Shubman Gill hospitalized: شبھمن گل اسپتال میں داخل، کولکتہ ٹیسٹ کی دوسری اننگز میں کھیلنے پر شبہ

کولکتہ: بھارتی کرکٹ ٹیم کے کپتان شبھمن گل کی طبی حالت نے ٹیم مینجمنٹ اور شائقین کو تشویش میں مبتلا کر دیا ہے۔ جنوبی افریقہ کے خلاف ایڈن گارڈنز میں کھیلے جا رہے ٹیسٹ میچ کے دوران ان کی گردن میں اچانک درد اور اکڑن پیدا ہو گئی، جس کے باعث انہیں میدان چھوڑ کر ریٹائرڈ ہرٹ ہونا پڑا۔ اس کے بعد انہیں بہتر طبی دیکھ بھال کے لیے اسپتال میں داخل کرایا گیا، جہاں وہ پوری رات زیرِ نگرانی رہیں گے۔

 دوسری اننگز میں شرکت مشکوک

آئی اے این ایس کے مطابق، گل کی حالت پر ڈاکٹر مسلسل نظر رکھے ہوئے ہیں۔ بی سی سی آئی نے ایک بیان میں کہا کہ شبھمن گل طبی نگرانی میں ہیں، اور مزید معائنوں کے بعد ہی ان کے کھیلنے پر کوئی فیصلہ لیا جائے گا۔ اس وقت یہ کہنا ممکن نہیں کہ وہ میچ کی دوسری اننگز میں میدان پر اتر سکیں گے یا نہیں۔

چوکّا لگاتے وقت گردن میں شدید تکلیف

یہ واقعہ بھارتی اننگز کے 35ویں اوور کی پانچویں گیند پر پیش آیا، جب گل نے ساؤتھ افریقہ کے اسپنر سائمن ہارمر کی گیند پر باؤنڈری لگائی۔ خوبصورت شاٹ کھیلنے کے فوراً بعد انہوں نے اپنی گردن پکڑ لی اور واضح طور پر تکلیف میں نظر آئے۔ وہ گردن موڑنے میں ناکام رہے اور فزیو کی مشاورت کے بعد فوراً میدان سے باہر چلے گئے۔ میچ شروع ہونے سے قبل بھی گل نے گردن میں درد کی شکایت کی تھی۔

یہ بھی پڑھیں: دوسری اننگز میں رویندر جڈیجا کا قہر، جنوبی افریقہ نے گنوائے 93 رنز پر 7 وکٹ

یہ پہلا موقع نہیں جب گل اس مسئلے سے دوچار ہوئے ہوں۔ اکتوبر 2024 میں نیوزی لینڈ کے خلاف ٹیسٹ سے پہلے بھی انہیں گردن میں شدید اکڑن محسوس ہوئی تھی اور وہ میچ سے باہر ہو گئے تھے۔ جولائی 2024 میں بھی سری لنکا کے خلاف دوسرے ٹی20 میں اسی چوٹ کے باعث وہ نہ کھیل سکے تھے۔

کپتان کی صحت پر تشویش

22 سالہ گل اس وقت بھارتی ٹیسٹ ٹیم کے کپتان ہیں۔ ایسے میں ان کی گردن کے بار بار متاثر ہونے سے نہ صرف ان کی ذاتی صحت بلکہ پوری ٹیم کی کارکردگی پر سوال کھڑے ہو رہے ہیں۔

بھارت ایکسپریس۔