نئی دہلی : کانگریس کے جنرل سکریٹری کے۔ سی۔ وینوگوپال نے چیف الیکشن کمشنر گیانیش کمار کو لے کر بڑا بیان دیا ہے۔ انہوں نے کہا کہ گیانیش کمار کا عہدے سے جانا صرف وقت کی بات ہے اور کانگریس یہ کرکے دکھائے گی۔ اہم بات یہ بھی ہے کہ کاکروچ جنتا پارٹی نے بھی گیانیش کمار کو لے کر الٹی میٹم دیا تھا، جس کی مدت ہفتہ (26 ستمبر) کو ختم ہو رہی ہے۔وینوگوپال نے کہا کہ گیانیش کمار کو عہدے سے ہٹانے کے مطالبے کو لے کر ملک بھر میں کانگریس لیڈروں اور کارکنوں کی جانب سے کیے گئے احتجاج ابھی صرف شروعات ہیں۔ انہوں نے دعویٰ کیا کہ آنے والے وقت میں جمہوریت کی حمایت میں بڑی تعداد میں لوگ سڑکوں پر نکلیں گے۔
مرکز کی حکومت پر بھی نشانہ
کے سی وینوگوپال نے مرکزی حکومت کو بھی نشانہ بنایا۔ انہوں نے حکومت اور اس کے حامیوں پر جمہوری اداروں کو کمزور کرنے کا الزام لگایا۔ وینوگوپال نے لوگوں سے جمہوریت کے معاملے پر آگے آنے کی اپیل کی۔انہوں نے کہا کہ حکومت پر دباؤ بنایا جانا چاہیے تاکہ انتخابی عمل اور ووٹوں سے متعلق معاملات میں جواب دہی طے ہوسکے۔
کانگریس کا احتجاج
ایس آئی آر کے معاملے کو لے کر کانگریس نے جمعہ کو ملک کے کئی حصوں میں احتجاج کیا۔ پارٹی کے لیڈروں اور کارکنوں نے ریاستی انتخابی دفاتر اور چیف الیکٹورل افسران کے دفاتر کی جانب مارچ کرنے کی کوشش کی۔ کئی مقامات پر پولیس نے بیریکیڈنگ کرکے مظاہرین کو روک دیا، جبکہ کچھ لیڈروں اور کارکنوں کو حراست میں بھی لیا گیا۔کانگریس نے چیف الیکشن کمشنر گیانیش کمار کو عہدے سے ہٹانے اور گرفتار کرنے کا مطالبہ کیا۔ پارٹی نے ان کے دور میں لیے گئے فیصلوں اور ووٹر لسٹ میں ہونے والی تبدیلیوں کا آزادانہ جائزہ لینے کا بھی مطالبہ کیا ہے۔
مارک وی آئی پی فیچر پر کانگریس کے سوالات
کانگریس نے الیکشن کمیشن کے بی ایل او ایپ میں مبینہ ’مارک وی آئی پی‘ فیچر کو لے کر بھی سوال اٹھائے ہیں۔ پارٹی کا الزام ہے کہ اس طرح کا فیچر ووٹروں کے درمیان برابری کے اصول پر سوال کھڑا کرتا ہے۔تاہم، الیکشن کمیشن کے پرانے قواعد میں ’مارکڈ الیکٹر‘ کی اصطلاح کا ذکر ملتا ہے۔ 2023 کے الیکشن کمیشن کے مینوئل میں کچھ اہم عہدوں پر فائز افراد اور بعض دیگر زمروں کے ووٹروں کو نشان زد کرنے کی شق کا ذکر کیا گیا ہے۔ اس لیے 2026 میں بی ایل او ایپ میں شامل کیے گئے ’مارک وی آئی پی‘ فیچر اور پرانے ’مارکڈ الیکٹر‘ کے اصول کے درمیان فرق کو الگ الگ سمجھنا ضروری ہے۔
پون کھیڑا نے گیانیش کمار سے کیا کہا؟
دہلی میں کانگریس کے میڈیا اور تشہیری شعبے کے سربراہ پون کھیڑا نے احتجاج کے دوران گیانیش کمار سے استعفیٰ دینے اور سرکاری گواہ بننے کی اپیل کی۔ کھیڑا نے کہا کہ اگر وہ ایسا نہیں کرتے تو انہیں مقدمے کا سامنا کرنے کے لیے تیار رہنا چاہیے۔کانگریس جنرل سکریٹری کے۔ سی۔ وینوگوپال نے بھی گیانیش کمار کو لے کر سخت بیان دیا۔ انہوں نے کہا کہ گیانیش کمار کا عہدے سے جانا صرف وقت کی بات ہے اور کانگریس یہ کرکے دکھائے گی۔ انہوں نے کہا کہ ملک بھر میں پارٹی لیڈروں اور کارکنوں کے احتجاج ابھی صرف شروعات ہیں۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
