جھارکھنڈ کے وزیر اعلیٰ ہیمنت سورین کی والدہ اور آنجہانی دیشوم گرو شیبو سورین کی اہلیہ روپی سورین کا بدھ کو رانچی کے باریاتو روڈ واقع ہِل ویو اسپتال میں انتقال ہوگیا۔ ان کے انتقال کی تصدیق ماہر امراضِ قلب ڈاکٹر دیپک گپتا اور نیورولوجسٹ ڈاکٹر اجول رائے نے کی۔ وہ تقریباً 80 برس کی تھیں۔ روپی سورین کے انتقال کی خبر سامنے آتے ہی جھارکھنڈ کے سیاسی اور سماجی حلقوں میں سوگ کی لہر دوڑ گئی۔ مختلف سیاسی جماعتوں کے لیڈروں، عوامی نمائندوں اور سماجی تنظیموں کی جانب سے تعزیت کا اظہار کیا جا رہا ہے۔
کئی ماہ سے تھیں علیل، حالیہ دنوں میں بگڑی طبیعت
روپی سورین گزشتہ کئی ماہ سے علیل تھیں اور حالیہ دنوں میں ان کی صحت مسلسل خراب ہو رہی تھی۔ ستمبر میں سانس لینے میں دشواری کے بعد انہیں ہِل ویو اسپتال میں داخل کرایا گیا تھا۔ اس سے قبل حیدرآباد میں بھی ان کا علاج کرایا گیا تھا۔ رانچی واپسی کے بعد ان کی طبیعت کئی مرتبہ بگڑی اور ڈاکٹروں کی نگرانی میں علاج جاری رہا۔ بدھ کو ان کی حالت اچانک تشویش ناک ہوگئی۔ ڈاکٹروں کی ٹیم نے علاج کے لیے ماہرین کو طلب کیا۔ ڈاکٹر دیپک گپتا اور ڈاکٹر اجول رائے سمیت دیگر طبی ماہرین مسلسل ان کی حالت پر نظر رکھے ہوئے تھے۔ بدھ کی شام طبیعت مزید بگڑنے کے بعد ڈاکٹروں نے ان کے انتقال کی تصدیق کی۔ والدہ کی سنگین حالت کے پیش نظر وزیر اعلیٰ ہیمنت سورین نے بدھ کے اپنے کئی پروگرام منسوخ کر دیے تھے۔ ریاستی کابینہ کی بدھ شام ہونے والی مجوزہ میٹنگ بھی ملتوی کر دی گئی۔
اسپتال پہنچے ہیمنت سورین، کئی وزرا بھی موجود رہے
وزیر اعلیٰ ہیمنت سورین شام تقریباً چار بجے ہِل ویو اسپتال پہنچے اور ڈاکٹروں سے اپنی والدہ کی صحت کے بارے میں معلومات حاصل کیں۔ ان کے اسپتال پہنچنے کے بعد ریاستی حکومت کے وزیر یوگیندر پرساد سمیت کئی دیگر لیڈر بھی وہاں پہنچے۔ ہیمنت سورین اپنی والدہ کی صحت کے بارے میں مسلسل ڈاکٹروں سے معلومات حاصل کر رہے تھے۔ ان کی طبیعت تشویش ناک ہونے کے بعد حکومت نے بھی ان کے علاج سے متعلق پیش رفت پر نظر رکھی ہوئی تھی۔
یکم جنوری 1962 کو ہوئی تھی شیبو سورین سے شادی
روپی سورین کی شادی یکم جنوری 1962 کو شیبو سورین کے ساتھ ہوئی تھی۔ شادی کے بعد وہ مسلسل شیبو سورین کے ساتھ رہیں اور جھارکھنڈ کی سیاسی تحریک کے اہم دور میں خاندان کا حصہ رہیں۔ شیبو سورین جھارکھنڈ تحریک کے اہم لیڈروں میں شمار ہوتے تھے اور جھارکھنڈ مکتی مورچہ (JMM) کے بانی لیڈروں میں شامل تھے۔ وہ جھارکھنڈ کے تین مرتبہ وزیر اعلیٰ بھی رہے۔ شیبو سورین کا 4 اگست 2025 کو دہلی کے سر گنگا رام اسپتال میں انتقال ہوا تھا۔ شوہر کے انتقال کے بعد روپی سورین خاندان کے ساتھ رہیں اور جھارکھنڈ مکتی مورچہ کے سیاسی خاندان کی ایک بزرگ اور اہم رکن کے طور پر ان کی موجودگی برقرار رہی۔
سیاسی و سماجی حلقوں میں تعزیت کا سلسلہ
روپی سورین کے انتقال کی خبر کے بعد جھارکھنڈ مکتی مورچہ سمیت مختلف سیاسی پارٹیوں کے لیڈوں، عوامی نمائندوں اور سماجی تنظیموں کی جانب سے تعزیتی پیغامات کا سلسلہ جاری ہے۔ ان کے انتقال کو سورین خاندان کے ساتھ ساتھ جھارکھنڈ کے سیاسی و سماجی حلقوں کے لیے بھی بڑا نقصان قرار دیا جا رہا ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
