نئی دہلی : مہاراشٹر کے پمپری چنچوڑ پولیس کمشنریٹ نے ڈیجیٹل شہری رابطے، فوری پولیس کارروائی اور جدید بنیادی ڈھانچے کے شعبوں میں نئی تاریخ رقم کی ہے۔ قیام کے محض 8 برسوں کے اندر کمشنریٹ کی ٹیم نے غیر معمولی ترقی اور بڑی کامیابیاں حاصل کی ہیں۔ مہاراشٹر کے وزیر اعلیٰ دیویندر فڈنویس نے پولیس کمشنریٹ کی ان کامیابیوں اور اہلکاروں کی لگن کی کھل کر ستائش کی۔ایک شاندار تقریب کے دوران شہر کو مکمل طور پر منشیات سے پاک بنانے کے لیے ڈیجیٹل مہم کا آغاز کیا گیا۔ اس کے ساتھ ہی پولیس فورس کو جدید ٹیکنالوجی اور سہولیات سے لیس کرنے کے لیے کئی اہم منصوبوں کا بھی افتتاح کیا گیا۔
48 ہزار شہریوں نے ایک ساتھ لی منشیات سے دور رہنے کی قسم
اکتوبر میں منعقدہ ’انسداد منشیات بیداری ٹاؤن ہال‘ کی کامیابی کے بعد پمپری چنچوڑ پولیس نے ٹیکنالوجی کے استعمال سے شہریوں کی شمولیت کا ایک اور ریکارڈ قائم کیا۔ تقریب میں وزیر اعلیٰ دیویندر فڈنویس کی قیادت میں منشیات کے خلاف اجتماعی حلف برداری کا اہتمام کیا گیا۔اس تاریخی مہم میں شہر کے 423 مختلف گروپوں سے تعلق رکھنے والے 48,000 سے زائد شہریوں نے گوگل میٹ کے ذریعے براہ راست شرکت کی اور ایک ساتھ منشیات سے دور رہنے کا عہد کیا۔
پولیس کمشنر ونئے کمار چوبے کو سونپی گئی 7/12 دستاویز
کمشنریٹ کی تاریخ میں ایک اور اہم سنگ میل اس وقت قائم ہوا جب وزیراعلیٰ دیویندر فڈنویس، نائب وزیر اعلیٰ ایکناتھ شندے اور نائب وزیر اعلیٰ و پونے کی سرپرست وزیر سنیترا اجیت پوار نے تاتھوڑے میں مجوزہ جدید پولیس ہیڈکوارٹر کی ملکیت سے متعلق سرکاری زمینی دستاویز (7/12 اتارا) پولیس کمشنر ونئے کمار چوبے (آئی پی ایس) کے حوالے کی۔اس موقع پر سنیترہ پوار نے کہا کہ یہ ہیڈکوارٹر کمشنریٹ کی بڑھتی ہوئی ضروریات اور مستقبل کے تقاضوں کو پورا کرنے کی سمت ایک انتہائی اہم قدم ثابت ہوگا۔
’ڈائل 112‘ پر محض 3 منٹ میں پہنچ رہی ہے پولیس
تقریب سے خطاب کرتے ہوئے وزیر اعلیٰ دیویندر فڈنویس نے پولیس کی مستعدی سے متعلق اہم اعداد و شمار پیش کیے۔ انہوں نے بتایا کہ ہنگامی ہیلپ لائن ’ڈائل 112‘ پر پمپری چنچوڑ پولیس نے مہاراشٹر کے تمام پولیس کمشنریٹس کے مقابلے میں سب سے کم رسپانس ٹائم درج کرکے پہلی پوزیشن حاصل کی ہے۔پولیس نے ہنگامی حالات میں شہریوں تک پہنچنے کا اوسط وقت کم کرکے محض 3 منٹ کر دیا ہے۔ اسے خواتین اور بزرگ شہریوں میں تحفظ کا احساس مضبوط کرنے کی سمت ایک اہم کامیابی قرار دیا جا رہا ہے۔
ڈرون، باڈی کیمروں اور جدید پولیس کمپلیکس کا تحفہ
پولیسنگ کو جدید ٹیکنالوجی سے لیس کرنے کے لیے وزیر اعلیٰ نے 350 باڈی وارن کیمروں، 65 نئی گشتی گاڑیوں اور نگرانی کے لیے 4 ڈرونز کا افتتاح کیا۔اس کے علاوہ مصنوعی ذہانت پر مبنی تفتیشی نظام ’تپاس سارتھی‘، بلاک چین ٹیکنالوجی، پورے شہر میں جدید سی سی ٹی وی نگرانی کے نظام اور مربوط ٹریفک مینجمنٹ سسٹم (آئی ٹی ایم ایس) کا بھی آغاز کیا گیا۔تقریب میں جدید پمپری پولیس کمپلیکس کا سنگ بنیاد بھی رکھا گیا۔ اس کمپلیکس میں زون-1 کا دفتر، انسداد منشیات ٹاسک فورس (اے این ٹی ایف) کا علاقائی دفتر اور پولیس اہلکاروں کے لیے 200 جدید رہائشی یونٹس تعمیر کیے جائیں گے۔
’اگلے 15 برسوں میں پونے سے بھی زیادہ ہو سکتی ہے آبادی‘: فڈنویس
وزیر اعلیٰ دیویندر فڈنویس نے کہا کہ پمپری چنچوڑ ایک تیزی سے ترقی کرنے والا صنعتی اور آئی ٹی مرکز ہے۔ آنے والے 15 برسوں میں یہاں کی آبادی پونے سے بھی زیادہ ہو سکتی ہے۔انہوں نے کہا کہ مستقبل میں شہر کی تیز رفتار ترقی اور بڑھتی ہوئی آبادی کو دیکھتے ہوئے امن و قانون سے متعلق چیلنجز سے نمٹنے کے لیے پولیس فورس کو تکنیکی اعتبار سے جدید بنانا انتہائی ضروری ہے۔اس موقع پر حکومت، انتظامیہ اور پولیس محکمے کے کئی سینئر افسران کے علاوہ معزز شہری بھی موجود تھے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
