے وقت ان کی گاڑی کا پٹرول اچانک ختم ہو گیا۔ رات کا وقت تھا اور چاروں طرف سناٹا چھایا ہوا تھا۔ دور دور تک کوئی مدد نظر نہیں آ رہی تھی، اس لیے انہوں نے وہیں صبح ہونے کا انتظار کرنے کا فیصلہ کیا۔قابل ذکر بات یہ ہےکہ  انہیں اندازہ نہیں تھا کہ یہ علاقہ اس وقت ڈاکوؤں کے لیے بدنام تھا۔ رات تقریباً دو بجے اچانک کچھ مسلح افراد وہاں پہنچے اور گاڑیوں کو گھیر لیا۔ ماحول یکدم کشیدہ ہو گیا اور سب کو لگا کہ شاید لوٹ مار ہونے والی ہے۔لیکن جیسے ہی ان افراد کو معلوم ہوا کہ گاڑی میں موجود خاتون مشہور اداکارہ مینا کماری ہیں تو ان کا رویہ یکدم بدل گیا۔

ڈاکوؤں نے عزت و احترام سے پیش آنا شروع کر دیا۔ بتایا جاتا ہے کہ ڈاکوؤں کے سردار نے انہیں اپنے ٹھکانے پر لے جا کر کھانے پینے اور آرام کا مکمل انتظام کیا۔ خوف میں ڈوبی رات آہستہ آہستہ عجیب مہمان نوازی میں بدل گئی۔صبح ہونے پر جب مینا کماری اپنی ٹیم کے ساتھ روانہ ہونے لگیں تو ڈاکو سردار نے ایک انوکھی فرمائش کر دی۔ وہ ہاتھ میں تیز چاقو لے کر آیا اور کہا کہ وہ اداکارہ کا بہت بڑا مداح ہے اور چاہتا ہے کہ وہ اس کے ہاتھ پر چاقو سے آٹوگراف دیں۔ یہ سن کر مینا کماری ایک لمحے کے لیے گھبرا گئیں، لیکن حالات کو دیکھتے ہوئے انہوں نے ہمت دکھائی اور اس ڈاکو کے ہاتھ پر چاقو سے آٹوگراف دے دیا۔بعد میں جب وہ محفوظ مقام پر پہنچیں تو معلوم ہوا کہ وہ شخص عام ڈاکو نہیں بلکہ اس وقت کا بدنام زمانہ ڈاکو امرت لال تھا۔مینا کماری کی زندگی ایسے ہی دلچسپ اور حیران کن واقعات سے بھری ہوئی رہی، جنہوں نے انہیں نہ صرف ایک عظیم اداکارہ بلکہ ایک یادگار شخصیت بھی بنا دیا۔

بھارت ایکسپریس اردو