نوئیڈا میں چھ سالہ بچی کے ساتھ چھیڑ چھاڑ
نوئیڈا: نوئیڈا کے ایک پرائیویٹ اسکول میں چھ سالہ بچی کے ساتھ چھیڑ چھاڑ کا واقعہ پیش آیا ہے۔ یہ واقعہ اسکول میں کام کرنے والے ایک مزدور نے انجام دیا۔ اس معاملے میں پولیس نے لڑکی کی کلاس ٹیچر، ہیڈ مسٹریس اور ٹھیکیدار سمیت چار لوگوں کو گرفتار کیا ہے۔
الزام ہے کہ جب لڑکی نے یہ سارا واقعہ اپنی کلاس ٹیچر کو بتایا تو اس نے ہیڈ مسٹریس کے ساتھ مل کر معاملہ چھپانے کی کوشش کی۔ ساتھ ہی ٹھیکیدار پر الزام ہے کہ اس نے ملزم مزدور کو وہاں سے فرار ہونے میں مدد کی تھی۔
جب لڑکی نے گھر جا کر سارا واقعہ اپنے گھر والوں کو بتایا تو انہوں نے پولیس اسٹیشن میں شکایت درج کرائی۔ سیکٹر 24 پولیس اسٹیشن نے جمعرات کے روز بتایا کہ ایک نابالغ کے ساتھ واقعہ کے سلسلے میں شکایت درج کرائی گئی ہے۔ یہ واقعہ سیکٹر 12 میں واقع ماڈرن اسکول میں پیش آیا۔ شکایت موصول ہوتے ہی پولیس نے ایف آئی آر درج کی اور پوکسو ایکٹ سمیت دیگر دفعات لگائی۔
پولیس کے مطابق اس معاملے کی باریک بینی سے چھان بین کی گئی۔ جس میں انکشاف ہوا کہ 3 ستمبر کو اسکول میں کام کرنے والے مزدور نے لڑکی کے ساتھ گھناؤنا فعل کیا تھا۔ اس کے بعد طالب علم نے کلاس ٹیچر سریتا سنیجا اور ہیڈ مسٹریس پریتی شکلا کو اس واقعہ کی اطلاع دی۔
پولیس کی جانچ میں پتہ چلا ہے کہ ہیڈ مسٹریس اور کلاس ٹیچر نے اسکول سپرنٹنڈنٹ بسنت پانڈے کے ساتھ مل کر کسی کو اطلاع نہ دے کر اس واقعہ کو چھپایا تھا۔ ملزم کا ساتھ دیتے ہوئے اسے اسکول سے بھاگنے کی اجازت بھی دی۔
پولیس نے ٹھیکیدار مکیش کمار کو بھی اس معاملے میں ملزم کی مدد اور حوصلہ افزائی کا قصوروار پایا ہے۔ اس پورے واقعہ میں ملوث کلاس ٹیچر سریتا سنیجا، ہیڈ مسٹریس پریتی شکلا، سپرنٹنڈنٹ بسنت پانڈے اور ٹھیکیدار مکیش کمار کو گرفتار کرکے عدالتی تحویل میں بھیج دیا گیا ہے۔ پولیس واقعے میں ملوث ملزم کی تلاش کر رہی ہے۔
بھارت ایکسپریس۔
