امریکہ نے بھابھا اٹامک ریسرچ سینٹر (بی اے آرسی) سمیت بھارت کے تین اعلیٰ جوہری سینٹر پر سے پابندیاں ہٹا لی ہیں۔ اس سے امریکہ کے لیے بھارت کے ساتھ سویلین نیوکلیئر ٹیکنالوجی کا اشتراک کرنے کا راستہ صاف ہو جائے گا۔ یہ اعلان بائیڈن انتظامیہ کے دور کے آخری ہفتے اور قومی سلامتی کے مشیر جیک سلیوان کے دورہ بھارت کے ایک ہفتے بعد سامنے آیا ہے۔ یہ پابندی امریکہ نے 1998 میں پوکھران میں جوہری تجربات کرنے اور جوہری عدم پھیلاؤ کے معاہدے پر دستخط نہ کرنے پر عائد کی تھی۔ یہی نہیں امریکہ نے چین کے 11 اداروں کو قومی سلامتی کے حوالے سے پابندیوں کی فہرست میں شامل کر لیا ہے۔ یونائیٹڈ اسٹیٹس بیورو آف انڈسٹری اینڈ سکیورٹی (بی آئی ایس ) نے اس کی تصدیق کی ہے۔
ان اداروں سے بھی ہٹادی گئی پابندی
یو ایس بیورو آف انڈسٹری اینڈ سیکیورٹی (بی آئی ایس) کے مطابق بی اے آر سی کے علاوہ اندرا گاندھی سینٹر فار اٹامک ریسرچ (آئی جی سی اے آر) اور انڈین ریئر ارتھز (آئی آر ای) پر سے پابندی ہٹا ئی گئی ہیں۔ تینوں ادارے ہندوستان کے جوہری توانائی کے محکمے کے تحت کام کرتے ہیں۔ بی آئی ایس نے کہا، “اس فیصلے کا مقصد امریکہ کی خارجہ پالیسی کے مقاصد کی حمایت کرنا ہے، جس میں توانائی کے جدید تعاون کی راہ میں حائل رکاوٹوں کو کم کرنا ہے، بشمول مشترکہ تحقیق اور ترقی اور سائنس اور ٹیکنالوجی کے تعاون سے، جو توانائی کی حفاظت کی مشترکہ ضروریات اور اہداف کی طرف لے جائے گا۔”
امریکہ نے اشارےدئے تھے
پابندی ہٹانے کے فیصلے کو بھارت اور امریکہ کے درمیان سول نیوکلیئر معاہدے پر عمل درآمد میں سہولت فراہم کرنے کی کوشش کے طور پر دیکھا جا رہا ہے۔ اپنے دورہ ہند کے دوران جیک سلیوان نے کہا تھا کہ اب وقت آگیا ہے کہ شراکت داری کو مضبوط کرنے کے لیے بڑا قدم اٹھایا جائے۔ امریکہ میں ہندوستان کے سابق سفیر ترنجیت سنگھ سندھو نے اس اقدام کا خیرمقدم کیا اور اسے ہندوستان امریکہ شراکت داری کو مزید گہرا کرنے کا نتیجہ قرار دیا۔
بھارت ایکسپریس
