بالی ووڈ کے بادشاہ شاہ رخ خان نے اپنے 60ویں یومِ پیدائش پر بھی اپنے مداحوں کو مایوس نہیں ہونے دیا۔ ہر سال کی طرح اس بار بھی ’کنگ خان‘ نے اپنے چاہنے والوں سے ملاقات کی، مگر انداز کچھ مختلف رہا۔ اس بار انہوں نے منّت کی بالکنی سے نہیں بلکہ گھر کے دروازے کے باہر آکر اپنے فینز کا شکریہ ادا کیا۔ اتوار کو ممبئی میں ایک خاص فین ایونٹ کے بعد شاہ رخ خان اپنے گھر منّت کے باہر پہنچے۔ جیسے ہی وہ مداحوں کے سامنے آئے، فضا جوش و خروش سے بھر گئی۔ سوشل میڈیا پر سامنے آنے والی ویڈیوز میں دیکھا جا سکتا ہے کہ شاہ رخ خان گیٹ کے نزدیک جا کر مداحوں کو ہاتھ ہلا رہے ہیں، فلائنگ کس دے رہے ہیں اور بار بار شکریہ ادا کر رہے ہیں۔ تاہم، یہ خوشگوار لمحہ کچھ ہی دیر میں افرا تفری میں تبدیل ہو گیا۔ ہجوم اتنا پرجوش ہو گیا کہ لوگ گیٹ کی طرف دوڑ پڑے۔ اسی دوران ایک مداح نے شاہ رخ خان کا ہاتھ پکڑنے کی کوشش کی، جس کے بعد سکیورٹی ٹیم نے فوری طور پر اداکار کو اندر لے جا کر محفوظ کر دیا۔
منّت کی بالکنی سے ملاقات منسوخ
اس بار شاہ رخ خان نے اپنے مداحوں سے پہلے ہی سوشل میڈیا پر معافی مانگ لی تھی۔ انہوں نے بتایا کہ منّت میں جاری تزئین کاری(renovation) اور ہجوم پر قابو پانے کی وجوہات کی بنا پر وہ بالکنی سے مداحوں کو مخاطب نہیں کر پائیں گے۔ اپنے پیغام میں شاہ رخ نے لکھا: ’’مجھے بتایا گیا ہے کہ میں اس بار باہر آ کر اپنے پیارے فینز سے نہیں مل پاؤں گا۔ اس کے لیے معذرت خواہ ہوں، مگر یہ فیصلہ سب کے تحفظ کے لیے لیا گیا ہے۔ یقین مانیے، میں آپ لوگوں کو دیکھنے کو اتنا ہی یاد کروں گا جتنا آپ مجھے۔‘‘
مداحوں نے بھی ہار نہیں مانی
دلچسپ بات یہ ہے کہ پولیس کی جانب سے سڑکیں بند کیے جانے اور ہجوم سے پیچھے ہٹنے کی اپیل کے باوجود، کئی مداح سمندر کنارے کے راستے سے منّت کے باہر پہنچ گئے۔ شاہ رخ خان کا جنون ایسا ہے کہ ہر سال ان کی سالگرہ پر ہزاروں لوگ صرف ان کی ایک جھلک دیکھنے کے لیے وہاں جمع ہوتے ہیں۔ بتایا جاتا ہے کہ شاہ رخ خان نے اس بار اپنی 60ویں سالگرہ علی باغ میں اپنے خاندان اور قریبی دوستوں کے ساتھ منائی۔ اس جشن میں کرن جوہر، فرح خان، رانی مکھرجی سمیت کئی قریبی لوگ موجود تھے۔ سوشل میڈیا پر ان کی پارٹی کی متعدد تصاویر اور ویڈیوز وائرل ہو رہی ہیں۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
