بڈگام پولیس نے غلام نبی شاہ کی جائیداد ضبط کی۔
بڈگام: بڈگام پولیس کی درخواست پر کارروائی کرتے ہوئے بڈگام کی خصوصی این آئی اے عدالت نے مفرور ملزم غلام نبی شاہ عرف ’ڈاکٹر فئی‘ کی غیر منقولہ جائیداد ضبط (اٹیچ) کرنے کا حکم دیا ہے۔ غلام نبی شاہ امریکہ میں مقیم ایک کشمیری علیحدگی پسند ہے۔
یہ ضبطی کا حکم ضابطۂ فوجداری کی دفعہ 83 (بھارتی شہری تحفظ ضابطہ 2023 کی دفعہ 85 کے مطابق) کے تحت جاری کیا گیا، کیونکہ ملزم کو اس سے قبل عدالت کی جانب سے مفرور (بھگوڑا) قرار دیا جا چکا تھا۔
عدالت کے احکامات کی تعمیل میں، ضلع بڈگام کے وڈوان گاؤں میں سروے نمبر 466 کے تحت ایک کنال اور دو مرلہ زمین، اور چٹابُگھ گاؤں میں سروے نمبر 343 کے تحت 11 مرلہ زمین کو ضبط کرنے کا حکم دیا گیا ہے۔ بڈگام کے ضلع کلکٹر کو ان جائیدادوں پر قبضہ حاصل کرنے کی ہدایت دی گئی ہے۔
علیحدگی پسند سرگرمیوں میں ملوث تھا ملزم
تحقیقات میں یہ بات سامنے آئی ہے کہ ملزم علیحدگی پسند سرگرمیوں میں ملوث تھا، جن میں ملک کی خودمختاری اور سالمیت کو کمزور کرنے کے مقصد سے پروپیگنڈا پھیلانا بھی شامل ہے۔ ان سنگین الزامات کو مدنظر رکھتے ہوئے بڈگام پولیس نے قانون کے مطابق سخت قانونی کارروائی شروع کی ہے۔
بڈگام پولیس کا کہنا ہے کہ وہ ایسے تمام افراد کے خلاف سخت اور قانونی کارروائی کے لیے پرعزم ہے جو ملک کی خودمختاری اور سالمیت کے لیے نقصان دہ علیحدگی پسند نظریات کو پھیلانے یا فروغ دینے میں ملوث پائے جائیں۔ یہ قانونی کارروائی ان تمام علیحدگی پسندوں کے لیے ایک واضح پیغام ہے جو بیرونِ ملک سے سرگرم ہیں کہ ان کے خلاف بھارتی قوانین کے تحت سخت کارروائی کی جائے گی۔
واشنگٹن میں مقیم ہے غلام نبی شاہ
کشمیر وادی کے ضلع بڈگام کے وڈوان علاقے کا رہائشی غلام نبی اس وقت واشنگٹن میں مقیم ہے اور وہ ورلڈ فورم فار پیس اینڈ جسٹس کا چیئرمین بھی ہے۔ 78 سالہ غلام نبی شاہ کو مئی 2025 میں بڈگام کی ایک عدالت نے غیر قانونی سرگرمیاں (انسداد) ایکٹ کے تحت درج ایک مقدمے میں مفرور مجرم قرار دیا تھا، اور اسے خودسپردگی کے لیے 30 دن کی مہلت دی گئی تھی۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
