Border-Gavaskar Trophy: ’’گیند بازوں کے دم پر ہندوستان کے پاس آسٹریلیا میں جیتنے کا موقع…‘‘، بارڈر گواسکر ٹرافی کے متعلق اسٹیو وا نے اپنے خیالات کا کیا اظہار

بنگلورو: اسپیس ایکسپو میں سابق آسٹریلیائی کپتان اسٹیو وا کی موجودگی نے سب کو حیران کردیا۔ اس دوران انہوں نے بارڈر گواسکر ٹرافی کے حوالے سے اپنے خیالات کا اظہار کرتے ہوئے کہا کہ ہندوستان کے پاس اپنے گیند بازوں کی طاقت پر آسٹریلیا میں جیت کا موقع ہے۔ اس کے علاوہ، وہ جسپریت بمراہ اور وراٹ کوہلی جیسے دگج ہندوستانی کرکٹرز سے بہت متاثر نظر آئے۔

اسٹیو وا نے کہا، ’’بارڈر-گواسکر ٹرافی بہت دلچسپ ہونے والی ہے۔ دو بہت اچھی ٹیمیں برابر ہیں۔ ہندوستان کے پاس آسٹریلیا میں جیتنے کا اچھا موقع ہے کیونکہ ان کے پاس بہت اچھا باؤلنگ اٹیک ہے۔ بمراہ اور شامی جیسے بہترین تیز گیند باز ہیں اور ان کے پاس اسپن کا مضبوط امتزاج ہے۔ وہیں آسٹریلیا کے پاس بھی اچھی گیندبازی ہے۔‘‘ ان کا مزید کہنا تھا کہ میں بھی ان میچوں کو لے کر پرجوش ہوں۔ امید ہے کہ ہمیں اچھی کرکٹ دیکھنے کو ملے گی۔

جب ان سے اسپیس ایکسپو میں موجودگی کے بارے میں پوچھا گیا تو انہوں نے کہا کہ میں بھی حیران ہوں کہ میں یہاں کیا کر رہا ہوں لیکن سچ یہ ہے کہ میں نے خلائی شعبے میں سرمایہ کاری کی ہے۔ ہم 2026 میں سیٹلائٹ (خلائی مشین) لانچ کرنے کا منصوبہ بنا رہے ہیں۔) میں نئی ​​چیزیں سیکھ رہا ہوں اور یہ میرے لیے سیکھنے کا ایک نیا تجربہ ہے اور یہ خلائی نمائش بہت دلچسپ ہے۔

بارڈر-گاوسکر ٹرافی کے بارے میں اتنا چرچا کیوں ہے؟ یہ ٹیسٹ سیریز آسٹریلیا اور بھارت کے درمیان کھیلی جارہی ہے۔ اس کا نام ایلن بارڈر اور لٹل ماسٹر سنیل گواسکر کے نام پر رکھا گیا ہے۔ ٹیم انڈیا کو نومبر میں آسٹریلیا کے دورے پر جانا ہے۔ دلچسپ بات یہ ہے کہ 1991-92 کے بعد پہلی بار دونوں ٹیموں کے درمیان پانچ میچوں کی ٹیسٹ سیریز کھیلی جائے گی۔

سیریز کے آغاز سے قبل دونوں ٹیموں کے سابق کرکٹرز اور موجودہ کھلاڑیوں کی جانب سے بیان بازی کا سلسلہ تیز ہوگیا ہے۔ ہر کوئی اپنا پلڑا بھاری اور ٹرافی کا مضبوط دعویدار ہے۔

کپتان پیٹ کمنز سے لے کر اسٹیو اسمتھ اور فارم میں چل رہے بلے باز ٹریوس ہیڈ تک سبھی ہندوستان کے خلاف اس میچ کا انتظار کر رہے ہیں۔ ان کا ماننا ہے کہ اس میں کوئی شک نہیں کہ ٹیم انڈیا مضبوط کھلاڑیوں سے لیس ہے لیکن اس بار ہوم گراؤنڈ پر آسٹریلیا اپنے چیلنج کے لیے پوری طرح تیار ہے۔ اس سیریز میں ابھی دو ماہ سے زیادہ کا وقت باقی ہے لیکن دنیائے کرکٹ کی گلیاروں میں اس کے چرچے عروج پر ہیں۔

بھارت ایکسپریس۔