Janjati Sanskritik Samagam: دہلی میں آج عظیم قبائلی ثقافتی اجتماع، وزیر داخلہ امت شاہ کریں گے شرکت

نئی دہلی: مرکزی وزیر داخلہ امت شاہ اتوار کے روز دہلی کے تاریخی لال قلعہ میں منعقد ہونے والے ایک شاندار ’جن جاتی سانسکرتک سماگم‘ میں بطور مہمانِ خصوصی شرکت کریں گے۔ یہ تقریب قبائلی رہنما برسا منڈا کی 150 ویں یومِ پیدائش کے موقع پر منعقد کی جا رہی ہے۔ اس بڑے ثقافتی اجتماع میں ملک بھر کی 550 سے زائد قبائلی برادریوں سے تقریباً ڈیڑھ لاکھ نمائندوں کی شرکت متوقع ہے۔ اس پروگرام کا مقصد قبائلی شناخت، مقامی روایات اور ثقافتی ورثے کا جشن منانے کے ساتھ ساتھ ہندوستان کی تاریخ اور ملک کی تعمیر میں قبائلی برادریوں کے کردار کو خراجِ تحسین پیش کرنا ہے۔

شیام گری مندر میں تیاریوں کا لیا جائزہ

اس اجتماع سے قبل دہلی کے شیام گری مندر میں ایک اہم تیاری میٹنگ منعقد ہوئی، جس میں منتظمین اور مختلف قبائلی نمائندوں نے شرکت کی۔ اجلاس میں شرکت، ثقافتی پروگراموں، لاجسٹکس اور سکیورٹی انتظامات کا جائزہ لیا گیا۔ یہ پروگرام ’جن جاتی سرکشا منچ‘ کے زیر اہتمام منعقد کیا جا رہا ہے اور توقع کی جا رہی ہے کہ یہ قومی راجدھانی میں ہونے والے سب سے بڑے قبائلی اجتماعات میں شامل ہوگا۔ منتظمین کے مطابق روایتی لباس میں ملبوس قبائلی مرد و خواتین اپنے روایتی سازوں کے ساتھ رنگا رنگ ثقافتی جلوسوں کی صورت میں دہلی کے پانچ مختلف مقامات سے روانہ ہوں گے اور آخر میں لال قلعہ کے مرکزی مقام پر جمع ہوں گے۔

قبائلی ثقافت کی دکھے گی بھرپور جھلک

پروگرام میں مختلف ریاستوں کے قبائلی طبقات کی ثقافتی تنوع کو اجاگر کرنے کے لیے لوک رقص، روایتی موسیقی، دستکاری اور خصوصی نمائشیں پیش کی جائیں گی۔ اس موقع پر کھیل، تعلیم، سماجی خدمت اور ثقافت کے میدان میں نمایاں خدمات انجام دینے والی تقریباً 100 ممتاز قبائلی شخصیات کو بھی اعزاز سے نوازا جائے گا۔ منتظمین نے کہا کہ یہ پہلی بار ہوگا جب ملک کے دور افتادہ جنگلاتی اور پہاڑی علاقوں سے اتنی بڑی تعداد میں قبائلی افراد کسی ثقافتی پروگرام کے لیے قومی دارالحکومت میں جمع ہوں گے۔

انتظامات کے لیے 20 محکمے تعینات

پروگرام کے کامیاب انعقاد کے لیے متعدد کمیٹیوں کے ساتھ تقریباً 20 محکموں کو مختلف ذمہ داریاں سونپی گئی ہیں۔ ان میں رہائش، ٹرانسپورٹ، خوراک، پینے کے پانی، طبی سہولیات، سکیورٹی اور صفائی کے انتظامات شامل ہیں۔منتظمین نے میڈیا اداروں سے اپیل کی ہے کہ وہ اس اجتماع کو بھرپور کوریج دیں اور اسے ہندوستان کی قبائلی برادریوں کے اتحاد، ثقافتی فخر اور روایتی ورثے کے فروغ کے لیے ایک اہم قومی پروگرام کے طور پر پیش کریں۔ برسا منڈا کو ہندوستان کے عظیم قبائلی مجاہدینِ آزادی میں شمار کیا جاتا ہے۔ انہوں نے برطانوی حکومت کے خلاف ایک بڑی مزاحمتی تحریک کی قیادت کی تھی اور قبائلی عقیدے، شناخت اور روایات کے تحفظ کے لیے جدوجہد کی تھی۔

بھارت ایکسپریس۔