نئی دہلی: بی ڈبلیو ایف ورلڈ چیمپئن شپ 2026 میں تریشا جولی اور گایتری گوپی چند کی جوڑی کو کانسی کے تمغے پر اکتفا کرنا پڑا۔ ویمنز ڈبلز کے سیمی فائنل مقابلے میں ہفتے کے روز بھارتی جوڑی کو چین کی لُیو شینگ شو اور تان ننگ کے ہاتھوں شکست کا سامنا کرنا پڑا۔ 71 منٹ تک جاری رہنے والے سیمی فائنل میں چینی جوڑی نے تریشا-گایتری کو 18-21، 21-13، 21-8 سے شکست دے کر فائنل کا ٹکٹ حاصل کرلیا۔ اس شکست کے ساتھ ہی تریشا اور گایتری کی جوڑی ویمنز ڈبلز کے فائنل میں پہنچنے والی پہلی غیر سیڈڈ جوڑی بننے کا اعزاز حاصل کرنے سے بھی محروم ہوگئی۔ تریشا اور گایتری کی شکست کے ساتھ ہی ٹورنامنٹ میں بھارت کا سفر بھی اختتام پذیر ہوگیا۔ بھارتی ٹیم کی مجموعی کارکردگی مایوس کن رہی اور ملک کے حصے میں صرف ایک کانسی کا تمغہ آیا۔
پہلے گیم میں بھارت کا شاندار آغاز
سیمی فائنل مقابلے کا آغاز تریشا اور گایتری کی جوڑی نے شاندار انداز میں کیا۔ بھارتی جوڑی نے چینی کھلاڑیوں کو مسلسل سخت مقابلہ دیا اور 7-2 کی برتری حاصل کرلی۔ تاہم، اس کے بعد لُیو شینگ شو اور تان ننگ نے زبردست واپسی کرتے ہوئے مسلسل 9 پوائنٹس حاصل کیے اور وقفے تک اسکور 11-7 سے اپنے حق میں کرلیا۔ بھارتی جوڑی نے ایک بار پھر شاندار کم بیک کیا اور پہلا گیم 21-18 سے اپنے نام کرلیا۔
دوسرے گیم میں چین نے میچ برابر کیا
پہلا گیم ہارنے کے بعد چینی جوڑی دوسرے گیم کے آغاز سے ہی حاوی دکھائی دی اور ابتدائی مرحلے میں 3-0 کی برتری بنا لی۔ تاہم، تریشا اور گایتری نے دوبارہ واپسی کی اور وقفے تک 9-8 کی برتری حاصل کرلی۔ مقابلہ 12-12 کی برابری پر پہنچا، لیکن اس کے بعد چینی جوڑی نے مسلسل آٹھ پوائنٹس حاصل کرتے ہوئے دوسرا گیم 21-13 سے جیت لیا۔
فیصلہ کن گیم میں بھارتی جوڑی بے بس
تیسرا گیم مکمل طور پر یکطرفہ رہا۔ چینی جوڑی نے اپنے تجربے کا بھرپور فائدہ اٹھاتے ہوئے وقفے تک 11-5 کی برتری حاصل کرلی۔ اس کے بعد شینگ شو-تان ننگ کی جوڑی نے مسلسل 8 پوائنٹس حاصل کیے اور فیصلہ کن گیم 21-8 سے جیت کر چین کے لیے فائنل میں جگہ پکی کرلی۔ اس طرح تریشا جولی اور گایتری گوپی چند کی جوڑی کا شاندار سفر سیمی فائنل میں ختم ہوا اور انہیں کانسی کے تمغے سے مطمئن ہونا پڑا۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
