نئی دہلی : مدھیہ پردیش کے بھوپال میں ٹوِیشا شرما کی موت کے معاملے میں سی بی آئی کی جانب سے داخل کی گئی 636 صفحات پر مشتمل چارج شیٹ میں کئی اہم انکشافات سامنے آئے ہیں۔ اس معاملے میں ٹوِیشا کے شوہر سمرتھ سنگھ اور ساس گری بالا سنگھ کو ملزم بنایا گیا ہے۔ چارج شیٹ میں ٹوِیشا کا ایک جذباتی اور دل دہلا دینے والا آخری پیغام بھی شامل ہے، جو انہوں نے اپنی بھابھی کو بھیجا تھا۔
موت سے پہلے بھیجا گیا آخری پیغام
سی بی آئی کے مطابق ٹوِیشا شرما نے اپنی موت سے کچھ دیرقبل اپنی بھابھی کو ایک میسج بھیجا تھا۔ اس میں انہوں نے لکھا تھا، ’’اس سے کہنا کہ میری بیوی کا بچا کھچا سامان لے جائے، لیکن کل۔ ابھی مجھے سکون سے مرنے دو۔‘‘یہ پیغام ٹوِیشا کا آخری ڈیجیٹل الوداعی پیغام قرار دیا جا رہا ہے۔ الزام ہے کہ اس پیغام کے چند ہی منٹ بعد انہوں نے جمناسٹک کی رسی کے ذریعے پھندا لگا کر خودکشی کر لی۔
ذہنی اذیت تحقیقات کا مرکزی نکتہ
سی بی آئی نے اپنی چارج شیٹ میں کہا ہے کہ 12 مئی کی رات 9 بج کر 36 منٹ پر بھیجا گیا یہ پیغام تحقیقات کا اہم ترین حصہ بن گیا ہے۔ ایجنسی کے مطابق اس پیغام سے ان مبینہ ذہنی اذیتوں اور دباؤ کا اندازہ ہوتا ہے جن کا سامنا ٹوِیشا کو کرنا پڑ رہا تھا۔چارج شیٹ میں دعویٰ کیا گیا ہے کہ شوہر سمرتھ سنگھ اور ساس گری بالا سنگھ کی جانب سے مبینہ طور پر کی جانے والی ذہنی ہراسانی اور دباؤ نے ٹوِشا کو انتہائی قدم اٹھانے پر مجبور کیا۔
موبائل فون اور CCTV فوٹیج کی جانچ جاری
سی بی آئی اب بھی ٹوِیشا اور سمرتھ سنگھ کے موبائل فونز سے مکمل فارنسک معلومات حاصل کرنے کی کوشش کر رہی ہے۔ اس کے علاوہ بھوپال میں گری بالا سنگھ کے گھر میں نصب CCTV کیمروں کے ڈی وی آر کا بھی انتظار کیا جا رہا ہے۔تفتیشی ایجنسی کا ماننا ہے کہ ان کیمروں میں 12 مئی کے وہ اہم واقعات ریکارڈ ہوئے ہوں گے، جب ٹوِیشا نے مبینہ طور پر اپنی جان لینے کا فیصلہ کیا تھا۔ یہ شواہد کیس کی تحقیقات میں اہم کردار ادا کر سکتے ہیں۔
دوبارہ پوسٹ مارٹم میں بھی خودکشی کی تصدیق
ٹوِیشا کی پہلی پوسٹ مارٹم رپورٹ پر ان کے اہل خانہ نے اعتراض کیا تھا۔ خاندان کا الزام تھا کہ ساس گری بالا سنگھ کے اثر و رسوخ کے باعث پوسٹ مارٹم سے قبل شواہد کے ساتھ چھیڑ چھاڑ کی گئی۔بعد ازاں دہلی کے آل انڈیا انسٹی ٹیوٹ آف میڈیکل سائنسز (AIIMS) کی ٹیم نے بھوپال جا کر دوبارہ پوسٹ مارٹم کیا۔ دوسری پوسٹ مارٹم رپورٹ میں بھی موت کی وجہ خودکشی ہی قرار دی گئی۔سی بی آئی کی چارج شیٹ کے بعد اس حساس معاملے نے ایک بار پھر توجہ حاصل کر لی ہے، جبکہ مزید فارنسک شواہد اور CCTV ریکارڈنگز کے سامنے آنے کا انتظار کیا جا رہا ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
