نئی دہلی: دہلی-این سی آر میں زہریلی ہوا کا قہر دیوالی کے بعد بھی کم ہونے کا نام نہیں لے رہا ہے۔ بدھ کے روز بھی فضائی آلودگی انتہائی خراب زمرے میں رہنے کا امکان ظاہر کیا گیا ہے۔ بعض علاقوں میں فضائی معیار اشاریہ (اے کیو آئی) 380 سے تجاوز کر سکتا ہے، جبکہ کئی مقامات پر اس کے 400 کے پار پہنچنے کا خدشہ ہے۔ محکمہ موسمیات (آئی ایم ڈی) اور فضائی معیار کی پیش گوئی کے مطابق، 11 سے 13 نومبر کے درمیان ہوا کی رفتار کم رہنے کی وجہ سے آلودگی میں بہتری کے امکانات نہایت کم ہیں۔دہلی-این سی آر میں گریپ-2 نافذ ہونے کے باوجود فضائی آلودگی پر قابو نہیں پایا جا سکا ہے۔ آج بھی اے کیو آئی انتہائی خراب رہنے کا امکان ہے، جو کئی علاقوں میں 300 سے 400 کے درمیان پہنچ سکتا ہے۔ موسم میں تبدیلی کے باعث دھند اور کہرے کی صورت حال بھی آلودگی کو مزید سنگین بنا رہی ہے۔ اس کے علاوہ بارش نہ ہونے سے بھی لوگوں کی مشکلات بڑھنے کا اندیشہ ہے۔
گزشتہ 24 گھنٹوں میں دہلی-این سی آر کا حال
سینٹرل پولوشن کنٹرول بورڈ (سی پی سی بی) کے مطابق، منگل کے روز دہلی-این سی آر میں اے کیو آئی 300 سے 311 کے درمیان درج کیا گیا، جو انتہائی خراب زمرے میں آتا ہے۔ کئی علاقوں میں یہ سطح 380 سے 400 تک پہنچ گئی۔ اگرچہ دیر شام اے کیو آئی 299 ریکارڈ کیا گیا، لیکن یہ سطح بھی صحت کے لیے تشویش ناک ہے۔ رات تقریباً 9 بجے اے کیو آئی 304 درج کیا گیا۔چاندنی چوک، پوسا اور این ایس یو ٹی جعفرپور جیسے علاقوں میں اے کیو آئی 380 سے 395 کے درمیان ریکارڈ کیا گیا۔ فضائی آلودگی کی بڑی وجہ ہوا میں پی ایم 2.5 اور پی ایم 10 کے باریک ذرات کی موجودگی ہے۔ نوئیڈا، گروگرام اور فریدآباد میں بھی صورت حال تقریباً ایسی ہی رہی۔
آج موسم کا حال، بارش کا کوئی امکان نہیں
محکمہ موسمیات کے مطابق، دہلی اور آس پاس کے علاقوں میں زیادہ سے زیادہ درجہ حرارت 27 سے 29 ڈگری سیلسیس اور کم سے کم درجہ حرارت 14 سے 16 ڈگری سیلسیس کے درمیان رہنے کا امکان ہے۔ ہوا کی رفتار 5 سے 15 کلومیٹر فی گھنٹہ رہ سکتی ہے۔دوسری جانب، 15 نومبر تک بارش کا کوئی امکان ظاہر نہیں کیا گیا ہے۔ صبح اور شام کے وقت دھند اور کہرے جیسی صورت حال بن سکتی ہے، جس سے آلودگی کے اثرات مزید بڑھ سکتے ہیں۔
اگلے چند دن بھی زہریلی ہوا سے راحت ملنے کی امید کم
موسم میں تبدیلی، درجہ حرارت میں کمی اور بارش نہ ہونے کے باعث آنے والے دنوں میں فضائی آلودگی کم ہونے کے امکانات نظر نہیں آ رہے ہیں۔ ایسے میں دہلی-این سی آر کے لوگوں کو اگلے چند دنوں تک زہریلی ہوا سے راحت ملنے کی امید کم ہے۔ ماہرین کی ہدایت ہے کہ لوگ غیر ضروری طور پر گھروں سے باہر نکلنے سے گریز کریں اور باہر جاتے وقت ماسک سمیت ضروری حفاظتی اقدامات ضرور اختیار کریں۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
