احمد آباد میں 4 جون سے 8 جون تک منعقد ہونے والی پہلی عالمی یوگاسن چیمپئن شپ 2026 کا باضابطہ افتتاح جمعرات کی شام وزیر اعظم نریندر مودی نے ورچوئل ذریعے سے کیا۔ اپنے خطاب میں وزیر اعظم نے یوگا کو کم سے کم خرچ میں صحت مند اور اعلیٰ طرزِ زندگی اپنانے کا بہترین ذریعہ قرار دیا۔
پوری دنیا میں منایا جائے گا عالمی یوگا
وزیر اعظم مودی نے کہا کہ 21 جون کو پوری دنیا میں عالمی یومِ یوگا منایا جائے گا، جس کے تحت مختلف ممالک میں یوگا سے متعلق پروگرام منعقد ہوں گے۔ انہوں نے بتایا کہ اس سال عالمی یومِ یوگا کی مرکزی تقریب بھارت کے تاریخی شہر کولکاتا میں ہوگی۔ ان کے مطابق عالمی یومِ یوگا سے قبل عالمی یوگاسن چیمپئن شپ صحت اور فلاح و بہبود کے لیے ’’ڈبل ڈوز‘‘ کی حیثیت رکھتی ہے۔انہوں نے کہا کہ آج دنیا بھر کے لوگ ایسے طریقوں کی تلاش میں ہیں جو انہیں طویل عرصے تک صحت مند اور متحرک رکھ سکیں، اور یوگا اس کا بہترین حل ہے۔ وزیر اعظم نے کہا، ’’یوگا انسان کو بھوگ (غیر ضروری آسائشوں) سے بھی نجات دیتا ہے اور بیماریوں سے بھی محفوظ رکھتا ہے۔ سب سے اہم بات یہ ہے کہ کم سے کم بجٹ میں اعلیٰ معیار کی زندگی گزارنے کا یہ بہترین ذریعہ ہے۔‘‘ انہوں نے عوام سے اپیل کی کہ وہ اس پیغام کو یاد رکھیں: ’’ہر روز یوگا، سب بیماریوں کو بھگائے گا۔‘‘
بین الاقوامی یومِ یوگا منانے کی تجویز
وزیر اعظم نے یاد دلایا کہ ایک دہائی قبل بھارت نے اقوامِ متحدہ میں بین الاقوامی یومِ یوگا منانے کی تجویز پیش کی تھی، جسے دنیا کے 190 ممالک کی حمایت حاصل ہوئی تھی۔ انہوں نے کہا کہ بھارت کا مقصد اپنی قدیم روایت کو پوری انسانیت کی صحت اور اجتماعی فلاح سے جوڑنا تھا۔ انہوں نے خوشی کا اظہار کرتے ہوئے کہا کہ آج دنیا بھر میں کروڑوں لوگ یوگا، دھیان (مراقبہ) اور پرانایام کو اپنی روزمرہ زندگی کا حصہ بنا چکے ہیں۔
پہلی عالمی یوگاسن چیمپئن شپ
پہلی عالمی یوگاسن چیمپئن شپ 2026 میں 60 ممالک کے کھلاڑی حصہ لے رہے ہیں۔ اس موقع پر وزیر اعظم نے شرکاء کو خصوصی پیغام دیتے ہوئے کہا کہ حکومتِ ہند کے وزارتِ آیوش نے ’یوگا 365‘ مہم شروع کی ہے۔ انہوں نے تمام کھلاڑیوں سے اپیل کی کہ وہ اپنے اپنے ممالک واپس جا کر یوگا کا پیغام عام کریں اور ’’یوگا 365‘‘ کے سفیر بنیں۔ ان کا کہنا تھا کہ شرکاء کا تجربہ اور اعتماد پوری دنیا کو یوگا کے فوائد سے جوڑنے میں اہم کردار ادا کر سکتا ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
