Kathua Terrorists Attack: جموں و کشمیر میں ایک بار پھر بڑا دہشت گردانہ حملہ ہوا ہے۔ کٹھوعہ میں فوج کی گاڑی پر گھات لگا کر کیے گئے حملے میں بھارتی فوج کے 5 جوان شہید جب کہ 5 فوجی زخمی بھی ہوئے۔ اس حملے کے بعد جموں و کشمیر کانگریس نے حکومت سے ایک بڑی اپیل کی ہے۔ رہنماؤں نے حکومت پر زور دیا ہے کہ وہ دہشت گردی کے خلاف بھرپور جنگ شروع کرے۔ آئیے پورا معاملہ جانتے ہیں۔
فیصلہ کن جنگ شروع ہونی چاہیے – جموں و کشمیر کانگریس
جموں خطے میں ایک ماہ میں یہ پانچواں دہشت گرد حملہ تھا۔ رہنماؤں نے خاص طور پر جموں خطہ میں بڑھتے ہوئے دہشت گردی کے واقعات پر تشویش کا اظہار کیا ہے۔ جموں و کشمیر پردیش کانگریس کمیٹی کے سربراہ وقار رسول وانی نے کہا کہ ہم جموں خطہ میں سیکورٹی کی بگڑتی ہوئی صورتحال پر انتہائی فکر مند ہیں۔ یہ ضروری ہے کہ حکومت فیصلہ کن اقدام کرے۔ انہوں نے یہ بھی کہا کہ مسلح افواج، سکیورٹی اہلکاروں، پولیس اور عام شہریوں کی جانوں کے تحفظ کے لیے دہشت گردی کے خلاف بھرپور جنگ شروع کی جائے۔
ٹھوس کارروائی کی ضرورت– راہل
لوک سبھا میں قائد حزب اختلاف راہل گاندھی نے پیر کو جموں و کشمیر میں فوجیوں پر دہشت گردانہ حملے کی مذمت کی اور کہا کہ “کھوکھلی تقریریں” اور “جھوٹے وعدے” اب دہشت گردانہ حملوں کے خلاف کافی نہیں ہوں گے، بلکہ ٹھوس کارروائی کی ضرورت ہے۔
اس تنظیم نے قبول کی ذمہ داری
جموں و کشمیر کے کٹھوعہ علاقے میں ہونے والے اس حملے کی ذمہ داری کشمیر ٹائیگرس نامی تنظیم نے لی ہے۔ کشمیر ٹائیگرس نے بھارتی فوج کے قافلے پر گھات لگا کر حملہ کیا۔ انہوں نے خط جاری کرکے اس حملے کی ذمہ داری قبول کی ہے۔ خط میں کہا گیا ہے کہ مجاہدین نے گرینیڈ اور سنائپر رائفلز کا استعمال کیا۔ حملے کے بعد مجاہدین بحفاظت نکلنے میں کامیاب ہو گئے۔
-بھارت ایکسپریس
